1191. Dwitiyo Purush / Baishe Srabon 2 (Bengali, 2020)

1191. Dwitiyo Purush / Baishe Srabon 2 (Bengali, 2020)
           Mystery, Thriller.

   1993 ൽ ആണ് ഖോക്കോ എന്ന കൊലയാളി നടത്തിയ 3 കൊലപാതകങ്ങൾക്കു ശേഷം പോലീസ് പിടിയിൽ ആകുന്നത്.അയാൾ കൊന്നവരുടെ നെറ്റിയിൽ സ്വന്തം പേരെഴുതി ആണ് ആളുടെ കൊലപാതകങ്ങളിൽ signature ആയി വന്നത്.25 വർഷങ്ങൾക്കു ശേഷം വീണ്ടും അവൻ ജയിലിൽ നിന്നും ഇറങ്ങുമ്പോൾ കൊലപാതകങ്ങൾ തുടരുക ആണ്, അതേ രീതിയിൽ.എന്താണ് ഇത്തവണ കൊലപാതകങ്ങൾക്കു കാരണം?

   അഭിജിത് ആണ് ഇത്തവണയും കേസ് അന്വേഷിക്കുന്നത്.ബൈഷേ സ്രബോണിൽ നടന്ന സംഭവങ്ങൾക്ക് ശേഷം ഇന്നയാൾ പരമ്പര കൊലപാതക കേസുകൾ അന്വേഷിക്കുന്നതിൽ വിദഗ്ധനാണ്.കൊലപാതകിയുടെ രീതി ആണ് ഒരു കൊലപാതകത്തെ പരമ്പര കൊലപാതകം എന്നു വിശേഷിപ്പിക്കുന്നത് എന്ന അഭിപ്രായത്തിലുപരി, ഒരാൾ എന്തിനു അതു ചെയ്യുന്നു, അയാളുടെ മാനസികാവസ്ഥ എല്ലാം ഉൾപ്പെടുന്നു എന്ന അഭിപ്രായം ആണ് അഭിജിത്തിനു ഉള്ളത്.

  കേസ് അന്വേഷണം മുന്നോട്ടു പോകുന്നു.പക്ഷെ ഒരു സാധാരണ കൊലപാതക- അന്വേഷണ കഥയായി മാറുന്നതിനു പകരം വലിയ ഒരു രഹസ്യം ആണ് ചിത്രത്തിന്റെ അവസാനം അനാവരണം ചെയ്യുന്നത്.പ്രത്യേകിച്ചും ബൈഷേ സ്രബോണ് കണ്ടു ഇഷ്ടം ആയവർക്കു ഒരു ഞെട്ടൽ ആയിരിക്കും ഇതിന്റെ ക്ളൈമാക്‌സ്.

   ഒരിക്കലും പ്രതീക്ഷിച്ചിരുന്നില്ല ഇങ്ങനെ ഒരു ക്ളൈമാക്‌സ് !!

 ചൗമീൻ ആൻഡ് ചില്ലി ഫിഷ്!! ചെറിയ ഒരു ട്രാൻസിഷൻ ഉണ്ട്.നന്നായിരുന്നു!!


  അതു വരെ ഉള്ള സിനിമയിൽ ഒരു ഗാങ്സ്റ്റർ എന്ന നിലയിൽ ഉള്ള കൊലപാതകങ്ങൾ കാരണം താൽപ്പര്യം നഷ്ടപ്പെട്ട പ്രേക്ഷകനെ ആ ക്ളൈമാക്സിൽ എത്തിക്കാൻ ആണ് ശ്രീജിത് മുഖർജി ശ്രമിച്ചത്.

  ബൈഷേ സ്രബോണ് കണ്ടു ഇഷ്ടം ആയവർക്കു അതിന്റെ പുതിയ രൂപം കാണാം.ആദ്യ ഭാഗത്തിലും സിനിമയുടെ ഫ്ലോയിൽ ഇങ്ങനെ ഒരു പ്രശ്‌നം കണ്ടിരുന്നു.

  ക്ളൈമാക്സിനു വേണ്ടി കണ്ടു നോക്കാവുന്ന ചിത്രം.പ്രത്യേകിച്ചും ഒരു ഐഡിയയും ഇങ്ങനെ ഒരു revelation നെ കുറിച്ച ഇല്ലായിരുന്നു.

 MH Views Rating : 3/5

 Baishe Srabon, Dwitiyo Purush എന്നീ സിനിമകളുടെ ടെലിഗ്രാം ചാനൽ ലിങ്ക് t.me/mhviews or @mhviews എന്നു സെർച്ച ചെയ്താൽ ലഭിക്കുന്നത് ആണ്.

1047.Vinci Da(Bengali,2019)

1047.Vinci Da(Bengali,2019)
         Crime,Thriller.

  മരണം ആണ് അയാൾ ഇപ്പോൾ മുഴുവൻ സമയവും കേൾക്കുന്നത്.അറിഞ്ഞു കൊണ്ട് അല്ലെങ്കിലും ആ മരണങ്ങൾക്കു കാരണം അയാൾ കൂടി ആണ്.അതും തന്റെ പ്രവർത്തികൾക്ക് ന്യായീകരണം കൊണ്ടു വരുന്ന കൊലയാളിയോട്.അതും ഒരു പ്രത്യേക തരം കൊലയാളി.സാധാരണ സീരിയൽ കില്ലറുമാറിൽ നിന്നും വ്യത്യസ്തൻ ആയ ഒരാൾ.പക്ഷെ ഇവിടെ തീർച്ചയായും സംശയം ഉണ്ടാകും.ചെയ്യുന്നതിലെ നീതി.

   മനുഷ്യന്റെ മുഖം മികവോടെ ഉണ്ടാക്കുവാൻ കഴിയുന്ന ഒരാൾക്ക്.അതും ലിയോനാർഡോ ഡാവിഞ്ചിയുടെ വലിയ ആരാധകനു തന്റെ ജോലിയിൽ അത്ര പൂർണത കൈ വരിക്കാൻ ഉള്ള ത്വര ഉണ്ടാകാം.സ്വാഭാവികം.അതു കാരണം അയാളുടെ മുന്നിൽ ഉണ്ടായിരുന്ന സിനിമ ലോകം പോലും അന്യമായി തീർന്നു.എന്നാൽ,അയാൾ ഇപ്പോൾ മനസ്സിലാക്കുന്നു കുറെ ആളുകളുടെ ജീവൻ ചില സംഭവങ്ങളുടെ പിന്നിൽ ഉള്ള Collateral Damage മാത്രം ആയി മാറാൻ താൻ ആണ് കാരണം എന്ന്.

  ഒരു ദിവസം ഉറക്കം എണീക്കുമ്പോൾ താൻ കാണുന്ന കാഴ്ച തലേ ദിവസം കണ്ടതും ആയി ഒരു ബന്ധവും ഇല്ല എന്നു മനസ്സിലാക്കുക.ഒരു കടങ്കഥ പോലെ തോന്നുന്നുണ്ട് അല്ലെ ഈ കഥ?അതേ ഒരു കടങ്കഥ ആണ് ശ്രീജിത്ത് മുഖർജിയുടെ ക്രൈം ത്രില്ലർ ചിത്രമായ Vinci Da.മനുഷ്യ മനസ്സിന്റെ വേര്തിരിഞ്ഞ ചിന്തകൾ,ഒരു സംഭവത്തെ കാണുന്ന കാഴ്ചയിലെ വ്യത്യാസങ്ങൾ ഒക്കെ ചേർന്ന ഒരു കടങ്കഥ.

  രണ്ടു പ്രധാന കഥാപത്രങ്ങൾ ആണുള്ളത്.ഒരാൾ നിയമത്തിനോട് അമിതമായ ആരാധന ഉള്ള ആൾ.അതു അയാളെ കൊണ്ടെത്തിക്കുന്നത് ഭ്രാന്തിലേക്കു ആണ്.അതെങ്ങനെ എന്ന ചോദ്യം മനസ്സിൽ വന്നെങ്കിൽ സിനിമ കാണണം.ഉത്തരം ലഭിക്കും.മറ്റേ ആൾ സ്വന്തം അച്ഛന്റെ നിഴലിൽ നിന്നും ഇറങ്ങി സ്വന്തമായി പൂര്ണതയ്ക്ക് വേണ്ടി ശ്രമിക്കുന്ന ഒരു കലാകാരൻ.ഓരോ കഥാപാത്രത്തിന്റെ പൂർണതയും എവിടെ ആണെന്ന് വ്യക്തമായ അറിവുള്ള ആൾ.ഇവർ രണ്ടു പേരും ഒരിക്കൽ കണ്ടു മുട്ടുന്നു.അതും പ്രത്യേക തരം ഒരു മേയ്ക്കപ്പിന്റെ ആവശ്യത്തിനു.ഇവിടെ മാറി മറിയുന്നത് കുറച്ചു പേരുടെ ജീവിതം ആണ്.അതിനോടൊപ്പം മരണങ്ങളും.

    അതിനൊക്കെ എത്ര ന്യായീകരണം കണ്ടെത്തിയെങ്കിലും അവസാനം....ചിത്രം കാണുക.ബംഗാളി ക്രൈം ത്രില്ലറുകളിൽ മികച്ച ഒരു ചിത്രമാണ് Vinci Da.സസ്പെൻസ് കുറവാണെങ്കിലും ക്രൈം ത്രില്ലർ എന്ന നിലയിൽ സമീപിച്ചാൽ തന്നെ ചിത്രം നന്നായി തോന്നും.പ്രത്യേകിച്ചും ക്ളൈമാക്സിലേക്കു പോകുമ്പോൾ കഥാപാത്രങ്ങൾ ശരിക്കും ഞെട്ടിക്കും.

  Chothushkone,Baishe Srabon തുടങ്ങിയ മിസ്റ്ററി ത്രില്ലർ ചിത്രങ്ങളിലൂടെ എന്റെ പ്രിയപ്പെട്ട സംവിധായകരിൽ ഒരാളായി മാറിയ ശ്രീജിത് മുഖർജി ഇത്തവണയും നിരാശപ്പെടുത്തിയില്ല.അദ്ദേഹത്തിന്റെ കയ്യൊപ് പതിഞ്ഞ ചിത്രം തന്നെ.ഒരു സൈക്കോ ത്രില്ലർ ചിത്രത്തിൽ പരമ്പര കൊലപാതകിക്കു നൽകുന്ന പുതിയ നിർവചനം ഒക്കെ മികച്ച ഐഡിയ ആയാണ് തോന്നിയത്.

  ക്രൈം ത്രില്ലർ സിനിമകളുടെ ആരാധകരെ,ഇതു വഴി കൂടി......!!

More movie suggestions @www.movieholicviews.blogspot.ca

ചിത്രം എന്റെ ടെലിഗ്രാം ചാനലിൽ ലഭ്യമാണ്.

t.me/mhviews

890.KHOJ(BENGALI,2017)

890.Khoj(Bengali,2017)
      Mystery/Crime

"ഡോക്റ്ററുടെ പരാതിയുടെ പിന്നിലെ രഹസ്യം" -Khoj

ഷെർലോക് ഹോംസിനെ അനുകരിച്ചു മികച്ച കുറ്റാന്വേഷണ കഥകളും സിനിമകളും ബംഗാളിൽ നിന്നും ധാരാളം വന്നിട്ടുണ്ട്.വന്നു കൊണ്ടിരിക്കുന്നു.എനിക്ക് ബംഗാളി സിനിമയുടെ കലാപരമായ സവിശേഷതകളെക്കാളും ആകർഷിച്ചത് ഇത്തരം പ്രമേയങ്ങൾ ഉള്ള ചിത്രങ്ങൾ ആയിരുന്നു.ഭാഷയുടെ ഭംഗിയും കൂടി ആകുമ്പോൾ ഒരു പ്രേക്ഷകന് എന്ന നിലയിൽ തൃപ്തിപ്പെടുത്തുന്ന ഒന്നാണ് മിക്ക ബംഗാളി ചിത്രവും.

Whodunnit,Wheredunnit,Whydunnit എന്നീ ചോദ്യങ്ങൾ ആകും 'ഖോജ്'സിനിമയുടെ ആദ്യ അര മണിക്കൂറിൽ പ്രേക്ഷകന് ഉണ്ടാവുക.ഒരു സ്ത്രീയുടെ കരച്ചിൽ കേൾക്കുന്നു എന്ന ഫോണ് കോളിൽ നിന്നുമാണ് പോലീസ് ഇൻസ്‌പെക്‌ടർ സയൻ,ഡോക്റ്റർ.പ്രശാന്തിന്റെ വീട്ടിലേക്കു പോകുന്നത്.എന്നാൽ രോഗിയായ തന്റെ ഭാര്യയുടെ ഇൻജക്ഷൻ കൊടുക്കുമ്പോൾ ഉള്ള കരച്ചിൽ ആണത് എന്നു പറഞ്ഞു അയാൾ സയനെ യാത്രയാക്കുന്നു.എന്നാൽ അടുത്ത ദിവസം തന്റെ ഭാര്യയെ കാണുന്നില്ല എന്ന പരാതി കൊടുക്കുന്ന ഡോക്റ്റർ,അന്ന് വൈകുന്നേരം സായനോട് മോശമായ രീതിയിൽ പെരുമാറുന്നു.ഡോക്റ്ററുടെ ഭാര്യയെ അധികം ആരും കണ്ടിട്ടുമില്ല.അങ്ങനെ ഒരാൾ ശരിക്കും ഉണ്ടോ എന്നുള്ള അന്വേഷണത്തിന്റെ സമയത്താണ് കയ്യിലെ ഞരമ്പുകൾ മുറിച്ച രീതിയിൽ ഡോ.പ്രശാന്തിന്റെ കാണുന്നത്.അതിനു ശേഷം നടന്ന സംഭവങ്ങളിലൂടെ ആണ് കഥ വികസിക്കുന്നത്.

" WWW" അന്വേഷിച്ചു കണ്ടെത്തുന്ന രീതിയിൽ അണിയിച്ചൊരുക്കാമായിരുന്ന ചിത്രത്തെ എന്നാൽ ഈ സസ്പെൻസ് എല്ലാം വഴിയേ പുറത്താക്കി ആണ് അവതരിപ്പിച്ചിരിക്കുന്നത്.ക്ളൈമാക്‌സ് ഒരു പക്ഷെ ഒരു open ending ആയി പോലും വ്യാഖ്യാനിക്കാം.ചിത്രത്തിന് അതിന്റെതസ്യ രീതികൾ സ്വീകരിക്കാമായിരുന്നെങ്കിലും സിനിമയുടെ കഥ അവതരണ രീതി ആ ഒരു മിസ്റ്ററി സിനിമ മൂഡ് കുറച്ചെങ്കിലും നശിപ്പിച്ചു.

എന്നാൽ സിനിമയിൽ കണ്ട ഏറ്റവും വലിയ കുറവ് അഭിനേതാക്കളുടെ മോശം പ്രകടനം ആണ്.സിനിമയ്ക്ക് തുടക്കം കിട്ടിയ മുൻ തൂക്കം കളയാൻ പര്യാപ്തം ആയിരുന്നു അതു.ഒന്നു 2 കഥാപാത്രങ്ങൾ ഒഴികെ ഉള്ളവരുടെ അഭിനയം ഇത്തരം ഒരു സിനിമയ്ക്കു ചേർന്നത് അല്ലായിരുന്നു എന്നു തോന്നി.പക്ഷെ ക്ളൈമാക്‌സ് എടുത്താൽ ചിത്രത്തിന്റെ സൃഷ്ട്ടാക്കൾ എന്താണ് ഉദ്ദേശിച്ചത് എന്നു മനസ്സിലാകും.കുറവുകൾ മാറ്റി വച്ചു,ഇടയ്ക്കുള്ള ലോജിക്കില്ലായ്മ(പോലീസിനോട് ഡോക്റ്റർ കെട്ടിടത്തെ കുറിച്ച് പറയുന്ന സീനുകൾ) ഒക്കെ നോക്കിയാൽ പടം മൊത്തതിൽ ഒരു പക്ഷെ കണ്ടിരിക്കാം.

Watch out for the climax & cook your own story!!

794.MISHAWR RAWHOSHYO(BENGALI,2013)

794.MISHAWR RAWHOSHYO(BENGALI,2013),|Mystery|Thriller|Adventure|,Dir:-Srijit Mukherji,*ing:-Prasenjit Chatterjee, Indraneil Sengupta, Rajit Kapoor.


    ദക്ഷിണേന്ത്യന്‍ സിനിമ താരങ്ങളില്‍ സൂപ്പര്‍ സ്റ്റാര്‍ പദവിയിലേക്ക് എത്തി ചേരാന്‍ ഉള്ള വഴിയായി താരങ്ങളും അല്ലെങ്കില്‍ ആരാധകരും തിരഞ്ഞെടുക്കുന്ന വഴി ആ അഭിനേതാവിന്റെ ആയി വരുന്ന മാസ്/ആക്ഷന്‍ സിനിമയായിരിക്കും.പൊതുവായി പറയുന്നു എന്നതിനപ്പുറം ഇതിന്റെ ആധികാരികത ഒന്നും അവകാശപ്പെടുന്നില്ല.പക്ഷെ അങ്ങനെ ഒരു ചിന്ത ശക്തമായി ഉണ്ടെന്നു തന്നെ വിശ്വസിക്കുന്നു.നിര്‍മാതാക്കള്‍ക്ക് ഒരു താരത്തിന്റെ വില അവതരിപ്പിക്കാന്‍ ലഭിക്കുന്ന ഏറ്റവും വലിയ അവസരങ്ങളില്‍ ഒന്നാകും അത്.

  എന്നാല്‍ ബംഗാളി സിനിമയില്‍ ഇത്തരത്തില്‍ ഒരു നടന്റെ അഭിനയ ജീവിതത്തിലെ നാഴികക്കല്ലു എന്ന് പറയുന്നത് ഐതിഹാസിക ഡിട്ടക്ട്ടീവ് കഥാപാത്രങ്ങളെ അവതരിപ്പിക്കപ്പെടുമ്പോള്‍ ആണെന്ന് തോന്നുന്നു.ശക്തവും പ്രശസ്തവുമായ ധാരാളം കഥാപാത്രങ്ങള്‍ ഇത്തരത്തില്‍ ബംഗാളില്‍ നിന്നും പിറവി കൊണ്ടിട്ടുണ്ട്.ശരദിന്ദു ബന്ധോപധയുടെ ബ്യോമ്കേഷ്,സത്യജിത് റേയുടെ ഫെലുദ,സുനില്‍ ഗംഗോപധ്യയുടെ കക്കാബന്ദു എന്നിവര്‍ ഇവരില്‍ ചിലര്‍ മാത്രം.പലപ്പോഴും വായനയിലൂടെ പ്രേക്ഷകര്‍ക്ക്‌ പരിചിതര്‍ ആയവര്‍ പിന്നീട് ബംഗാളിന്റെ സിനിമ സംസ്ക്കാരത്തിന്റെ കൂടെ ഭാഗമായി തീര്‍ന്നൂ എന്ന് വേണം പറയാന്‍.

   ഇജിപ്തില്‍ നടന്ന ഭരണ മാറ്റത്തിന്‍റെ പശ്ചാത്തലത്തില്‍ ഒരു രഹസ്യം കണ്ടുപ്പിടിക്കാന്‍ കക്കബന്ധുവും അദ്ധേഹത്തിന്റെ ബന്ധുവായ ശോന്തുവും ശ്രമിക്കുന്നതാണ് ചിത്രത്തിന്റെ പ്രമേയം.ഇജിപ്റ്റിലെ ഏകാധിപത്യ ഭരണം അവസാനിക്കുന്ന ദിവസങ്ങളില്‍ ആരംഭിക്കുന്ന സിനിമയുടെ കഥയില്‍ നിന്നും അല്‍പ്പം പുറകോട്ടു പോകുമ്പോള്‍ 2010ല്‍ അല്‍ മാമൂന്‍ എന്ന ബിസിനസ്സുകാരന്‍, അയാളുടെ ഗുരുവും കലാപങ്ങളിലെ സൂത്രധാരനും ആയ മുഫ്തി മുഹമ്മദ്‌ അബോധാവസ്ഥയില്‍ കുറിച്ചിട്ട Hieroglyphic അടയാളങ്ങളുടെ അര്‍ത്ഥം കണ്ടെത്താന്‍ സാധിക്കുന്നു.

  കലാപത്തിന്റെ ഇടയില്‍ മുഫ്തി മുഹമ്മദിന്റെ പക്കല്‍ എത്തി ചേര്‍ന്ന നിധിയുടെ ശേഖരത്തെ കുറിച്ചുള്ള വിവരങ്ങള്‍ ആണ് അത് എന്ന് അല്‍ മാമൂന്‍ സംശയിക്കുന്നു.അത് കൊണ്ട് അതിലെ രഹസ്യങ്ങള്‍ കണ്ടെത്താന്‍ കക്കബന്ധുവിനെ സമീപിക്കുന്നു.എന്നാല്‍ കക്കാബന്ദു ആ അഭിപ്രായത്തോട് യോജിക്കുന്നില്ല.ഡല്‍ഹിയില്‍ ഉള്ള മുഫ്തി മുഹമ്മദിനെ സന്ദര്‍ശിച്ച ശേഷം കക്കാബന്ദു ശോന്തോയുടെ ഒപ്പം ഇജിപ്തിലേക്ക് യാത്രയാകുന്നു ആ അടയാളങ്ങളുടെ രഹസ്യം കണ്ടെത്താന്‍.ഇതേ സമയം മുഫ്തിയുടെ മറ്റൊരു ശിഷ്യനും കലാപങ്ങള്‍ക്ക് നേതൃത്വം നല്‍കുകയും ചെയ്യുന്ന ഹാനി അല്‍ ഖദിയും ആയി കക്കാബന്ദു പരിചയത്തില്‍ ആകുന്നു.അഭിപ്രായ വ്യത്യാസങ്ങളെയും വിശ്വാസമില്ലായും മൂലം അല്‍ മാമൂനും ഹാനിയും ഇപ്പോള്‍ ശത്രുക്കള്‍ കൂടിയാണ്.


   കക്കാബന്ദു മുഫ്തി മുഹമ്മദിന്റെ അവ്യക്തമായ അടയാളങ്ങള്‍ കണ്ടെത്തുമോ ?അതിന്റെ രഹസ്യം എന്താണ്?ഈ ചോദ്യങ്ങളുടെ എല്ലാം ഉത്തരം അറിയാന്‍ ചിത്രം കാണുക.തൊണ്ണൂറുകളിലെ ബാല പ്രസിദ്ധീകരണങ്ങളില്‍ ഇത്തരത്തില്‍ ഉള്ള കഥകളും കഥാപാത്രങ്ങളും ധാരാളം വന്നിരുന്നു.അത്തരത്തില്‍ ഉള്ള ഒരു നൊസ്റ്റാള്‍ജിയയുടെ അകമ്പടിയോടെ ആണ് ഇത്തരം കഥാപാത്രങ്ങളെ പലപ്പോഴും അവതരിപ്പിക്കുക.എന്നാല്‍ 1979ല്‍ രൂപകല്‍പ്പന ചെയ്ത കഥാപാത്രത്തെ ഇരുപത്തൊന്നാം നൂറ്റാണ്ടിലേക്ക് നന്നായി ഇളക്കി പ്രതിഷ്ടിച്ചിരിക്കുന്ന ഈ ചിത്രത്തില്‍.


  ബംഗാളി സിനിമയില്‍ വന്‍ വിജയങ്ങളില്‍ ഒന്നായി തീര്‍ന്ന ഈ പ്രസേന്ജിത് ചാറ്റര്‍ജി ചിത്രം സമാനമായ രീതിയില്‍ അവതരിപ്പിക്കപ്പെട്ട ചിത്രങ്ങളില്‍ ,സ്ഥിരം ഷെര്‍ലോക്ക് ഹോംസ് pattern ആണ് പിന്തുടര്‍ന്നതെങ്കിലും ഇത്തരത്തില്‍ ഉള്ള കഥകള്‍ വായനയിലൂടെയും സിനിമകളിലൂടെയും ആസ്വദിക്കാന്‍ കഴിയുന്നവര്‍ക്ക് മികച്ചതായി തന്നെ അനുഭവപ്പെടും.ഈ ചിത്രത്തിന്റെ അടുത്ത ഭാഗം ഈ അടുത്ത് റിലീസ് ചെയ്തിരുന്നു."യതി ഒഭിജാന്‍" എന്ന പേരില്‍.ശ്രീജിത്ത്‌ മുഖര്‍ജി തന്നെയായിരുന്നു അതിന്റെയും സംവിധാനം ഒപ്പം ഈ ചിത്രത്തിലെ പ്രധാന കഥാപാത്രങ്ങളും.

765.BADSHAHI ANGTI(BENGALI,2014)

765.BADSHAHI ANGTI(BENGALI,2014),|Mystery|Thriller|,Dir:-Sandip Ray,*ing:- Abir Chatterjee, Sourav Das, Paran Banerjee .


   പ്രദോഷ് സി മിത്തര്‍ എന്ന പ്രശസ്തനായ ഫിക്ഷന്‍ കഥാപാത്രത്തെ രൂപപ്പെടുത്തിയ സത്യജിത് റേ ബാല മാസിക ആയ സന്ദേശിലൂടെ നല്‍കിയ പ്രശസ്തി പിന്നീട് രണ്ടു സിനിമകളിലൂടെയും ഒട്ടനവധി നാടകങ്ങളിലൂടെയും പ്രേക്ഷകര്‍ക്ക്‌ പരിചിതനായി മാറി.എന്നാല്‍ അദ്ദേഹത്തിന്റെ മകനായ സന്ദീപ്‌ റേ ഈ കഥാപാത്രത്തെ ഒരു ഫ്രാഞ്ചൈസീ ആക്കി മാറ്റി കൂടുതല്‍ ചിത്രങ്ങള്‍ അവതരിപ്പിച്ചു.പഴയക്കാല വായനയുടെ നോസ്റ്റാള്‍ജിയയും പഴമയുടെ മണവും ഉള്ള ,എന്നാല്‍ ആധുനിക ലോകത്ത് നടക്കുന്ന കുറ്റാന്വേഷണ സിനിമകളായി.

   Royal Bengal Rahasya യ്ക്ക് ശേഷം മുഖ്യ കഥാപാത്രങ്ങളെ എല്ലാം മാറ്റി ഒരു reboot ആയിരുന്നു സന്ദീപ്‌ ഉദ്ദേശിച്ചത്.എന്നാല്‍ പുതിയ Feluda ആയി വന്ന അബീര്‍ ചാട്ടര്‍ജീയുടെയും സന്ദീപിന്റെയും ചില താല്‍പ്പര്യങ്ങള്‍ അതിന്റെ ഇടയില്‍ കയറി വന്നതോടെ ഒറ്റ സിനിമ മാത്രമായി reboot അവസാനിച്ചു.വളരെ ചെറുപ്പക്കാരന്‍ ആയ ഫെലൂദയെ ആണ് ഈ ചിത്രത്തില്‍ കാണാന്‍ ആവുക.കുറ്റാന്വേഷണത്തില്‍ താല്‍പ്പര്യം തുടങ്ങിയ സമയം.തപേഷ് ഒപ്പം ഉണ്ട്.ജടായൂ ഈ കൂട്ടുക്കെട്ടില്‍ കയറുന്നതിനു മുന്‍പ് ഉള്ള കഥ.

  സത്യജിത് റേയുടെ ഇതേ പേരില്‍ ഉള്ള നോവലില്‍ നിന്നും ആണ് ഇത്തവണ "ഇന്ത്യന്‍ ഷെര്‍ലോക്ക് ഹോംസിനെ "അവതരിപ്പിച്ചിരിക്കുന്നത്.ബാങ്ക് ഉദ്യോഗസ്ഥന്‍ ആണ് ഫെലൂദ ഇപ്പോള്‍.ലക്നവിലേക്ക് തപേഷിന്റെ അച്ഛനും താപെശിനും ഒപ്പം വന്ന ഫെലൂദ ,തപേഷിന്റെ പിതാവിന്റെ സുഹൃത്തായ സന്യാലിന്റെ ഒപ്പം ആണ് താമസം.പതിവ് പോലെ തന്‍റെ കഴിവിനെ കുറിച്ചുള്ള സംശയങ്ങള്‍ മറ്റുള്ളവരില്‍ നിന്നും മാറ്റിയ ഫെലൂദ ഇത്തവണ കാണാതായ ഒരു രത്ന മോതിരത്തിന്റെ പിന്നാലെയാണ്.


  സന്യാലിന്റെ സുഹൃത്തായ ഡോ.ശ്രീവാസ്തവയ്ക്ക് പ്രിയലാല്‍ സേത്ത് തന്‍റെ മരണത്തിനു കുറച്ചു നാളുകള്‍ക്കു മുന്‍പ് സമ്മാനം നല്‍കിയതാണ് മൂന്നൂറോളം വര്‍ഷങ്ങള്‍ക്കു മുന്‍പ് ഔറംഗസീബ്‌ ചക്രവര്‍ത്തി അണിഞ്ഞിരുന്നു എന്ന് വിശ്വസിക്കുന്ന ആ മോതിരം.എന്നാല്‍ ഡോക്റ്ററുടെ വീട്ടില്‍ തലേ ദിവസം നടന്ന മോഷണ ശ്രമം ആ മോതിരത്തിന് വേണ്ടി ആണെന്ന് അദ്ദേഹം സംശയിക്കുകയും അത് സന്യാലിനെ ഏല്‍പ്പിക്കുകയും ചെയ്യുന്നു.എന്നാല്‍ അടുത്ത ദിവസം തന്നെ ആ മോതിരം വിചിത്രമായ രീതിയില്‍ മോഷണം പോകുന്നു.ആരാണ് ആ മോതിരം മോഷ്ടിച്ചത്?ആ മോതിരത്തിന്റെ അടുത്ത കാലത്തുള്ള രഹസ്യം കൂടി കണ്ടെത്തണം.ആ കണ്ടെത്തല്‍ കൂടി ആണ് ചിത്രം അവതരിപ്പിക്കുന്നത്‌.


  പഴയ ,വര്‍ണത്തില്‍ ചാലിക്കാത്ത ബാലരമ,പൂമ്പാറ്റ എന്നിവയുടെ കാലത്തിലേക്ക് വീണ്ടും ഒരു മടങ്ങി പോക്ക്.ഒരു ചിത്രക്കഥ വായിക്കുന്ന താല്‍പ്പര്യത്തോടെ ചിത്രത്തിലെ സംഭവങ്ങള്‍ മുന്നോട്ടു പോകുന്നു.ലക്നവിന്‍റെ ചരിത്രത്തിലേക്കും അവിടത്തെ പ്രധാനപ്പെട്ട സ്ഥലങ്ങളിലേക്കും അവയുടെ ഭംഗിയും ഒക്കെ കണ്ടു ഉള്ള ഒരു യാത്രയാണ് ഈ ചിത്രം അന്വേഷണത്തിന്റെ വഴിയിലൂടെ.ഒരു കുറ്റാന്വേഷണ ചിത്രക്കഥയില്‍ വായനക്കാര്‍ക്ക് വേണ്ടത്ര രസിപ്പിക്കാന്‍ ആകുന്നതും മനസ്സിലാകുന്നതുമായ അന്വേഷണ വഴികളിലൂടെ ചിത്രം അവതരിപ്പിക്കുന്നു.


   മാറിയ ഇന്ത്യയുടെ പട്ടണങ്ങളുടെ മറ്റൊരു തരത്തില്‍ ഉള്ള സൗന്ദര്യം ആണ് ചിത്രത്തില്‍ ഏറെയും അവതരിപ്പിക്കുന്നത്‌.വളരെ ലളിതമായി,ബഹങ്ങളുടെ അകമ്പടി ഇല്ലാതെ മനസ് കൊണ്ട് ഇഷ്ടപ്പെട്ടു പോകുന്ന അവതരണ രീതി ആണ് ഈ ചിത്രത്തിനും ഉള്ളത് ,മുന്‍ സന്ദീപ്‌ റേ ചിത്രങ്ങള്‍ പോലെ തന്നെ.അന്വേഷണ കുതുകിയായ ഒരു ബാല്യക്കാലം അല്‍പ്പം എങ്കിലും അവശേഷിക്കുന്നവരില്‍ ഓര്‍മയുടെ ശേഷിപ്പുകള്‍ ആകും ചിത്രം നല്‍കുക.


More movie suggestions @www.movieholicviews.blogspot.ca

762.ROYAL BENGAL RAHASYA(BENGALI,2011)

762.ROYAL BENGAL RAHASYA(BENGALI,2011),|Mystery|Thriller|,Dir:-Sandip Ray,*ing:-Sabyasachi Chakraborty, Saheb Bhattacharjee, Bibhu Bhattacharya



"Old man in the hollow of people's tree.
Five times a dozen,less 2 and 3.
Face the rising sun,and walk the left point.
Where Arjuna waits with his palms joint.
Amidst them,search a thing.
Make a dind to stagger,even a King".


    പ്രദോഷ് സി മിതർ അഥവാ Feluda എന്ന സത്യജിത് റേയുടെ ഫിക്ഷൻ കഥാപാത്രമായ കുറ്റാന്വേഷകൻ, മഹിതോഷ് സിംഗ റോയ് എന്ന ധനികന്റെ ക്ഷണപ്രകാരം ഭൂട്ടാൻ അതിർത്തിയിൽ ഉള്ള ആ ഗ്രാമത്തിൽ എത്തിയപ്പോൾ കൊടുത്ത സമസ്യ ആണ്.Royal Bengal Rahasya സംവിധാനം ചെയ്തത് സന്ദീപ് റേ ആണ് .സത്യജിത് റേയുടെ ഒരേ ഒരു മകൻ.

   സത്യജിത് റേ രൂപം കൊടുത്ത "ഷെർലോക് ഹോംസ്" എന്നു വിളിക്കാം പ്രദോഷ് എന്ന കഥാപാത്രത്തെ.സന്ദേശ് എന്ന കുട്ടികളുടെ മാസികയ്ക്ക് വേണ്ടി രൂപപ്പെടുത്തിയ കഥാപാത്രം പിന്നീട് ഒട്ടേറെ സിനിമകളിലൂടെയും നാടകങ്ങളിലൂടെയും പ്രേക്ഷകന്റെ മുന്നിൽ എത്തി.Sonar Kella,Baba Felunath എന്നീ സിനിമകൾ സത്യജിത് റേ നേരിട്ട് സംവിധാനം ചെയ്യുകയും പിന്നീട് സന്ദീപ് റേ അതൊരു ഫ്രാഞ്ചൈസി ആക്കി മാറ്റുകയും ആണ് ഉണ്ടായായത്‌.

 ഹോംസിന് വാട്സൻ എന്ന പോലെ പ്രദോഷിന് ബന്ധുവായ തപേഷ് ഉണ്ടായിരുന്നു.ഒപ്പം പിന്നീട് അവതരിപ്പിച്ച ജടായൂ എന്ന എഴുത്തുകാരനും.

21 Rajani Sen Road,
Ballygunge ,Kolkata എന്ന മേൽവിലാസം തന്റെ കഥാപാത്രത്തിന് റേ നൽകുകയുണ്ടായി. (221ബി ബേക്കർ സ്ട്രീറ്റ് പോലെ).ബംഗാളി സിനിമ പരമ്പരയിൽ Feluda കഥാപാത്രത്തെ അവതരിപ്പിച്ച ഏഴാമത്തെ ചിത്രം ആണ് Royal Bengal Rahasya.


   മനുഷ്യഭോജികൾ ആയ കടുവകൾ ഉള്ള കാടിനു അടുത്തായിരുന്നു ആ വലിയ ബംഗ്ളാവ്.ദുരൂഹതകളും ചരിത്രവും ഉറങ്ങുന്ന അവിടെ മഹിതോഷ്,അയാളുടെ സെക്രട്ടറി ആയ താരിത്,സുഹൃത്തായ ശശാങ്ക,പിന്നെ മഹിതോഷിന്റെ സഹോദരൻ എന്നിവർ ആണ് ഉണ്ടായിരുന്നത് മറ്റു ജോലിക്കാരോടൊപ്പം.

  തന്റെ പൂർവികരുടെ വീര കഥകൾ പറയാൻ ആഗ്രഹിക്കുന്ന മഹിതോഷ് തന്റെ കുടുംബ ചരിത്രം എഴുതാൻ ഉള്ള ശ്രമത്തിൽ ആണ്.താരിത് ആണ് അതിനു സഹായിക്കുന്നത്.

പ്രദോഷിന് തന്റെ മുത്തച്ഛൻ എഴുതി വച്ച സമസ്യ കണ്ടു പിടിക്കാൻ അയാൾ 6 ദിവസം ആണ് നൽകിയിരിക്കുന്നത്.പ്രദോഷിന് വളരെ കൗതുകം തോന്നി ആ സമസ്യയിൽ.അദ്ദേഹം അതിനു പുറകെ പോകുമ്പോൾ ആണ് എന്ന് രാത്രി അവിടെ അതു സംഭവിച്ചത്.താരിത് ദുരൂഹമായ സാഹചര്യത്തിൽ കൊല്ലപ്പെടുന്നു.പോലീസ് അയാൾ കടുവയുടെ ആക്രമണത്തിൽ കൊല്ലപ്പെട്ടത് ആണെന്ന് വിധിയെഴുതാൻ പോകുമ്പോൾ ആണ് പ്രദോഷ് അസാധാരണമായ ഒന്നു അവിടെ കണ്ടെത്തുന്നത്.

സമസ്യയുടെ ഉത്തരം കണ്ടെത്താൻ വന്ന പ്രദോഷ് അങ്ങനെ മറ്റൊരു സാഹസികതയിൽ കൂടി പങ്കാളിയാകുന്നു.ആ സാഹസികതയുടെ കഥ ആണ് Royal Bengal Tiger അവതരിപ്പിക്കുന്നത്.താരിത് എങ്ങനെ ആണ് കൊല്ലപ്പെടുന്നത്?ആ വലിയ ബംഗ്ളാവിനെ ചൂഴ്ന്നു നിൽക്കുന്ന രഹസ്യം എന്താണ്?എന്തായിരുന്നു പ്രദോഷിന് ഉത്തരം കണ്ടെത്തേണ്ട സമസ്യയുടെ രഹസ്യം?കൂടുതൽ അറിയാൻ ചിത്രം കാണുക.

  ചിത്രം കാണുമ്പോൾ മനസ്സിൽ വന്നത് പണ്ട് തൊണ്ണൂറുകളിൽ ബാലരമ,പൂമ്പാറ്റ തുടങ്ങിയവയിൽ ഒക്കെ വായിക്കുമ്പോൾ ലഭിക്കുന്ന അക്കാലത്തെ ഇന്നത്തെ നിറങ്ങൾ ഇല്ലാത്ത കഥാപാത്രങ്ങളുടെ അവതരണ ശൈലി ആയിരുന്നു.കഥ ഇന്നത്തെ സാഹചര്യങ്ങളിലേക്കു മാറ്റിയെങ്കിലും കഥാവതരണം ഏറെ പുറകിൽ ഉള്ള അന്നത്തെ വായനയുടെ ഓർമകളിലേക്ക് കൊണ്ടു പോയി.

 ഒരു കുറ്റാന്വേഷകന്റെ സ്ഥായിയായ നിരീക്ഷണ പാടവവും സാമർത്ഥ്യവും ഒരു പോലെ യോജിപ്പിച്ച കഥാപാത്ര സൃഷ്ടി പ്രേക്ഷകനിൽ കൂടുതൽ താൽപ്പര്യം ഉണ്ടാക്കും.പഴയ കാലത്തിന്റെ രഹസ്യങ്ങളും ചരിത്രവും ഒരു മുത്തശ്ശി കഥ പോലെ ലാളിത്യത്തോടെ അവതരിപ്പിക്കുകയും അതു സിനിമ എന്ന മീഡിയ വഴി ഇന്നത്തെ പ്രേക്ഷകനിലും കഥാപാത്രങ്ങളിലൂടെ ആ കാലം ഒക്കെ അവതരിപ്പിക്കുന്നത് തീർത്തും പ്രശംസനീയം ആണ്.

  ഇന്ത്യൻ സിനിമകളിൽ ഏറ്റവും മികച്ച കുറ്റാന്വേഷണ ചിത്രങ്ങൾ,പുസ്തകങ്ങൾ എന്നിവ ഒരു പക്ഷെ വന്നത് ബംഗാളിയിൽ നിന്നും ആകാം.അതു കൊണ്ടു തന്നെയാകാം ഒരു കാലത്തിന്റെ ഓർമകൾ വീണ്ടും തിരികെ നൽകാൻ ഇത്തരം ചിത്രങ്ങൾക്ക് കഴിയുന്നതും.മികച്ച എഴുത്തുകാരുടെ സാന്നിധ്യം ആയിരിക്കും ഇതിനു കാരണം.ഒരു സിനിമ എന്ന നിലയിൽ ഒരു ഇന്ത്യൻ കുറ്റാന്വേഷണ നോവൽ വായിക്കുന്ന സുഖത്തിൽ കാണാം ഈ ചിത്രം.

More movie suggestions @www.movieholicviews.blogspot.ca

457.EBAR SHABOR(BENGALI,2015)

457.EBAR SHABOR(BENGALI,2015).|Mystery|Thriller|Crime|,Dir:-Arindam Sil,*ing:-Abhishek Bagchi, Rahul Banerjee, Ritwick Chakraborty .

   സ്രീശേന്ദു മുഖോപദ്യയുടെ Rwin എന്ന കഥയെ ആസ്പദം ആക്കിയാണ് എബാര്‍ ശബോര്‍ നിര്‍മിച്ചിരിക്കുന്നത്.പോലീസ് ഉദ്യോഗസ്ഥന്‍ ആയ ശബോര്‍ ദാസ്ഗുപ്ത സര്‍വീസില്‍ വളരെയധികം എക്സ്പീരിയന്‍സ് ഉള്ള ആളാണ്‌.ആ സീനിയോരിറ്റി ആകാം മിതാലി ഘോഷ് കൊല്ലപ്പെട്ടപ്പോള്‍ ആ കേസ് അദ്ധേഹത്തെ ഏല്‍പ്പിക്കാന്‍ കാരണം.മിതാലി ഘോഷിന്‍റെ മരണം നടക്കുന്നതിനു മുന്‍പ് മിതാലി ഒരാള്‍ മരിച്ചു വഴിയില്‍ കിടക്കുന്നതായി  കാണുന്നുണ്ട്.പ്രഭാതത്തില്‍ ഉള്ള ഓട്ടത്തിന്റെ ഇടയില്‍ ആണ് അവള്‍ അത് കാണുന്നത്.അത് കണ്ടു അവള്‍ ഭയപ്പെടുന്നു.

  പിന്നീട് നടക്കുന്നത് അവളുടെ കൊലപാതകം ആണ്.വളരെയധികം ദുരൂഹം ആയ ജീവിതം ആണ് അവള്‍ക്കുള്ളത്‌.അസാധാരണമായ വൈവാഹിക ജീവിതം.സ്വന്തം സ്വാതന്ത്ര്യത്തിനു മേല്‍ പിതാവ് അടിച്ചേല്‍പ്പിക്കാന്‍ നോക്കിയ ബന്ധം അവള്‍ ഉപേക്ഷിക്കുന്നു.പിന്നെ പലരുമായും ബന്ധം ഉണ്ടായിരുന്ന അവള്‍ സ്വതന്ത്ര ആയി പറന്നു നടക്കാന്‍ ആഗ്രഹിച്ചിരുന്നു.അതായിരിക്കാം അവള്‍ പോണ്ടിച്ചേരിയില്‍ താമസിക്കാന്‍ കാരണം.അവളുടെ തിരിച്ചു വരവില്‍ അവള്‍ സുഹൃത്തുക്കള്‍ക്ക് നല്‍കിയ പാര്‍ട്ടിയുടെ അന്ന് രാത്രി ആണ് അവള്‍ കൊല്ലപ്പെടുന്നത്.ആന്റി-ആല്‍ക്കഹോളിക്ക് പ്രസ്ഥാനങ്ങളും ആയി പോണ്ടിച്ചേരിയില്‍ വച്ച് സഹകരിച്ചിരുന്ന അവള്‍ എന്നാല്‍ ആ പാര്‍ട്ടിയില്‍ വച്ച് പതിവില്ലാത്ത വിധത്തില്‍ മദ്യപിക്കുന്നു.

  മിതാലി ഘോഷിന്റെ മരണം കൊലപാതകം ആണെന്ന് മനസ്സിലാക്കിയതോടെ ശബോര്‍ ദാസ്ഗുപ്തയുടെ മുന്നില്‍ സംശയത്തിന്‍റെ കണ്ണുകള്‍ എത്തുന്നത്‌ അവളുമായി ബന്ധം ഉള്ളവരിലേക്ക് ആയിരുന്നു.അവര്‍ ഓരോരുത്തരും ആയുള്ള കൂടിക്കാഴ്ചകള്‍ മിതാലിയുടെ ജീവിതത്തെ കുറിച്ചുള്ള ഏകദേശ ധാരണ ശബോറിന് ലഭിക്കുന്നു.ഓരോരുത്തര്‍ക്കും പറയാന്‍ ഉള്ളത് അവര്‍ക്കറിയാവുന്ന മിതാലിയെ കുറിച്ചായിരുന്നു.ശബോറിന്റെ ബാക്കി ഉള്ള മിതാലിയെ കുറിച്ചുള്ള അന്വേഷണം ആണ് ചിത്രം.സംശയത്തിന്‍റെ മുനയില്‍ ധാരാളം ആളുകളെ നിര്‍ത്തി പ്രേക്ഷകനെ കണ്ഫ്യൂസ് ചെയ്യുന്ന രീതിയില്‍ ആണ് ഈ ചിത്രവും നിര്‍മിച്ചിരിക്കുന്നത്.തരക്കേടില്ലാത്ത ഒരു ബംഗാളി ക്രൈം/ത്രില്ലര്‍ ആണ് എബാര്‍ ശബോര്‍.


More movie suggestions @www.movieholicviews.blogspot.com



  

323.89(BENGALI,2015)

323.89(BENGALI,2015)Crime|Mystery|Thriller|,Dir:-Manoj Michigan,*ing:-Saswata Chatterjee, Raima Sen, Shataf Figar.

    രണ്ടു കണ്ണുകള്‍ പൂര്‍ബയെ എന്നും അലട്ടിയിരുന്നു.പൂര്‍ബ ഇപ്പോള്‍ ഒരു സൈക്കാട്രിസ്റ്റ് ആണ്.മനുഷ്യ മനസ്സുകളുടെ ചിന്തകള്‍  വിവേകപരമായ അപഗ്രഥനത്തിലൂടെ മനസ്സിലാക്കിയെടുക്കുകയും അതിനെ നേര്‍വഴിക്ക് സഞ്ചരിക്കാന്‍ പ്രേരിപ്പിക്കുകയും ചെയ്യുന്നതാണ് പൂര്‍ബയുടെ ജോലി.എന്നാല്‍ പൂര്‍ബ ഇപ്പോള്‍ ഒരു അന്വേഷണത്തില്‍ ആണ്.തന്‍റെ കുട്ടിക്കാലം മുതല്‍ ഓര്‍മകളില്‍ വന്നു പോകുന്ന കണ്ണുകള്‍.അത് താന്‍ കാണുന്ന ആരുടെ എങ്കിലും ആണോ എന്നവള്‍ തിരയാറുണ്ട്.എന്നാല്‍ ആ കണ്ണുകളുടെ ഉടമയെ കണ്ടു പിടിക്കാന്‍ ആകുന്നില്ല അവള്‍ക്കു.എന്നാല്‍ അവളുടെ ഈ നിരീക്ഷണ പാടവം പിഞ്ചു കുഞ്ഞുങ്ങള്‍ ഉള്‍പ്പടെ ഉള്ളവരുടെ മരണത്തിനു ഇടയാക്കിയ തീവ്രവാദിയെ കണ്ടെത്താന്‍ അവളെ സഹായിക്കുന്നു.

   അന്വേഷണ ഉദ്യോഗസ്ഥന്‍ ആയ അനൂപിനെ പരിചയപ്പെടാന്‍ അവര്‍ക്ക് അവസരം ഒരുങ്ങുന്നത് അങ്ങനെയാണ്.അനൂപ്‌ അവരുടെ ജീവിതത്തിന്റെ ഭാഗമായി തീര്‍ന്നു.എന്നാല്‍ അനൂപിന് പൂര്‍വയുടെ മനസ്സിന്റെ ബലത്തില്‍ സംശയം ഉണ്ടായിരുന്നു.അവളെ ആ കണ്ണുകള്‍ അലട്ടിയിരുന്നു.മല്ലിക് എന്ന ഹിപ്നോട്ടിക് വിദഗ്ദ്ധന്റെ ചികിത്സയില്‍ അവളെ അലട്ടുന്ന ആ പ്രശ്നം അവര്‍ കണ്ടെത്തുന്നു.89 എന്ന സംഖ്യയുമായി "തന്‍റെ നേട്ടങ്ങളുടെ" കൊടുമുടിയില്‍ കയറാന്‍ വെമ്പുന്ന സബ്യാസച്ചി പാല്‍ എന്ന ബുദ്ധിമാനായ കോടീശ്വരനില്‍ ആണ് ആ അന്വേഷണം എത്തി ചേരുന്നത്.പൂര്‍ബ അയാളെ കാണാന്‍ തീരുമാനിക്കുന്നു.എന്നാല്‍ അയാളെ കാണുക എളുപ്പം അല്ലായിരുന്നു.കാരണം അയാളുടെ പ്രവൃത്തികള്‍ അയാളെ കൊണ്ടെത്തിച്ച സ്ഥലം അത്തരം ഒന്നായിരുന്നു.പൂര്‍ബ അനൂപിന്‍റെ സഹായത്തോടെ അയാളെ കാണാനായി ബംഗാളിന്റെ വടക്കന്‍ ഭാഗത്തേക്ക് യാത്ര തിരിക്കുന്നു.അവിടെ അവര്‍ ബുദ്ധിമാനായ സബ്യാസച്ചി പാലിനെ കാണുന്നു.എന്തായിരുന്നു പൂര്‍ബയ്ക്ക് അയാളുമായി ഉള്ള ബന്ധം.89 എന്ന സംഖ്യയില്‍ ഇവര്‍ രണ്ടു പേരും എങ്ങനെ ബന്ധിക്കപ്പെട്ടിരിക്കുന്നു?ഇതാണ് ചിത്രത്തിന്‍റെ ബാക്കി കഥ.

  അന്താരാഷ്‌ട്ര ചലച്ചിത്ര മേള തിരുവനന്തപുരത്ത് നടന്നപ്പോള്‍  ഈ ചിത്രം ആദ്യമായി പ്രദര്‍ശിപ്പിച്ചിരുന്നു.ഒരു ഫിലിം ഫെസ്റ്റിവലില്‍ കാണിക്കുന്ന സിനിമകളുടെ രീതിയില്‍ അല്ല ഈ ചിത്രം ഒരുക്കിയിരിക്കുന്നതെങ്കിലും വിശ്വാസങ്ങളും യാഥാര്‍ത്ഥ്യവുമായി  ഉള്ള കണ്ണി കണ്ടെത്തി ആണ് ഈ ചിത്രം അവതരിപ്പിച്ചിരിക്കുന്നത്.അതിനായി മനോജ്‌ മിച്ചിഗണ്‍ ഉപയോഗിച്ചിരിക്കുന്നത് സംഖ്യാശാസ്ത്രം,ആത്മാവിന്‍റെ കൂട് മാറ്റം തുടങ്ങിയ ശാസ്ത്രത്തിന്‍റെ അപ്പുറം ഉള്ള സംഭവങ്ങളില്‍ കൂടി ആണ്.ആ രീതിയില്‍ സമീപിച്ചാല്‍ നോണ്‍ ലീനിയര്‍ രീതിയില്‍ അവതരിപ്പിക്കപ്പെട്ട ഈ ചിത്രം ഒരു സൈക്കോ ത്രില്ലര്‍ ചിത്രം എന്ന നിലയില്‍ നിലവാരം പുലര്‍ത്തുന്നുണ്ട്,ചിലയിടങ്ങളില്‍ Silence of Lambs നെ ഓര്‍മിപ്പിച്ചു എങ്കിലും.

More movie suggestions @www.movieholicviews.blogspot.com

269.CHOTUSHKONE(2014,BENGALI)

269.CHOTUSHKONE(2014,BENGALI),|Thriller|Drama|,Dir:-Srijit Mukherji,*ing:-Aparna Sen, Chiranjit, Goutam Ghose,Parambrata Chatterjee.

  മരണം ആസ്പദം ആക്കി ഒരു ചിത്രം എടുക്കാന്‍ അയാള്‍ക്ക് നാല് സംവിധായകരെ ആവശ്യം ഉണ്ട്.അതിനായി രണ്ടു സിനിമകള്‍ സംവിധാനം ചെയ്യുകയും കുറച്ചു സിനിമയില്‍ അഭിനയിക്കുകയും ചെയ്ത ജോയ് എന്ന യുവ സംവിധായകനെ ഏല്‍പ്പിക്കുന്നു.ജോയ് അവരെ പോയി കാണുന്നു.ഒരു സിനിമ,നാല് കഥകള്‍.മരണം തീം ആയി വരുന്ന ഒരു അന്തോളജി ആയിരുന്നു അയാളുടെ മനസ്സില്‍.ജോയ് അവരെ ഓരോരുത്തരെയും ആ പ്രോജക്ട്ടിലേക്ക് ക്ഷണിക്കുന്നു.മുന്‍ക്കാല  നടിയും ഇപ്പോള്‍ സംവിധായകയും ആയ ട്രീന,കൊമേര്‍ഷ്യല്‍ സിനിമകളില്‍ അഭിനയിക്കുകയും ചിലത് സംവിധാനം ചെയ്യുകയും ചെയ്ത ദിപ്തോ,ബംഗാളിലെ ആര്‍ട്ട് സിനിമകളില്‍ വിശ്വസിക്കുന്ന സാക്യോ എന്ന സംവിധായകനും ആയിരുന്നു മൂന്നു സിനിമകള്‍ക്കായി കഥ എഴുതുന്നത്‌.നാലാമത്തെ സിനിമ ജോയിയും സംവിധാനം ചെയ്യും.

  കൂടുതല്‍ ചര്‍ച്ചകള്‍ക്കായി, എത്ര വേണമെങ്കിലും കാശ് മുടക്കാന്‍ തയ്യാറായ ആ നിര്‍മാതാവിനെ കാണുവാനായി അവര്‍ നാല് പേരും Henry's Island ലേക്ക് യാത്ര തിരിക്കുന്നു.പോകുന്ന വഴിയില്‍ നാല് പേരും കഥകള്‍ ഉണ്ടാക്കി ചര്‍ച്ചകള്‍ ആകാം എന്നൊരു ഉദ്ദേശവും ആ യാത്രയ്ക്ക് ഉണ്ടായിരുന്നു,എന്നാല്‍ ഇവരുടെ ചിന്തകളില്‍ നിന്നും വിഭിന്നമായ സംഭവങ്ങള്‍ ആണ് ആ യാത്രയില്‍ സംഭവിക്കുന്നത്‌.ഒരു പക്ഷേ കഥയെ പുനരവതരിപ്പിക്കുന്ന ഇത് പോലെ ഉള്ള സാധാരണ എഴുത്തില്‍ മനസ്സിലാക്കാന്‍ കഴിയാത്ത പലതും ആ യാത്രയില്‍ ഉണ്ടായിരുന്നു.ഫ്രെയിമില്‍ കാണുന്നത് പലപ്പോഴും ശ്രദ്ധ തിരിപ്പിക്കും പ്രേക്ഷകന്‍റെ.പ്രത്യേകിച്ചും ഓരോ കഥാപാത്രങ്ങളുടെ വൈകാരിക തലങ്ങള്‍ കാണുമ്പോള്‍.ട്രീനയുടെ നഷ്ട ജീവിതവും എന്നാല്‍ ഇപ്പോള്‍ ലഭിച്ചിരിക്കുന്നതും,പരസ്പരം  വഴക്കുകള്‍  ഉണ്ടാകുമെങ്കിലും സന്തോഷ പൂര്‍ണമായ ദാമ്പത്യം ആണ് അവര്‍ക്ക് ഉണ്ടായിരുന്നത്.അത് പോലെ ദീപ്തോയുടെ  പകുതി പ്രായം ഉള്ള പെണ്‍ക്കുട്ടിയും ആയുള്ള ബന്ധം,അയാള്‍ക്ക്‌ മകനുമായുള്ള അടുപ്പം എല്ലാം ഈ കഥയില്‍ അവതരിപ്പിക്കപ്പെടുന്നുണ്ട്.

  അത് പോലെ തന്നെയാണ് അവരുടെ ചര്‍ച്ചകളില്‍ കടന്നു വരുന്ന ബംഗാളി സിനിമകളുടെ മൂല്യച്യുതിയെ കുറിച്ചുള്ള പരാമര്‍ശങ്ങള്‍ .ഒരു സമയത്ത് ക്ലാസിക്കുകള്‍ ഏറെ നല്‍കിയിരുന്ന ഒരു സിനിമ ലോകം കച്ചവട സിനിമയിലേക്ക് മാറിയപ്പോള്‍ ഉണ്ടായ പരിണിത ഫലങ്ങളും മാര്‍ക്സിസത്തെ കൈ വിട്ട ബംഗാളും എല്ലാം ഉള്‍ക്കൊള്ളിക്കാന്‍  ശ്രമിച്ചിട്ടുണ്ട് സംവിധായകന്‍ ശ്രീജിത്ത്‌ മുഖര്‍ജീ.കഥ പറയുമ്പോള്‍ ഉള്ള നല്ല കയ്യടക്കം സംവിധായകന്‍ പ്രകടിപ്പിച്ചതായി തോന്നി.കാരണം വിരസമായ രംഗങ്ങള്‍ കുറവായിരുന്നു.അത് മാത്രമല്ല നോണ്‍ ലീനിയര്‍ രീതിയില്‍  അവതരിപ്പിക്കപ്പെട്ട സമാന്തരമായുള്ള കഥയും പ്രേക്ഷകന്‍റെ ആകാംക്ഷയെ ഉണര്‍ത്താന്‍ പാകത്തില്‍ ഉള്ളതായിരുന്നു.അത് പോലെ തന്നെ ആണ് അപ്രതീക്ഷിത ട്വിസ്റ്റും ക്ലൈമാക്സും.അനുപം റോയ് സംഗീതം നല്‍കിയ പാട്ടുകള്‍ ഒരു ബംഗാളി സിനിമ ആയിരുന്നിട്ടു പോലും ശ്രവണ സുന്ദരമായി തോന്നി.കഴിഞ്ഞ വര്‍ഷത്തെ ബംഗാളിലെ മികച്ച സിനിമകളില്‍ ഒന്നായി മാറി "ചൊതുഷ്കോന്‍".ആ യാത്രയുടെ അവസാനം കാണുവാനായി ചിത്രം മുഴുവന്‍ കാണുക.വളരെ നല്ല ഒരു സിനിമ ആണ് ചൊതുഷ്കോന്‍.

More reviews @www.movieholicviews.blogspot.com

131.BAISHE SRABON(BENGALI,2011)

131.BAISHE SRABON(BENGALI,2011),|Mystery|Thriller|Crime|,Dir:-Srijit Mukherjee,:ing:-Prasenjith Chatterjee,Parambratha Chatterjee,Raima Sen.

  2011 ല്‍ ഇറങ്ങിയ ബംഗാളി ചിത്രമായ  "ബൈഷേ സ്രാബന്‍" ഒരു ക്രൈം ത്രില്ലര്‍ ആണ്.സിനിമയുടെ തുടക്കം കൊല്‍ക്കത്തയിലെ പോലീസിനെ കുഴപ്പിക്കുന്ന നാല് മരണങ്ങളോടെ ആണ്.മരിച്ചവര്‍ എല്ലാം സാമൂഹിക ചങ്ങലയിലെ അടിത്തട്ടില്‍ ജീവിക്കുന്നവര്‍.അവര്‍ തമ്മില്‍ സാമ്യം ഉള്ളതൊന്നും ഇല്ലെങ്കിലും അവരുടെ മരണത്തെ ബന്ധിപ്പിക്കുന്ന ഒരു ഘടകം ഉണ്ട്.ബംഗാളിലെ പ്രശസ്തരായ കവികളുടെ കവിതാ ശകലങ്ങള്‍ ശവശരീരങ്ങളുടെ അടുക്കല്‍ നിന്നും ലഭിക്കുന്നുണ്ട്.ഇതിനും അപ്പുറം ഈ കേസില്‍ പുരോഗമനം ഉണ്ടാകാതെ ആയപ്പോള്‍ അന്വേഷണം ശരിയായ ദിശയില്‍ തന്നെ ആണോ എന്നൊരു സംശയം പോലീസ് അധികാര കേന്ദ്രങ്ങളില്‍ നിന്നും ഉണ്ടാകുന്നു.കേസ് അന്വേഷിക്കുന്നത് അഭിജിത്ത് എന്ന പോലീസുകാരന്‍ ആണ്.കേസ് അന്വേഷണത്തില്‍ മിടുക്കനായ അഭിജിത്തിന് എന്നാല്‍ ഈ കേസില്‍ അധികം ഒന്നും മുന്നോട്ടു പോകാനും സാധിക്കുന്നില്ല.അയാളുടെ കാമുകിയാണ് ടി വി ജേര്‍ണലിസ്റ്റ് ആയ അമൃത.അവളുടെ ടി വി ചാനലിലും ആ സമയത്ത് തന്നെ പരമ്പര കൊലയാളികളെ കുറിച്ച് ഒരു പരമ്പര ചെയ്യാന്‍ തീരുമാനിക്കുന്നു.

     കേസ് എങ്ങും എത്താത്തത് കൊണ്ടും അഞ്ചാമതൊരു കൊലപാതകം നടന്നത് കൊണ്ടും അവസാനം പോലീസില്‍ നിന്നും കൃത്യ നിര്‍വഹണത്തില്‍ ഗുരുതരമായ തെറ്റ് വരുത്തിയത്തിനു  പിരിച്ചു വിട്ട പ്രഭിന്‍ എന്ന പഴയ ഐ പി എസ്സുകാരന്റെ സഹായം അവര്‍ അഭ്യര്‍ത്ഥിക്കുന്നു.ഒരു encounter സ്പെഷ്യലിസ്റ്റ് ആയ പ്രഭിന്‍ രാജ്യത്ത് നടന്ന സുപ്രധാനമായ പരമ്പര കൊലപാതകങ്ങളുടെ അന്വേഷണത്തില്‍ ഭാഗമായിരുന്നതും ആയിരുന്നു.അപ്രതീക്ഷമായ ആക്രമണത്തില്‍ ഭാര്യയും മകനും കുട്ടവാളികളാല്‍ കൊല്ലപ്പെട്ട പ്രഭിന്‍ സര്‍വീസില്‍ നിന്നും പിരിച്ചു വിട്ടതിനു ശേഷം ഒരു പൂര്‍ണ മദ്യപാനിയായി തീര്‍ന്നു.പൊതുവേ പരുക്കനും കുറ്റവാളികളോട് ദാക്ഷിണ്യം ഇല്ലാത്ത ആളും ആയിരുന്നു പ്രഭിന്‍.തന്‍റെ വ്യവസ്ഥകള്‍ പോലീസ് അധികാരികള്‍ സമ്മതിച്ചപ്പോള്‍ പ്രഭിന്‍ കേസ് അന്വേഷണം ഏറ്റെടുക്കുന്നു.കൂടെ അഭിജിത്തും.കൊലപാതകങ്ങള്‍ അന്വേഷിക്കുമ്പോള്‍ ആദ്യം അഭിജിത്ത് പ്രഭിന്റെ മുഷിപ്പന്‍ സ്വഭാവം കാരണം അഭിപ്രായ വ്യത്യാസങ്ങള്‍ ഉണ്ടാകുന്നുണ്ട്.എന്നാല്‍ പിന്നീട് അവര്‍ ഒരുമിച്ചു കേസ് അന്വേഷിക്കുന്നു.പ്രഭിന്‍ അഭിജിത്തിന് ഒരു ഗുരുവിനെ പോലെ ആയി തീരുന്നു.അവര്‍ ഒരു ദിവസം അവിചാരിതമായി കൊലപാതകങ്ങളെ ബന്ധിപ്പിക്കുന്ന സുപ്രധാനമായ ഒരു കണ്ണി കണ്ടെത്തുന്നു.ബംഗാളിന്റെ സാമൂഹിക അടിത്തറയുടെ മുകളില്‍ പരാജയപ്പെട്ട ഒരു സമരത്തിന്‍റെ കഥ.അവര്‍ അവിടെ നിന്നും കൊലയാളിയിലെക്കുള്ള ദൂരം കുറയ്ക്കുന്നു.എന്നാല്‍ മരണങ്ങള്‍ വീണ്ടും സംഭവിക്കാം.അവര്‍ അതിനെ തടഞ്ഞേ തീരു.ആരാണ് യഥാര്‍ത്ഥ കൊലപാതകി?കൊലപാതകങ്ങളുടെ കാരണങ്ങള്‍?ഇവയെല്ലാം കണ്ടെത്താന്‍ അമൃതയും സുഹൃത്തും പിന്നെ സംഭവങ്ങള്‍ക്കെല്ലാം ദൃക്സാക്ഷി എന്ന് പറയാവുന്ന ഒരാളെയും ലഭിക്കുന്നു.

   ഇന്ത്യന്‍ സിനിമയുടെ സ്ഥിരം അവശ്യവസ്തു ആയ പാട്ടുകളും പ്രേമവും എല്ലാം കൂടി കൂട്ടി കലര്‍ത്തിയത് കൊണ്ട് ഒരു നല്ല ത്രില്ലര്‍ മൂഡ്‌ പലയിടത്തും നശിപ്പിക്കാന്‍ കഴിഞ്ഞ ചിത്രം എന്ന് പറയാം.ഒരു ക്ലാസ് ക്രൈം ത്രില്ലര്‍ ചിത്രം ആയി മാറിയേനെ ഇത്തരം വസ്തുതകള്‍ ഒഴിവാക്കി ഇരുന്നെങ്കില്‍.സിനിമ തുടക്കത്തില്‍ പുലര്‍ത്തിയ മികവു ഇടയ്ക്കെവിടെയോ മോശം വന്നു എങ്കിലും പിന്നീട് സിനിമയ്ക്ക് നല്ല രീതിയില്‍ ഒരു ത്രില്ലര്‍ മൂഡ്‌ ഉളവാക്കാന്‍ സാധിച്ചു.പ്രത്യേകിച്ചും ക്ലൈമാക്സിനും അപ്പുറം ഉള്ള കഥ..അഭിനേതാക്കളും മികച്ചു നിന്നു.പ്രത്യേകിച്ചും പരംബ്രത ചാറ്റര്‍ജിയും സംവിധായകനായ ഗൌതം ഘോഷിന്‍റെ അഭിനയവും.2011 ലെ ബംഗാളിലെ വലിയ ഹിറ്റ്‌ ആയിരുന്നു ഈ ചിത്രം.ചില ഇടങ്ങളില്‍ ഒക്കെ ഈ അടുത്തിറങ്ങിയ മലയാളം സിനിമകളെ ഓര്‍മിപ്പിച്ചു ഈ ചിത്രം. ക്രൈം സിനിമകള്‍ കാണുന്നവര്‍ക്ക് തീര്‍ച്ചയായും പരീക്ഷിച്ചു നോക്കാവുന്ന നിലവാരം ഒരു ചിത്രം തന്നെയാണ് ബൈഷേ സ്രാബന്‍.

More reviews @ www.movieholicviews.blogspot.com 

123.NOBEL CHOR(BENGALI,2011)

123.NOBEL CHOR(BENGALI,2011),|Thriller|Drama|,Dir:-Suman Ghosh,*ing:-Mithun Chakraborthy,Soma Chakraborthy.

ഭാരതം സമ്മാനിച്ച മഹാന്മാരില്‍ എന്നും മുന്‍പന്തിയില്‍ ആണ് "ഗുരുദേബ്" എന്ന് ജനങ്ങള്‍ ആദരത്തോടെ വിളിക്കുന്ന രബീന്ദ്രനാഥ ടാഗോറിന്റെ സ്ഥാനം.അദ്ദേഹത്തിന്‍റെ സാഹിത്യസപര്യകള്‍ക്ക് സമ്മാനമായി 1913 ല ലഭിച്ച നോബല്‍ സമ്മാനം 2005 ല്‍ മ്യൂസിയമായി മാറിയ വീട്ടില്‍ നിന്നും മോഷണം പോകുന്നു.ആ മോഷണവും അതിനു ശേഷം നടന്ന സംഭവങ്ങളും ഭാനു എന്ന ഒരു സാധാരണക്കാരന്‍ ആയ ഗ്രാമവാസിയുടെ ജീവിതത്തിലൂടെ അവതരിപ്പിക്കുകയാണ് സുമന്‍ ഘോഷ് ഈ ചിത്രത്തില്‍.മോഷണത്തെ തുടര്‍ന്ന് നടന്ന സംഭവങ്ങളെ ഫിക്ഷനുമായി കോര്‍ത്തിണക്കി ആണ് ഈ ചിത്രം അവതരിപ്പിച്ചിരിക്കുന്നത്.നോബല്‍ സമ്മാനം മോഷണം പോയി എന്ന വാര്‍ത്ത രാജ്യത്താകമാനം പ്രകമ്പനം സൃഷ്ടിച്ചു.പ്രത്യേകിച്ചും ടാഗോര്‍ എന്ന മഹാനെ ദൈവത്തെ  പോലെ ആരാധിക്കുന്ന ബംഗാളില്‍.പോലീസും സി ബി ഐ യും എല്ലാം കേസ് അന്വേഷണം തുടങ്ങുന്നു.മോഷണം നടന്ന അന്ന് രാത്രി ഭാനുദാ എന്ന് വിളിക്കുന്ന ഭാനു എന്ന സാധുവായ ഗ്രാമീണന്റെ വീട്ടിലെ കിണറിന്റെ അടുത്ത് മോഷ്ടാവിനു നഷ്ടപ്പെടുന്നു.പിറ്റേന്ന് രാവിലെ കിണറിന്റെ കരയില്‍ കടക്കുന്ന സ്വര്‍ണ നിറമുള്ള വസ്തു കണ്ട ഭാനു അതുമായി ആ ഗ്രാമത്തിലെ സ്കൂളിലെ പ്രധാനാധ്യാപകനെ കാണാന്‍ ചെല്ലുന്നു.അന്നത്തെ പത്രത്തില്‍ കണ്ട വാര്‍ത്ത അനുസരിച്ച് അത് കാണാതായ നോബല്‍ സമ്മാനം ആണെന്ന് അദ്ദേഹം ഭാനുവിനോട് പറയുന്നു.ഗ്രാമത്തിലെ മുതിര്‍ന്നവരുമായി ആലോചിച്ച് അവര്‍ അവസാനം നോബല്‍ സമ്മാനം മുഖ്യമന്ത്രിയെ ഏല്‍പ്പിക്കാന്‍ തീരുമാനിക്കുന്നു.നോബല്‍ സമ്മാനം വിറ്റ്‌ അത് ഗ്രാമത്തിന്‍റെ ശോചന്യാവസ്ഥ മാറ്റണം എന്ന അഭിപ്രായം ഉയര്‍ന്നു എങ്കിലും ഭാനു അതിനു ചെവി കൊടുക്കുന്നില്ല.ഭാനു അടുത്ത ദിവസം തലസ്ഥാന നഗരിയായ കൊല്‍ക്കത്തയിലേക്ക് യാത്ര തിരിക്കുന്നു.

   ഭാനു നോബല്‍ സമ്മാനം സര്‍ക്കാരിനെ ഏല്‍പ്പിക്കുമ്പോള്‍ കിട്ടുന്ന സമ്മാനം കൊണ്ട് തങ്ങളുടെ ജീവിതം ഭദ്രം ആകും എന്ന് ഭാനുവിന്റെ ഭാര്യയും വിശ്വസിക്കുന്നു.ഗ്രാമത്തില്‍ ഉണ്ടായിരുന്ന ഹൊരി എന്നയാളുടെ അടുക്കലേക്കു ആണ് ഭാനു പോകുന്നത്.മുഖ്യമന്ത്രിയുടെ അടുക്കല്‍ ഏതാണ ഹോരി സഹായിക്കുമെന്ന് അവര്‍ കരുതുന്നു.എന്നാല്‍ ഹൊരി ഭാനുവിനെ ആ സമ്മാനം വില്‍ക്കാന്‍ നിര്‍ബന്ധിക്കുന്നെങ്കിലും ഭാനു അതിനു തയ്യാറാകുന്നില്ല.മുഖ്യമന്ത്രിയെ കാണാന്‍ ഉള്ള അവസരം നിഷേധിക്കപ്പെട്ട ഭാനുവിന്റെ മനസ്സിന് ചാഞ്ചല്യം ഉണ്ടാകുന്നു.രബീന്ദ്രനാഥ ടാഗോര്‍ ആരാണ് എന്ന് അറിയാതെ ആരാധിക്കുന്നവരുടെ കൂട്ടത്തില്‍ ആയിരുന്നു അക്ഷരാഭ്യാസം ഇല്ലാത്ത ഭാനുവും.എന്നാല്‍ ഗുരുദേബിന്റെ വില ശരിക്കും എവിടെയാണെന്ന് ഭാനു മനസ്സിലാക്കുന്നു.ഒരു ഗ്രാമത്തില്‍ നിന്നും കൊല്‍ക്കട്ട പോലെ ഒരു വന്‍ നഗരത്തില്‍ എത്തിയ ഭാനുവിനെ കാത്തിരുന്നത് മനുഷ്യന്‍റെ മറ്റൊരു മുഖമായിരുന്നു.നോബല്‍ സമ്മാനത്തിനു വെറും സ്വര്‍ണത്തിന്‍റെ വില നല്‍കാന്‍ തയ്യാറായ മാര്‍വാഡി മുതല്‍ അന്താരാഷ്‌ട്ര തലത്തില്‍ ഉള്ള ബിസിനസ്സിനു ചുക്കാന്‍ പിടിച്ച പണക്കാരന്‍ വരെ ഉള്ള ആളുകള്‍ നോബല്‍ സമ്മാനം എന്താണെന്നും ഗുരുദേബ് ആരാണെന്നും ഭാനുവിന് മാന്സ്സിലാക്കി കൊടുക്കുന്നു.ഇന്ത്യന്‍ രാഷ്ട്രീയം,ബ്യൂറോക്രസി എന്നിവയുടെ പൊയ്മുഖങ്ങളും ഗ്രാമങ്ങളിലെ ജീവിത അവസ്ഥയും എല്ലാം ഈ ചിത്രത്തിലൂടെ അവതരിപ്പിക്കുവാന്‍ സംവിധായകന്‍ ശ്രമിച്ചിട്ടുണ്ട്.ഈ ഒരു അവസ്ഥയില്‍ ഭാനുവിന് എന്ത് സംഭവിച്ചു എന്നതാണ് ബാക്കി ചിത്രം.

  വെറുതെ ഒരു കാഴ്ച വസ്തു മാത്രമായി ഇരിക്കുന്ന നോബല്‍ സമ്മാനം വിറ്റ് ജീവിതം കരുപിടിപ്പിക്കാന്‍ പറയുന്ന ആളുകള്‍ മുതല്‍ അതിന്റെ മഹത്വം അറിയുന്ന ധാരാളം ആളുകള്‍ ഉണ്ടായിരുന്നു എങ്കിലും അതിന്റെ വില എന്താണെന്ന് യഥാര്‍ത്ഥത്തില്‍ ഭാനുവിന് മാത്രമേ മനസ്സിലാകുന്നുള്ളൂ."പീപലി ലൈവ് " പോലെ ഉള്ള സിനിമകളുടെ ഗണത്തില്‍ പെടുത്താം ഈ ചിത്രത്തെയും.ഒരു ത്രില്ലര്‍ എന്ന് വിളിക്കാവുന്ന കഥാ സന്ദര്‍ഭങ്ങളും എന്നാല്‍ അതിനു വിപരീതമായ കഥാഗതിയും കഥാപാത്രങ്ങളും ഈ ചിത്രത്തിലും കാണുവാന്‍ സാധിക്കും.പഴയക്കാല ബോളിവുഡ് സൂപ്പര്‍ താരമായിരുന്ന മിഥുന്‍ ദായുടെ വ്യത്യസ്തമായ മുഖമാണ് ഈ ബംഗാളി ചിത്രത്തില്‍.ടഗോരിനെക്കാളും കച്ചവട സാധ്യത പുതു യുഗത്തിലെ കായിക സിനിമ താരങ്ങള്‍ക്ക് ആണെന്ന് വില പേശലില്‍ പറയുന്ന  ഭാഗം മതി ഈ ചിത്രത്തിന്റെ പ്രസക്തി മനസ്സിലാക്കാന്‍.

More reviews @ www.movieholicviews.blogspot.com