1550 . Thirteen Lives (English, 2022)

 1550 . Thirteen Lives (English, 2022)

             Survival Drama: Streaming on Amazon Prime

      ഒരു സിനിമ കാഴ്ച എന്നതിലുപരി  ലോകം മൊത്തം ഒന്നിച്ച ഒരു രക്ഷ പ്രവർത്തനം എന്ന നിലയിൽ Thirteen Lives എന്ന സിനിമ നൽകുന്ന ഫീൽ മറ്റൊന്നാണ്. തായ്ലാൻഡിലെ ഗുഹയിൽ നിന്നും പുറത്തു കടക്കാനാകാതെ പോയ 12 കുട്ടികളും അവരുടെ കോച്ചിനെയും രക്ഷിക്കുന്ന കഥ അത് നടക്കുന്ന സമയം ലോകം മുഴുവൻ പ്രാർഥനയോടെ അവർക്ക് വേണ്ടി കാത്തിരുന്നതാണ് . എന്നാൽ പ്രതികൂലമായ സാഹചര്യങ്ങളെ വക വയ്ക്കാതെ മനുഷ്യ ജീവന് വലിയ വില നൽകി അത് നഷ്ടപ്പെടാതെ ശ്രമിച്ച ഒരു കൂട്ടം ആളുകൾ ഉണ്ടായിരുന്നു ലോകത്ത്. സിനിമയുടെ ടാഗ് ലൈനിൽ പറയുന്നത് പോലെ, 17 രാജ്യങ്ങൾ , 5000 ആളുകൾ പങ്കെടുത്ത ബൃഹത്തായ, ലോകത്തിലെ തന്നെ ഏറ്റവും വലിയ രക്ഷാ ദൗത്യം ആയിരുന്നു അത്. ആരും വിളിക്കാതെ തന്നെ, തങ്ങളെ കൊണ്ട് ആകുന്ന രീതിയിൽ രക്ഷാപ്രവർത്തനത്തിന് വന്ന ആളുകൾ ഓരോരുത്തരും അവരുടേതായ രീതിയിൽ അന്ന് അതിൽ പങ്കാളികൾ  ആയി. ഇത്തരം സാഹചര്യങ്ങൾ അപരിചിതമായ, അതിനൊപ്പം എന്താണ് ചെയ്യേണ്ടത് എന്ന് അറിയാതെ നിന്ന സർക്കാരിന്റെയും ജനങ്ങളുടെയും ഇടയിലേക്ക് വന്ന ആളുകൾ എങ്ങനെ നായകരായി എന്നാണ് സിനിമ കാണിച്ചു തരുന്നത്. 

  ഈ സംഭവങ്ങളുടെ വെളിച്ചത്തിൽ സിനിമാറ്റിക് രീതികൾ കുറച്ചു കൊണ്ടും, എന്നാൽ ഒരു ഡോക്യുമെന്ററി ആയി മാറുകയും ചെയ്യാത്ത സിനിമയാണ് റോൺ ഹോവാർഡ് അവതരിപ്പിച്ചിരിക്കുന്നത്. കോളിൻ ഫാരൽ , വിഗോ മോർടൻസൻ തുടങ്ങി ഒരു പിടി നല്ല അഭിനേതാക്കൾ ആണ് ചിത്രത്തിൽ ഉള്ളത്. സിനിമയെക്കുറിച്ച് പറയുകയാണെങ്കിൽ അതി നാടകീയത ഇല്ലാതെ , എന്നാൽ ഒരു സിനിമ കാണുമ്പോൾ ഉണ്ടാകുന്ന വികാരങ്ങൾ പ്രേക്ഷകന് നല്കുന്നുണ്ട് Thirteen Lives.

  ലോകം എത്ര ചെറുതാണ് അല്ലേ? ചില നേരങ്ങളിൽ നമ്മുടെ എല്ലാം സ്വരം ഒന്നായി മാറും . അതിന് അതിർത്തികൾ ഉണ്ടാകില്ല. അതിനും ഉപരിയായി ഒരു മനുഷ്യൻ  മറ്റൊരുവനോടും സമൂഹത്തോടും സ്വന്തം ഇഷ്ടത്തിൽ ചെയ്യുന്ന നല്ല കാര്യങ്ങൾ, അതിനു ഒരിക്കലും അന്ത്യം ഉണ്ടാകില്ല എന്ന് വിശ്വസിപ്പിക്കാൻ കഴിയുന്ന തരത്തിൽ ആണ് സിനിമയുടെ അവതരണം. ഒരു  fast- paced survival- thriller അല്ല ചിത്രം. മാത്രമല്ല സിനിമയുടെ ക്ലൈമാക്സും അറിയാവുന്നതാണ്. എന്നാൽ പോലും ചില ഭാഗങ്ങളിൽ ,ചില കഥാപാത്രങ്ങളിലൂടെ സിനിമയുടെ മനോഹരമായ ഒരു വശം കൂടി Thirteen Lives നൽകുന്നുണ്ട് . സിനിമ എന്ന നിലയിൽ നല്ലത് പോലെ ഇഷ്ടപ്പെട്ടൂ  Thirteen Lives. 

  സമയം കിട്ടുകയാണെങ്കിൽ കണ്ടു നോക്കൂ. ഇതേ സംഭവത്തെ കുറിച്ച് സിനിമകളും ഡോക്യുമെന്ററികളും വേറെയും വന്നിട്ടുണ്ട്. അതൊന്നും ഞാൻ കണ്ടിട്ടില്ല. ഇനി അത് കാണുമോ എന്നും അറിയില്ല. അത്ര ഇഷ്ടമായി ഈ സിനിമ. ഈ കഥ വച്ച് ഉള്ള സിനിമ ഇങ്ങനെയെ എടുക്കാവൂ എന്ന് മനസ്സ് പറയുന്നുണ്ട്. അതാണ് കാരണം.

 

1549. Diary (Tamil, 2022)

 1549. Diary (Tamil, 2022)

         Streaming on Aha.

   ഈ അടുത്ത് കണ്ടതിൽ സിനിമയുടെ അവസാനം വരെ ഇത്ര താൽപ്പര്യത്തോടെ ഇരുന്നു കണ്ട് തീർത്ത സിനിമ ഇല്ല എന്ന് പറയാം. അരുൾ നിധി നായകനായ ഡയറി കുറെ ഏറെ ജോൺറെകളുടെ മിക്സ് ആണെന്ന് പറയേണ്ടി വരും. അത് അവസാന സീനിൽ വരെ ഓരോന്നും പുതുതായി വന്നു കൊണ്ടിരിക്കുകയും ചെയ്യും. ഒരു പക്ഷെ പാളി പോകാവുന്ന അവസ്ഥയും ഉണ്ടായിരുന്നു. അവിയൽ പരുവത്തിൽ പോകാമായിരുന്ന സിനിമയെ സ്ക്രീപ്റ്റിങ്ങിലൂടെ വ്യക്തമായി സിനിമ ജോൺറെകൾ മാർക്ക്‌ ചെയ്തു എന്ന് തോന്നി.

    സിനിമയിൽ പരീക്ഷണങ്ങൾ വരുമ്പോൾ ഭൂരിഭാഗവും അതിനോടുള്ള ഒരു കൗതുകം ആകും പ്രേക്ഷകന് ഉണ്ടാവുക. എന്നാൽ ഒരു കൗതുകത്തിനു അപ്പുറം മികച്ച ഒരു സിനിമ, അതും ത്രില്ലർ എന്ന ജോൺറെയോട് ചേർന്ന് നിൽക്കുന്ന രീതിയിൽ കൊണ്ട് വന്നൂ എന്നതിൽ തന്നെ ജനപ്രിയം കൂടി ആയി മാറുന്നുണ്ട്.

  വർഷങ്ങൾക്കു മുന്നേ നടന്ന തെളിവില്ലാത്ത കേസ് തന്റെ പോലീസ് ട്രൈനിങ്ങിന്റെ ഭാഗമായി കൂടുതൽ അന്വേഷണം നടത്താൻ സാഹചര്യം ലഭിക്കുന്ന നായകൻ കഥാപാത്രം പിന്നീട് കടന്ന് പോകുന്ന അസാധാരണമായ സംഭവ വികാസങ്ങളെ ചുറ്റി പറ്റിയാണ് സിനിമയുടെ ബാക്കി കഥ. പല ജോൺറെകൾ ബ്ലൻഡ് ചെയ്ത് ഒരുക്കിയ മികച്ച ഒരു സിനിമ ആണ്‌ Diary.

എന്റെ അഭിപ്രായത്തിൽ must watch എന്ന് തന്നെ പറയാം !! Great treat for genre- lovers!!

1548. The Night Clerk (English, 2020)

 1548. The Night Clerk (English, 2020)

          Crime, Drama

  ബാർട്ടിനു സാമൂഹികമായി ഉള്ള ഇടപെടലുകൾ നടത്താൻ ബുദ്ധിമുട്ടുള്ള അവസ്ഥയാണ്. Asperger's Syndrome ആണ്‌ അവന്. ഒരു ഹോട്ടലിൽ ആണ്‌ അവൻ ജോലി ചെയ്യുന്നത്. അവൻ ജോലി ചെയ്യുന്ന ഹോട്ടൽ മുറികളിൽ ആരും അറിയാതെ അവൻ ക്യാമറകൾ സ്ഥാപിച്ചിട്ടുണ്ട്. അൽപ്പം ദുരൂഹമായ കാര്യമായി തോന്നുമെങ്കിലും മറ്റുള്ളവർ സംസാരിക്കുമ്പോൾ അവന് അതിനോട് യഥാർത്ഥ രീതിയിൽ പ്രതികരിക്കാൻ കഴിയുന്നില്ല. പകരം അവൻ ക്യാമറയിൽ പതിയുന്ന സംഭാഷണ ശകലങ്ങളോട് പ്രതികരിച്ചു കൊണ്ട് ആ സമയം അവൻ പറയാൻ സാധിക്കാതിരുന്ന കാര്യങ്ങൾ പറഞ്ഞു പരിശീലിക്കും.

 അങ്ങനെ ഇരിക്കെ അവന്റെ ക്യാമറയിലൂടെ ഹോട്ടലിൽ നടക്കുന്ന ഒരു കൊലപാതകം അവൻ കാണുന്നു. കൊലപാതകി ആരാണെന്ന് വ്യക്തം അല്ലായിരുന്നെങ്കിലും കൊലപാതകം നടക്കുന്ന സമയം അവൻ അവിടെ എത്തുന്നു. സ്വാഭാവികമായും അവൻ പോലീസിന്റെ മുന്നിൽ പ്രതി ആയി സംശയിക്കപ്പെടുന്നു. പക്ഷെ യഥാർത്ഥ സംഭവങ്ങൾ അവന് പോലീസിനോട് പറയാനും സാധിക്കുന്നില്ല. ഇങ്ങനെ ഇരിക്കുമ്പോൾ ആണ്‌ അവൻ ജോലി ചെയ്യുന്ന ഹോട്ടലിൽ മറ്റൊരു യുവതി വരുന്നത്. പിന്നീട് എന്ത് സംഭവിച്ചു എന്നതാണ് കഥ.

   സിനിമയുടെ കഥ synopsis നല്ല താൽപ്പര്യം ഉളവാക്കുന്നത് ആണെങ്കിലും വളരെ സാവധാനത്തിൽ ഉള്ള അവതരണം ആണ്‌ സിനിമയ്ക്ക് ഉണ്ടായിരുന്നു. ബാർട്ടും അമ്മയും തമ്മിൽ ഉള്ള ബന്ധമൊക്കെ ചെറിയ സമയം മാത്രേ ഉള്ളായിരുന്നു എങ്കിലും നല്ല touching ആയിരുന്നു. പക്ഷെ സിനിമയുടെ കഥയിൽ ഇനി എന്താണെന്ന് ഉള്ള ആകാംക്ഷയിൽ ഇരുന്നു കാണുമ്പോൾ സിനിമയുടെ പതിയെ പോക്ക് നല്ല ബോർ ആയി മാറുന്നുണ്ട്. കഥയിൽ ഉള്ള അവസാന ട്വിസ്റ്റ് ഒക്കെ അത്തരത്തിൽ ഒരു അവതരണ രീതിയിൽ വലിയ impact ഉണ്ടാക്കുന്നും ഇല്ല.

മൊത്തത്തിൽ ശരാശരി സിനിമാനുഭവം ആയി മാറി The Night Clerk. കഥയുടെ synopsis ൽ കിട്ടിയ രസം അതിൽ ഉണ്ടായില്ല.

Download Link:t.me/mhviews1

 സിനിമ കാണണം എന്ന് ആഗ്രഹം ഉള്ളവർക്ക് www.movieholicviews.blogspot.com ൽ ലിങ്ക് ലഭിക്കും.

1547. Confess, Fletch (English, 2022)

 1547. Confess, Fletch (English, 2022)

         Comedy, Crime

  Confess, Fletch കണ്ട് തുടങ്ങിയപ്പോൾ മനസ്സിൽ വന്നത് 'മൈ ഡിയർ റോങ് nambar' എന്ന സിനിമ ആയിരുന്നു. കഥ അത് പോലെ ആണെന്നല്ല ഉദ്ദേശിച്ചത്. ചെറിയ സാമ്യം പോലെ തോന്നി എന്നതാണ്. അത് പോലെ ചെറിയ തമാശകൾ ഓക്കെ ആയിട്ടാണ് സിനിമ അവതരിപ്പിച്ചിരിക്കുന്നതും.

താൻ താമസിക്കുന്ന വീട്ടിൽ കണ്ടെത്തിയ അജ്ഞാത യുവതിയുടെ മൃതദേഹത്തെ കുറിച്ച് ഫ്ലച് തന്നെയാണ് പോലീസിനെ വിളിച്ചു അറിയിക്കുന്നത്. എന്നാൽ അവിടെ എത്തിയ പോലീസ് കൊലപാതകം എന്ന് സംശയിക്കുന്ന ആ സംഭവത്തിലെ മുഖ്യ പ്രതി  ഫ്ലച്ച് തന്നെ ആണെന്ന് വിശ്വസിക്കുന്നു. ഫ്രീലാൻസ് ജർണലിസ്റ്റ് എന്ന് സ്വയം പരിചയപ്പെടുത്തിയ ഫ്ലച്ച് ലോകത്തിലെ അപൂർവമായ ചിത്ര ശേഖരം ഉള്ള കോടീശ്വരന്റെ മകളുടെ കാമുകനും ആണ്‌. പോലീസ് ഫ്ലച്ചിനോട് കുറ്റം ഏറ്റ് പറയാൻ ആവശ്യപ്പെടുന്നു. എന്നാൽ അയാൾ അതിനു തയ്യാറാകുന്നില്ല.പോലീസ് ഫ്ലച്ചിന്റെ പുറകെ ആണെന്ന് മനസ്സിലാക്കിയപ്പോൾ അയാൾ തന്നെ ആ യുവതിയുടെ കൊലപാതകത്തിന്റെ പിന്നിൽ ഉള്ള രഹസ്യം കണ്ട് പിടിക്കാൻ ഇറങ്ങി.എന്താണ് ആ രഹസ്യം എന്നതാണ് ചിത്രത്തിന്റെ ബാക്കി ഉള്ള കഥ. ചെറിയ ഒരു tail - end ഒക്കെ ട്വിസ്റ്റ് രൂപത്തിൽ നൽകി സിനിമ അവസാനിക്കുന്നു.

 ഗ്രിഗറി മക്ഡോണാൾഡിന്റെ ഇതേ പേരിൽ ഉള്ള നോവലിനെ ആധാരം ആക്കി അവതരിപ്പിച്ച നോവലിനെ ആസ്പദം ആക്കിയുള്ള മൂന്നാമത്തെ ചിത്രമാണ് Confess, Fletch.  Fletch, Fletch Lives എന്നിവ ആയിരുന്നു ആദ്യ രണ്ട് ഭാഗങ്ങൾ. 30 വർഷങ്ങൾക്കു ശേഷമാണു ഫ്ലച്ച് പരമ്പരയിലെ മൂന്നാമത്തെ സിനിമ വരുന്നത്. അമേരിക്കൻ പോപ് - കൾച്ചറിൽ ഫ്ലച്ചിന് ആരാധകർ ഉള്ളത് ആണ്‌. ആദ്യ രണ്ട് ഭാഗങ്ങൾ ഞാൻ കണ്ടിട്ടും ഇല്ല. പക്ഷെ സിനിമകളുടെ പേര് നേരത്തെ കേട്ടിട്ടുണ്ട്.

  എന്നെ സംബന്ധിച്ച് ശരാശരി ചിത്രമായി ആണ്‌ Confess, Fletch തോന്നിയത്. മോശം ആണെന്നുള്ള അഭിപ്രായമില്ല. പക്ഷെ ഫ്ലച്ച് എന്ന കഥാപാത്രത്തെ കുറിച്ച് ഉള്ള പരിചയമില്ലായ്മ കാരണം ആ കഥാപാത്രത്തിന്റെ വൈബ് മനസ്സിലാക്കാൻ കഴിഞ്ഞില്ല എന്ന് വിശ്വസിക്കുന്നു. ഫ്ലച്ചിന്റെ ആരാധകർ ആരെങ്കിലും കണ്ടിട്ട് അഭിപ്രായം പറയുമെന്ന് കരുതുന്നു. പ്രേക്ഷകരുടെ ഇടയിൽ തരക്കേടില്ലാത്ത അഭിപ്രായം നേടിയ ചിത്രമാണ് Confess, Fletch.

Telegram Link: t.me/mhviews1

സിനിമയുടെ ലിങ്കിനു www.movieholicviews.blogspot.com സന്ദർശിക്കുക.

  

1546. The Little Things ( English, 2021)

 1546. The Little Things ( English, 2021)

          Crime, Drama: Streaming on Netflix 

   1990 ൽ ലോസ് ഏഞ്ചൽസിൽ തുടരെ തുടരെ നടക്കുന്ന കുറച്ചു കൊലപാതകങ്ങൾ. അതിന്റെ അന്വേഷണം നടക്കുന്ന സമയമാണ് അവിടെ ഉണ്ടായിരുന്ന മുൻ കുറ്റാന്വേഷകൻ ആയ ഡീക് മറ്റൊരു കേസിനോട് അനുബന്ധിച്ചുള്ള കാര്യങ്ങൾക്കായി മറ്റൊരു സ്ഥലത്തു നിന്നും വരുന്നത്. തന്റെ ജീവിതത്തിൽ നല്ലതും, അതിനൊപ്പം മോശം ഓർമകളും നൽകിയ സ്ഥലമാണ് ലോസ് ഏഞ്ചൽസ്. അഞ്ചു വർഷങ്ങൾക്കു മുന്നേ നടന്ന കൊലപാതക പരമ്പര അയാൾക്ക്‌ ഏൽപ്പിച്ച ആഘാതം അത്രയുമായിരുന്നു.

 ഇപ്പോൾ ഡീക്കിന്റെ പദവിയിൽ ഉള്ള ജിം ബാക്സ്റ്റർ ആണ്‌ കേസ് അന്വേഷണം നടത്തുന്നത്. അവിചാരിതമായി ആണ്‌ ഡീക് ആ കേസിന്റെ ഭാഗം ആയി മാറുന്നത്. കൂടുതൽ സങ്കീർണം ആയി കേസ് മാറുകയാണ് ഇതിന്റെ ഇടയിൽ. ഈ സമയം അവരുടെ മുന്നിൽ സംശയത്തിന്റെ മുന്നിൽ ഒരാളുണ്ട്. പ്രതിയാണെന്ന് തെളിയിക്കാൻ വ്യക്തമായ തെളിവുകൾ ഇല്ലെങ്കിലും അയാളാണ് പ്രതി എന്ന് വിശ്വസിക്കാവുന്ന തോന്നൽ ഉണ്ടാക്കുന്ന ഒരാൾ. അയാൾ ആണോ യഥാർത്ഥത്തിൽ ഈ കൊലപാതകങ്ങൾക്ക് പിന്നിൽ? അതോ?

  സിനിമയുടെ ക്ലൈമാക്സ്‌ കഴിയുമ്പോൾ ആദ്യ കാഴ്ചയിൽ പ്രതി ആരാണെന്ന് പ്രേക്ഷകന് കണ്ടെത്താൻ കഴിയും എന്ന് വിചാരിക്കും. പക്ഷെ മറ്റൊരു രീതിയിൽ അതിനു എതിരായി കണക്കാക്കാവുന്ന കാര്യങ്ങളും സിനിമയിൽ ഉണ്ട്. Ambiguous ആയ കഥാന്ത്യം ആണ്‌ ചിത്രത്തിന് ഉള്ളത്. അത്തരം ഒരു തോന്നൽ ഉണ്ടാക്കാൻ അവസാന സീനിൽ വരെ ഈ ചിത്രത്തിന് കഴിയുന്നുണ്ട്.

തന്റെ തന്നെ രീതിയിൽ പോകുമായിരുന്ന മറ്റൊരാളുടെ ജീവിതത്തെ രക്ഷിക്കാൻ ശ്രമിക്കുന്ന മറ്റൊരു കഥാപാത്രത്തിന്റെ പങ്ക് കൂടി ആകുമ്പോൾ കൂടുതൽ സങ്കീർണമാകും സിനിമ. നല്ല അഭിനേതാക്കൾ ആണ്‌ ചിത്രത്തിന് ഉള്ളത്. ഡെൻസൽ വാഷിംഗ്ട്ടൻ,റമി മാലേക്, ജാർഡ് ലെറ്റോ തുടങ്ങിയവരുടെ മികച്ച പ്രകടനം ആണ്‌ ചിത്രത്തിന്റെ ജീവൻ. ചിത്രം ഒരു സ്ലോ ബേർണർ ആണ്‌. രണ്ട് മണിക്കൂറിൽ അൽപ്പം കൂടി ദൈർഘ്യമുള്ള സിനിമ ആണെങ്കിൽ കൂടിയും കഥ പ്രേക്ഷകനെ പിടിച്ചിരുത്തുന്നുണ്ട്. കഥാപത്രങ്ങൾ എസ്റ്റാബ്ലിഷ് ആയതിനു ശേഷം പ്രേക്ഷകനിലേക്ക് സിനിമയുടെ ഓരോ ലെയർ ആയി മുന്നിൽ എത്തുകയാണ്. അവിടെയാണ് കഥയെ കുറിച്ച് പ്രേക്ഷകന്റെ ഭാവന തുറക്കുകയും ചെയ്യുന്നത്.

  സിനിമ കണ്ടതിനു ശേഷം കുറച്ചു വീഡിയോകൾ കണ്ടൂ. പലരും സിനിമയെ കുറിച്ച് സീനുകളിലൂടെ കഥ എങ്ങനെ ഒക്കെ ആകാം എന്ന് കാണിച്ചു തന്നപ്പോൾ സിനിമയുടെ ambiguity കൂടുതൽ വെളിവാക്കുകയും ചെയ്തു.സിനിമ കണ്ട് നോക്കൂ.

ഡൌൺലോഡ് ലിങ്ക് : t.me/mhviews1

 More movie suggestions & download link available @ www.movieholicviews.blogspot.com

1545. Cobra (Tamil, 2022)

 1545. Cobra (Tamil, 2022)

             സ്ക്കൂളിൽ Cos θ, Sin θ ഒക്കെ കണക്കിൽ പഠിക്കുന്നത് എന്തിനാണെന്ന് ചോദിക്കുന്നവരുണ്ട്.കണക്കിലെ പല കാര്യങ്ങളും നമ്മൾ  അറിയാതെ തന്നെ ജോലിയിലും ജീവിതത്തിലും ഉപയോഗിക്കാറുണ്ട്. ചുമ്മാ കണക്കു കൂട്ടുന്നത് മാത്രമല്ല കണക്ക്.അതിന്റെ പ്രായോഗിക വശം ആണ്‌ അതിന്റെ സൗന്ദര്യം എന്ന് ആരോ പറഞ്ഞത് ഓർക്കുന്നു. എന്നാൽ കണക്കിന് മറ്റൊരു ഉപയോഗവും ഉണ്ടായിരുന്നു. അത് മനസ്സിലാക്കിയ ഒരു വാടക കൊലയാളിയും .അതിനൊപ്പം അയാൾ വലിയ ഫാൻസി ഡ്രസ്സുകാരനും ആയിരുന്നു. നിന്ന നിൽപ്പിൽ ലുക്ക് മാറ്റുന്ന ആൾ.

            

ലോകത്തിൽ എവിടെയും പോയി കൊലപാതകങ്ങൾ നടത്തുക ആണ്‌ വാടക കൊലയാളി ആയ അയാൾ ചെയ്യുന്നത്.അപ്പോൾ അതൊക്കെ ആവശ്യം ഉള്ളതുമാണല്ലോ .പക്ഷെ ചില്ലറ കളിയൊന്നും അല്ല അയാൾ കളിക്കുന്നത് . കണക്കിന്റെ അനന്ത സാധ്യതകൾ ഉപയോഗിച്ച് നടത്തുന്ന, തലയിൽ അൽപ്പം വെളിച്ചം ഉള്ളവർക്ക് മാത്രം മനസ്സിലാകുന്ന രീതിയിൽ കൊലപാതകങ്ങൾ നടത്തുന്ന ഒരാൾ ആണയാൾ . രാമാനുജന്റെയും ശകുന്തളാ ദേവിയുടെയും നാട്ടിൽ പിറന്ന ഒരാൾക്ക്‌ ഇത്രയും എങ്കിലും ചെയ്യാൻ കഴിഞ്ഞില്ലെങ്കിൽ മാത്രേ അത്ഭുതപ്പെടാൻ ഉളളൂ.

  സിനിമയിൽ ഇതൊന്നും പറയുന്നില്ലെങ്കിലും അമ്മാതിരി ഒരു ബിൽഡപ്പിൽ ഇന്ത്യയിൽ നിന്നും ഒരു വാടക കൊലയാളി ആണ്‌ സിനിമയിലെ ഒരു മുഖ്യ കഥാപാത്രം . സംഭവം ഒക്കെ കിടിലം ആണ്‌. നമുക്ക് അത്ര കണക്കു അറിയില്ലെങ്കിലും എന്തൊക്കെയോ സംഭവം ഉണ്ട് എന്ന് തോന്നും. അങ്ങനെ കുറച്ചു കൊലപാതകങ്ങൾ ഒക്കെ കൊള്ളാമായിരുന്നു . അങ്ങനെ കൊലപാതകം ഒക്കെ ആയി പോകുമ്പോൾ ലോകത്തിലെ ഏതു ഇൻവെസ്റ്റിഗേഷൻ സംഘടനയും ഹാക്ക് ചെയ്യാൻ ചെയ്യാൻ കഴിയുന്ന ജോക്കറിന്റെ ഫോട്ടോ പോലെ ഒരെണ്ണം ഐ ഡി ആയി വച്ചിരിക്കുന്ന അജ്ഞാതനായ ഒരാൾ ഈ കൊലയാളിക്ക് എതിരെ വരുന്നു . അയാൾ ഇന്റർപ്പോൾ മുതൽ റഷ്യയിൽ വരെ ഈ കൊലയാളിയെ കുറിച്ച് വിവരം കൊടുക്കുന്നു, അതും അവരെ ഒക്കെ ഹാക്ക് ചെയ്തു കൊണ്ട് തന്നെ . പക്ഷെ ഒരു രക്ഷയും ഇല്ല. ഓരോ കൊലപാതകങ്ങൾ കഴിയുമ്പോഴും ഇവരൊക്കെ ചമ്മുന്നു. C++ പോലും അറിയാത്ത എന്നെ പോലുള്ളവർ അമ്പരപ്പോടെ  കാണുന്ന ഹാക്കിങ് രംഗങ്ങൾ.

  ഇപ്പോഴും വൻ സംഭവം ആയാണ് സിനിമ പോകുന്നത്. അന്താരാഷ്ട്ര ഡീൽസ് ആണ്‌ കൂടുതലും. എന്നാൽ പെട്ടെന്ന് സിനിമ ഇന്ത്യയിലേക്ക് മാറി. പിന്നെ അണ്ണൻ -തമ്പി പാസം, കുടുംബ ബന്ധങ്ങൾ, പ്രണയം, കാമുകി, ത്യാഗം ഒക്കെ ആയി വേറെ ലെവലിലേക്ക് സിനിമ മാറുകയാണ്. ഇതൊന്നും ഇല്ലാതെ എന്ത് തമിഴ് സിനിമ എന്ന് കരുതുന്ന സംവിധായകൻ ആണെന്ന് തോന്നുന്നു.

 

എന്നാൽ, 3 മണിക്കൂർ ഉള്ളത് കൊണ്ട് വേണമെങ്കിൽ ഇടയ്ക്കൊക്കെ ഉറങ്ങിയോ മൊബൈൽ നോക്കിയോ ഒക്കെ ടി വിയിൽ സിനിമ കണ്ട് തീർക്കാവുന്ന അവസ്ഥയാണ് പിന്നീട് ഉള്ളത്. ഇനി കൂടുതൽ ഒന്നും പറയുന്നില്ല. വലിയ ബിൽഡപ്പ് കൊടുത്തു എങ്ങും ആകാതെ പോയ ഒരു തമിഴ് ബോംബ് സിനിമയാണ് കോബ്ര.

 വിക്രവും ജയറാമും തിരിച്ചു വരവുകൾ കുറെയേറെ നടത്തേണ്ടി വരുമെന്നാണ് തോന്നുന്നത്. രണ്ട് പേരും എന്നെങ്കിലും ഒരു നല്ല സിനിമ ആയി തിരിച്ചു വരും എന്ന് കരുതിയിരിക്കുന്ന ഒരാളായത് കൊണ്ടാണ് അങ്ങനെ പറഞ്ഞത്. പക്ഷെ വിക്രത്തിന്റെ മഹാൻ  നല്ല സിനിമ ആയിരുന്നു.കിടിലം എന്നൊക്കെ പറയാവുന്ന ഒന്ന് ആയി തോന്നിയതും ആണ്‌.പക്ഷെ അങ്ങേരു വീണ്ടും പഴയ ഫോമിൽ എത്തിയിട്ടുണ്ട്.

ഇവന്മാരൊക്കെ ഇതു പോലത്തെ സിനിമയിലൊക്കെ ഇങ്ങനത്തെ വൈകാരിക സംഭവങ്ങളൊക്കെ എന്തിനാണോ ഇടിച്ചു കുത്തി കയറ്റുന്നത്? ചുമ്മാ ഒരു ക്യാറ്റ് & മൗസ് ഗെയിം ഒക്കെ ആണെങ്കിൽ പോലും കണ്ടിരിക്കാമായിരുന്നു എന്ന് തോന്നി. എന്നാൽ അതും ഉണ്ടായില്ല ഇവിടെ.

1544. Attention Please (Malayalam, 2022)

 1544. Attention Please (Malayalam, 2022)

          Streaming on Netflix

    പണ്ട് കോളേജിൽ പഠിച്ചിരുന്ന സമയം നഗർകോവിലിലെ SMRV യിൽ ആണെങ്കിലും മണവാളക്കുറിച്ചിയിൽ ആണെങ്കിലും പാതി രാത്രി ടെറസിന്റെ മുകളിൽ റൂമിൽ ഉള്ളവരെല്ലാം കൂടി ചെറിയ കലാപരിപാടികളും ആയി കുറെ കഥകളും ആയി ഇരിക്കുക പതിവായിരുന്നു. പ്രായത്തിന്റെതായ കഥകൾ, പിന്നെ കുറെ തള്ളൽ കഥകൾ അങ്ങനെ പലതും അത്തരം സദസ്സുകളെ കൊഴുപ്പിക്കുമായിരുന്നു.

  പക്ഷെ ഈ കഥകൾക്കും അപ്പുറം യഥാർത്ഥത്തിൽ സംഭവിച്ചിട്ടുണ്ടെന്ന രീതിയിൽ ഇടയ്ക്ക് വരുന്ന പ്രേത കഥകൾ, അല്ലെങ്കിൽ ഹൊററിന്റെ അതി പ്രസരം ഉള്ള കഥകൾ ഒക്കെ സ്ഥിരമായിരുന്നു. നന്ദി പറയേണ്ടത് കോളേജ് ഇരിക്കുന്ന വലിയ ക്യാമ്പസ്സിൽ ഉള്ള മരങ്ങളിലെ ആണികൾക്കും, അതിൽ ചുറ്റിയിരിക്കുന്ന ചുവന്ന തുണികൾക്കും ഒപ്പം മണവാളക്കുറിച്ചിയിൽ താമസിച്ചിരുന്ന വീടിന്റെ മുറ്റത്തു ഉള്ള, രാത്രിയിൽ മുല്ലപ്പൂവിന്റെ മണം വരുന്ന നാല് ശവക്കല്ലറകൾക്ക് കൂടി ആണ്‌. വല്ലാത്തൊരു അന്തരീക്ഷം ആയിരുന്നു അത്. പല സംഭവങ്ങൾ കാരണം വീടിന്റെ ഉടമസ്ഥർ സൗകര്യങ്ങൾ എല്ലാം ഉള്ള ആ വീട്ടിൽ താമസിക്കാതെ അപ്പുറത്ത് കുടിൽ കെട്ടി തമായിക്കുന്നു. അതും തുച്ഛമായ വാടകയ്ക്ക് വീട് ഞങ്ങൾക്ക് തന്നിട്ട്.

  ഇത്തരം സ്ഥലങ്ങളിലെ കഥകൾക്ക് എല്ലിന്റെ ഇടയിലേക്ക് പോലും ഒരു ചെറിയ തണുപ്പോടെ ഭീതി ഉളവാക്കാൻ സാധിക്കാറുണ്ട്. പറഞ്ഞു വന്നത് അറ്റൻഷൻ പ്ലീസ് എന്ന മലയാള സിനിമയെ കുറിച്ചാണ്. വളരെയധികം ഇത്തരം ഒരു അന്തരീക്ഷം ആവശ്യപ്പെടുന്ന സിനിമയാണ് അത്. താൻ സിനിമയ്ക്ക് വേണ്ടി എഴുതുന്ന കഥകൾ കൊള്ളില്ല എന്നു പറയുന്ന നാല് സുഹൃത്തുക്കൾക്ക് ഇടയിൽ ഹരി എന്ന യുവാവ് തന്റെ കഥകൾ അവതരിപ്പിക്കുന്ന രീതിയിൽ ആണ്‌ സിനിമ അവതരിപ്പിച്ചിരുന്നത്. നേരത്തെ പറഞ്ഞ ടെറസിലെ കഥകൾ പോലെ കഥകൾ ഓരോന്നായി വരുകയാണ്. അതിന്റെ ഒപ്പം അവിചാരിതമായി പലതും സംഭവിക്കുന്നു.

  തുടക്കത്തിൽ ഹൊറർ മാത്രം വിഷയമായി മാറിയെങ്കിലും പിന്നീട് ഈഗോ, തൊലിയുടെ നിറം, ജാതി, അതിജീവനം തുടങ്ങിയവയെല്ലാം വിഷയമായി മാറുന്നുണ്ട്. ഒരു പക്ഷെ മുഖ്യ കഥപാത്രത്തിന്റെ മാനസിക വ്യാപരങ്ങൾ എല്ലാം തന്നെ ആ കഥകളിൽ നിഴലിക്കുന്നുണ്ട്. അതിൽ നിന്നും ഹൊറർ ആയി ചിത്രം മാറുന്നത് മികച്ച അനുഭവം ആയിരുന്നു. പണ്ട് Get Out കണ്ടപ്പോൾ കിട്ടിയ ഒരു വൈബ് ഇവിടെയും ഉണ്ടായി. അവിടെ നിന്നും ഒരു പക്ഷെ പ്രതീക്ഷിക്കാവുന്ന ഒരു ക്ലൈമാക്സ്‌ ആയിരുന്നു ചിത്രത്തിന് വന്നതെങ്കിലും സിനിമയുടെ ഇനിയും മുന്നോട്ടു ഉള്ള കഥയെ കുറിച്ച് ചെറിയ രീതിയിൽ കൗതുകം തോന്നുകയും ചെയ്തു.

 അസാധ്യമായി ആണ്‌ ഹരി എന്ന കഥാപാത്രത്തെ വിഷ്ണു ഗോവിന്ദൻ അവതരിപ്പിച്ചത്. ചൊറി കൂട്ടുകാരിൽ മികച്ച ചൊറിയും ആയി ശ്രീജിത് അവതരിപ്പിച്ച ജിതിനും ആനന്ദ് അവതരിപ്പിച്ച അജിത്തും സിനിമയിൽ മുഖ്യ പങ്കു വഹിക്കുന്നുണ്ട്. സാധാരണ സിനിമ സങ്കൽപ്പങ്ങളിൽ നിന്നും വ്യത്യസ്തമായ അവതരണ ശൈലി ആണ്‌ ചിത്രത്തിന് ഉള്ളതു. കഥ എഴുതി സംവിധാനം ചെയ്ത ജിതിൻ ഐസക്ക് സിനിമയെ സമീപിച്ച രീതി നന്നായിരുന്നു.

 ചെറിയ സിനിമ ആണ്‌. OTT യിൽ കാണേണ്ട ആവശ്യം മാത്രമുള്ള സിനിമ. പക്ഷെ അവതരണ രീതി കൊണ്ട് മികച്ച മൂല്യം ഉള്ള ചിത്രം ആയി ആണ്‌ എനിക്ക് തോന്നിയത്. കണ്ട് നോക്കൂ.

1543. The Lovebirds (English, 2020)

 1543. The Lovebirds (English, 2020)

           Mystery, Comedy. Streaming on Netflix

നാല് വർഷം നീണ്ടു നിന്ന ദാമ്പത്യം അവസാനിപ്പിക്കാൻ ഉള്ള തീരുമാനത്തിലേക്ക് അടുക്കുന്ന ദമ്പതികളുടെ  അവിചാരിതമായി ഒരു കൊലപാതകത്തിന് സാക്ഷി ആകുന്നു.  അതിനു ശേഷം അത് ചെയ്ത കൊലയാളി അവരെ  പിന്തുടരാൻ തുടങ്ങുന്നു. അതോടെ ആ സംഭവം  അവരുടെ  ജീവൻ  മരണ പോരാട്ടം ആയി മാറുന്നു .അതിനോടു അനുബന്ധിച്ച് നടക്കുന്ന ക്യാറ്റ് & മൌസ് ഗെയിം ആണ് The Lovebirds  ന്റെ കഥ. അതിനോടൊപ്പം ഈ സംഭവങ്ങൾ എങ്ങനെ അവരുടെ രണ്ടു പേരുടെയും മുന്നോട്ടുളള ജീവിതത്തെ ബാധിച്ചു എന്നതും സിനിമയിൽ കാണാം.

വലിയ സംഭവം ഒന്നും അല്ല ചിത്രം. കുറച്ചു തമാശയും അതിന്റെ ഒപ്പം നടക്കുന്ന ചില സംഭവങ്ങളും ഒക്കെ ആയി ഒരു കൊച്ചു ചിത്രം എന്ന് പറയാം  The Lovebirds നെ കുറിച്ച്. മോശം സിനിമ ആണെന്നുള്ള അഭിപ്രായമൊന്നുമില്ല. വെറുതെ ഒരു പോപ്കോൺ ഫ്ലിക്ക് എന്ന് ധൈര്യമായി വിളിക്കാവുന്ന സിനിമയാണ് The Lovebirds. വെറുതെ ഇരുന്നു കാണാം.

  നല്ല ഒരു ടൈം പാസ് സിനിമ എന്ന് പറയാം Lovebirds നെ കുറിച്ച്.

1542. Fall (English, 2022)

 1542. Fall (English, 2022)

         Adventure, Survival- Thriller

 ഇതിലും മികച്ച survival - thriller സിനിമകൾ കണ്ടത് കൊണ്ട് ആകണം Fall വലിയ ഒരു സംഭവമായി തോന്നിയില്ല. പക്ഷെ ഇടയ്ക്ക് ഒക്കെ പടം നന്നായി പേടിപ്പിച്ചു. Acrophobia ഉള്ളത് കൊണ്ട് ഹണ്ടറും ബെക്കിയും റേഡിയോ ടവർ കയറുമ്പോൾ ഉള്ള പല സീനുകളും കാലിൽ നിന്നും മുകളിലേക്കു ഒരു പെരുപ്പ് ഉണ്ടാക്കി എന്നതാണ് സത്യം. ബ്രോഡ്കാസ്റ്റിങ് ഫീൽഡിൽ ജോലി ചെയ്യുന്നത് കൊണ്ട് ഇടയ്ക്ക് ടവർ maintenance ന് ആളുകൾ വന്നു ടവറിൽ കയറുമ്പോൾ താഴെ നിന്നു മുകളിലേക്കു നോക്കുമ്പോൾ പോലും തല കറങ്ങുന്ന അവസ്ഥയാണ് എനിക്ക് .

 സ്ഥിരമായി റേഡിയോ വാക്കി - ടോക്കി വഴി ടവർ കയറുന്നവരും ആയി ആശയവിനിമയം നടത്തുമ്പോഴും വെറുതെ എങ്ങാനും മുകളിലേക്കു നോക്കി സംസാരിച്ചാൽ പോലും തല കറങ്ങി നിലത്തു വീഴും എന്ന അവസ്ഥയിൽ നിൽക്കുന്ന എന്നെ സംബന്ധിച്ച് നല്ല പേടി ഉണ്ടാക്കുന്ന രംഗങ്ങൾ ആയിരുന്നു കഥാപാത്രങ്ങൾ മുകളിലേക്കു കയറുന്നതും പിന്നീട് അവർ മുകളിൽ എത്തിയതിനു ശേഷം താഴോട്ടു ഉള്ള കാഴ്ചകൾ കാണിക്കുന്ന രംഗങ്ങൾ എല്ലാം.

പക്ഷെ പൂർണമായും ചിത്രം സംതൃപ്തി നൽകിയില്ല എന്നൊരു പരാതി അതിനൊപ്പം ഉണ്ട്. മുകളിലും താഴെയും ഉള്ള കാഴ്ചകൾ നൽകിയ ഭീതിയ്ക്കു അപ്പുറം സിനിമ എന്ന നിലയിൽ വലിയ കാര്യം ഉള്ളതായി തോന്നിയില്ല Fall. അതിന്റെ ഇടയ്ക്ക് വന്ന അവിഹിത കഥ കൂടി ആകുമ്പോൾ സിനിമ അത്ര ഇഷ്ടപ്പെട്ടില്ല.

  ഇതിലും നല്ല survival thrillers പലതും ഉണ്ട്. പക്ഷെ ഈ ഒരു ചിത്രത്തിന് കിട്ടിയ ഹൈപ്പ് വളരെ അധികമായിരുന്നു. അത് കൊണ്ട് തന്നെ ആവശ്യമില്ലാതെ കൂടുതൽ പ്രതീക്ഷിച്ചതു കൊണ്ട് കൂടി ആകാം സിനിമ കണ്ട് കഴിഞ്ഞപ്പോൾ ഉണ്ടായ ഈ അവസ്ഥ. മോശം സിനിമ ആണെന്നുള്ള അഭിപ്രായം ഇല്ല. പക്ഷെ മൊത്തത്തിൽ ഒരു തൃപ്തി കിട്ടിയില്ല.

1541. The Black Phone (English, 2022)

 1541. The Black Phone (English, 2022)

          Thriller, Supernatural Horror

 1978 ൽ അമേരിക്കയിലെ ഡെൻവറിൽ കുട്ടികളെ തട്ടി കൊണ്ട് പോകുന്ന അജ്ഞാതനായ, 'ദി ഗ്രാബർ ' എന്ന വിളിപ്പേരിൽ അറിയപ്പെടുന്ന ആൾ ആ ഭാഗങ്ങളിൽ ഭീതി നിറച്ചു. സ്റ്റീഫൻ കിങ്ങിന്റെ മകനായ ജോ ഹില്ലിന്റെ തൂലികയിൽ വിരിഞ്ഞ ചെറു കഥയാണ് ഈ സിനിമയ്ക്ക് ആധാരമാക്കിയിരിക്കുന്നത്. സൂപ്പർ നാച്ചുറൽ ഹൊറർ ത്രില്ലർ വിഭാഗത്തിൽ ഉൾപ്പെടുത്താവുന്ന സിനിമ ആ വിഭാഗത്തിനോട് നീതി പുലർത്തിയിട്ടുമുണ്ട്.

  സിനിമ ആവശ്യപ്പെടുന്ന പതിഞ്ഞ താളത്തിൽ, കുട്ടികളുടേതായ ഭയവും, അരക്ഷിതാവസ്ഥയും സിനിമയിൽ ഉടന്നീളം കാണാം. തന്റെ സ്വപ്നങ്ങളിൽ ' ദി ഗ്രാബറിനെ ' കാണുന്ന ഗ്വൻ എന്ന പെൺകുട്ടി. അവളുടെ അസാധാരണമായ, തട്ടി കൊണ്ട് പോക്കലുകളെ കുറിച്ചുള്ള അറിവുകൾ പോലീസ് ശ്രദ്ധിക്കുന്നുണ്ട്. എന്നാൽ അവളുടെ പിതാവിന് അതിൽ അത്ര താൽപ്പര്യം ഇല്ലായിരുന്നു. അതിനു അയാളുടേതായ കാരണങ്ങളും ഉണ്ടായിരുന്നു.

  ആ സമയമാണ് അവളുടെ സഹോദരനായ ഫിന്നിനെ കാണാതെ ആകുന്നത്. അജ്ഞാതമായ ഒരു സ്ഥലത്തു അകപ്പെട്ട അവനും പലതരത്തിൽ ഉള്ള ശബ്ദങ്ങൾ കേൾക്കുകയാണ്. അവൻ കാണാത്തവരും കണ്ടിട്ട് ഉള്ളവരും. അടയ്ക്കപ്പെട്ട നിലയിൽ ജീവിക്കുന്ന അവനു അതി ജീവനത്തിന് ഉള്ള വഴികൾ ആണ്‌ ആ ശബ്ദങ്ങളിലൂടെ ലഭിക്കുന്നത്.

സിനിമയിൽ ചുവരിൽ തൂങ്ങി കിടക്കുന്ന കറുത്ത നിറത്തിൽ ഉള്ള ഒരു ലാൻഡ് ഫോണിന് വളരെയധികം പ്രാധാന്യമുണ്ട്.മൊബൈൽ ഫോണുകൾ ഇല്ലാത്ത ഒരു കാലഘട്ടത്തിൽ നഫാക്കുന്ന കഥ ആയതു കൊണ്ട് ആണ്‌ സിനിമയിൽ ഉള്ള ഭൂരിഭാഗം കാര്യങ്ങളും നടക്കുന്നത്. ഇക്കാലത്തു ഉള്ള ചിത്രം ആയിരുന്നെങ്കിൽ ഒരു പക്ഷെ ആ ഭാഗം എങ്ങനെ ആകും അവതരിക്കപ്പെടുക എന്ന് വേണമെങ്കിൽ ചിന്തിക്കാം.

 ആരാണ് ഗ്രാബർ എന്ന് ഉള്ളതിന് പ്രസക്തി സിനിമയിൽ ഇല്ല. കാരണം ഇതു അവതരിപ്പിച്ചിരിക്കുന്ന ഹൊററിൽ, അതിൽ തന്നെ ബാധിക്കപ്പെട്ട കുട്ടികളിൽ ഉണ്ടാകുന്ന മാനസിക വ്യാപരങ്ങളിലൂടെ ആണ്‌ സിനിമ മുന്നോട്ടു പോകുന്നത് . 'ദി ഗ്രാബർ ' എന്ന കഥാപാത്രം ചെയ്യാൻ ഈതൻ ഹോക്കിനെ പ്രേരിപ്പിച്ചത് ആ കഥാപാത്രത്തിന്റെ തീവ്രത കൂടി കാരണം ആയിരിക്കും.

  സിനിമയുടെ കഥ ആണ്‌ ഇവിടെ പ്രധാനം. നേരത്തെ പറഞ്ഞത് പോലെ പതിഞ്ഞ താളത്തിൽ ആണ്‌ സിനിമ പോകുന്നത്.സിനിമ ആസ്വാദകർക്കു ഇഷ്ടപ്പെടാവുന്ന ഒരു ചിത്രം തന്നെയാണ് 'ദി ബ്ളാക്ക് ഫോൺ '

സിനിമയുടെ ഡൌൺലോഡ് ലിങ്കിന്  t.me/mhviews1 ലേക്ക് പോവുക.

  

1540. Makal (Malayalam, 2022)

1540. Makal (Malayalam, 2022)

        പഴയ വീഞ്ഞ് പുതിയ കുപ്പിയിൽ ഇറക്കാൻ നോക്കിയതാണ്. പക്ഷെ ഒട്ടും വീര്യം ഉണ്ടായില്ല. അതാണ്‌ മകൾ എന്ന സത്യൻ അന്തിക്കാട് സിനിമയുടെ അവസ്ഥ. ജയറാം തിരിച്ചു വരവ് കിങ് ആയി തന്നെ തുടരും എന്ന് തോന്നുന്നു. അദ്ദേഹത്തിന്റെ കണ്ണൻ താമരക്കുളം സിനിമകളുടെ ഫാൻ എന്ന നിലയിൽ പറയുകയാണ് അതാണ്‌ ഇതിലും ഭേദം. വെറും സീരിയൽ നിലവാരം ഉള്ള കഥ. കയ്യിൽ ഉള്ള കഥ അങ്ങനെയാണ് എന്നാൽ അതിനെ എങ്ങനെ ഒക്കെ മികച്ചതാക്കാം എന്ന് നോക്കാതെ ഒരു സീരിയൽ പോലെ എടുത്തു വച്ചിരിക്കുന്നു.

        മലയാളത്തിലെ എക്കാലത്തെയും മികച്ച സംവിധായകരിൽ ഒരാളുടെ സിനിമയ്ക്ക് ആണ്‌ ഈ അവസ്ഥ എന്ന് ഓർക്കണം. നസ്ലൻ മാത്രമാണ് സിനിമയിൽ അൽപ്പം എങ്കിലും രസകരമായ ഒരു കഥാപാത്രം അവതരിപ്പിച്ചത്.ആളുടെ കഥാഭാഗം ഒരു രസികൻ സ്കിറ്റ് പോലെ കണ്ടിരിക്കാമായിരുന്നു.

        ടി വി ചാനലുകളിലെ സീരിയലുകൾക്ക് ഈ ടൈപ്പ് കഥ ഒക്കെ വർക്ക്‌ ഔട്ട് ആകുമായിരിക്കും.സിനിമ എന്ന നിലയിൽ ചുരുക്കം ചില രംഗങ്ങൾ അല്ലാതെ ഒട്ടും entertain ചെയ്തില്ല. ഇത്തരം സിനിമകൾക്ക് ഇപ്പോൾ തിയറ്ററിൽ കാണാൻ ഉള്ള സ്കോപ് ഒന്നും ഇല്ലെങ്കിലും ചിലപ്പോഴൊക്കെ OTT യിൽ എങ്കിലും നന്നായിരിക്കും. എന്നാൽ ഇവിടെ അവസ്ഥ ദയനീയം തന്നെ ആയിരുന്നു.

 തൊണ്ണൂറുകളിൽ നിന്നും വണ്ടി കിട്ടാത്ത കഥയും കൂടി ആകുമ്പോൾ ശുഭം. തീരെ ഇഷ്ടപ്പെട്ടില്ല. പിന്നെ മലയാളത്തിലെ വൈകുന്നേരം ഉള്ള സീരിയലുകളുടെ കട്ട ഫാൻസിനു കണ്ട് നോക്കാൻ ഉള്ളത് ഉണ്ട്.

1539. Thallumaala ( Malayalam, 2022)

 1539. Thallumaala ( Malayalam, 2022)

          Streaming on Netflix

 അടി - ഇടി പടങ്ങൾ എക്കാലത്തെയും എന്റെ ഇഷ്ട സിനിമ വിഭാഗം ആണ്‌. അത് കൊണ്ട് തന്നെ തല്ലുമാല OTT വന്നപ്പോൾ വലിയ പ്രതീക്ഷയോടെ ആണ്‌ കാണാൻ ഇരുന്നതും. പ്രതീക്ഷിച്ച പോലെ തന്നെ നല്ല തല്ല്. തല്ലിന്റെ സമയം ഉള്ള പാട്ടൊക്കെ അടിപൊളി. നല്ല കിടിലൻ വൈബ്.കുറച്ചു കഴിഞ്ഞു സിനിമ പകുതി ആയി. അപ്പോഴും തല്ല് തന്നെ തല്ലു. തല്ലുണ്ടാക്കുന്നത് ഒരു ജോലി ആയി എടുത്ത കേരളത്തിലെ കുറെ യുവാക്കൾ. അടിപൊളി ജീവിതം. ഇതു പോലൊരു ജീവിതം കിട്ടാത്തതിൽ നിരാശ തോന്നിയ നിമിഷങ്ങൾ.

പിന്നെ കുറേക്കൂടി കഴിഞ്ഞപ്പോൾ അപ്പോഴുണ് തല്ലു. ഈ തല്ലിന്റെ ഇടയ്ക്ക് അവരുടെ ജീവിതം കണ്ട് അസൂയ തോന്നി ആണ്‌ എന്ന് തോന്നുന്നു ഞാൻ ഉറങ്ങിയും പോയി. ഇടയ്ക്ക് എഴുന്നേറ്റപ്പോൾ ടി വിയിൽ ഒന്ന് rewind അടിച്ചു വീണ്ടും കണ്ടു സിനിമ.അപ്പോഴേക്കും പല പല ഹെയർ സ്റ്റൈൽ മാറ്റി പരീക്ഷിച്ചിട്ടും തല്ലുണ്ടാക്കുന്നതിൽ പുത്തൻ പരീക്ഷണങ്ങൾ നടത്തുന്ന വസീം എന്ന കേന്ദ്ര കഥാപാത്രത്തെ ആണ്‌ കാണാൻ കഴിഞ്ഞത്. അത്രയും വലിയ ഭ്രാന്തു ഇല്ലാത്തതു കൊണ്ട് കൂടി ആകും സിനിമയുടെ ഇടയ്ക്ക് ഞാൻ ഉറങ്ങി പോയതും.

  

   സത്യം പറഞ്ഞാൽ ഞാൻ ആദ്യം പറഞ്ഞ ഇഷ്ട സിനിമ വിഭാഗത്തിൽ ഉറപ്പായും ഉൾപ്പെടുത്താവുന്ന, കളർഫുൾ ആയ ഒരു സിനിമ ഒരു പക്ഷെ ഈ തല്ല് ഓവർ ആയി പോയത് കൊണ്ട് ബോറൻ അനുഭവം ആയി മാറിയത് പോലെ ആയിരുന്നു. തിയറ്ററിൽ സിനിമ കണ്ട് ആസ്വദിച്ചവർ, അല്ലാതെ ചെറിയ സ്‌ക്രീനിൽ വീട്ടിൽ ഇരുന്നു ആസ്വദിച്ചവർ എന്നിവർക്ക് ഇഷ്ടപ്പെട്ടത് എങ്ങനെ ആണ്‌ എന്ന് സംശയവും ഇല്ല. അതിനുള്ളത് ഉള്ളത് കൊണ്ടല്ലേ അവർക്കു ഇഷ്ടപ്പെട്ടത്.എന്തോ എന്നെ എന്റെർറ്റൈൻ ചെയ്തില്ല എന്ന് മാത്രം.

  നോൺ ലീനിയർ നരേഷൻ ഉള്ള ചിത്രം ഒരു പക്ഷെ വലിയ സ്‌ക്രീനിലേക്ക് വേണ്ടി ഉള്ളതായിരിക്കും എന്ന് തോന്നി. എനിക്ക് 65 ഇഞ്ച് ടി വി സ്‌ക്രീനിൽ അത്തരത്തിൽ ഒരു വൈബ് കിട്ടിയതും ഇല്ല. എന്തായാലും വലിയ ഹിറ്റ് ആയ ഒരു സിനിമയുടെ OTT കാഴ്ച നിരാശ ആണ്‌ തന്നത്. അത് കൊണ്ട് തന്നെ സിനിമയെ കുറിച്ച് അധികം ഒന്നും പറയുന്നില്ല.

  

 അധികം ആയാൽ അമൃതും വിഷം ആണല്ലോ അല്ലെ? അതാണ്‌ തല്ലു  'കൂടി' പോയ തല്ലു മാലയെ കുറിച്ചുള്ള അഭിപ്രായം.

മൊത്തത്തിൽ സിനിമ എനിക്ക് അനുഭവപ്പെട്ടത് വീഡിയോ ഫിൽറ്റർ  ഇട്ട   കുറെ മ്യൂസിക്കും കുറെ ഇടിയും അടിയും ഉള്ള റീൽസ് പോലെ ആയിരുന്നു. അതാണല്ലോ ഇപ്പൊ ട്രെൻഡ്. ഫേസ്ബുക്കിൽ കിടക്കുന്ന ഔട്ട്‌ഡേറ്റഡ് ആയ എനിക്ക് മനസ്സിലാക്കാത്ത സിനിമ ആയി മാറി തല്ലുമാല 

1538. Nna, Thaan Case Kodu (Malayalam, 2022)

 1538. Nna, Thaan Case Kodu (Malayalam, 2022)

         Streaming on Hotstar

         

   ഈ അടുത്ത് കണ്ടതിൽ ഏറ്റവും ഇഷ്ടമായ മലയാളം സിനിമയാണ് ന്നാ, താൻ കേസ് കൊട്. സിനിമയിലെ പ്രധാനപ്പെട്ട വിഭാഗങ്ങളിൽ പലതും സിനിമ തൊട്ടു പോകുന്നുണ്ട്. പ്രണയം, കോമഡി,ക്രൈം, ത്രിൽ, സോഷ്യൽ കമന്ററി, രാഷ്ട്രീയം തുടങ്ങി പലതും ഈ കഥയുടെ ചുറ്റുപ്പാടിൽ തന്നെ കാണുവാൻ സാധിക്കും.ഇതെല്ലാം കഥയിലേക്ക് സന്നിവേശിപ്പിച്ച രീതി ആണ്‌ സിനിമയുടെ പ്രധാന ഹൈ ലൈറ്റ് ആയി തോന്നിയതും.പല ലെയറുകൾ ഉള്ള ചിത്രമായി തോന്നി.

  ഒരു ചെറിയ സംഭവം എങ്ങനെ എല്ലാം വികസിച്ചു പോയി എന്നതാണ് കഥ. ഒരു മതിൽ ചാട്ടത്തിൽ നിന്നും, അതിന്റെ root - cause ലേക്ക് കഥയുടെ ശ്രദ്ധ തിരിയുന്നതോടെ കഥാപാത്രങ്ങൾക്ക് വന്ന മാറ്റവും നന്നായിരുന്നു.സിനിമയുടെ പിന്നിലെ  ക്രിയേറ്റീവ് ടീം തീർച്ചയായും അഭിനന്ദനം അർഹിക്കുന്നു.

  

 എനിക്ക് ഏറ്റവും ഇഷ്ടപ്പെട്ടത് കഥാഗതി ആയിരുന്നു. പ്രവചനത്തിനും അപ്പുറം ആയിരുന്നു പല സംഭവങ്ങളും. അതിനൊപ്പം ചില കോടതി സീനുകളിൽ സംഭാഷണങ്ങൾക്ക് ഒരു മാസ് പരിവേഷം നൽകാൻ ബി ജീ എമ്മിന് സാധിച്ചു . ഒരു സാധാരണ 'പ്രകൃതി 'പടം ആണെന്ന് കരുതി, വൈറൽ ആയ പാട്ടിന്റെയും ഡാൻസിന്റെയും ചുവടു പിടിച്ചു ഹിറ്റ് ആയി എന്ന് കരുതി തിയറ്ററിൽ പോകാതെ OTT റിലീസിന് കാത്തിരുന്ന എനിക്ക് ആ ഒരു കാര്യത്തിൽ നിരാശ തോന്നി. തിയറ്ററിൽ തന്നെ കാണാമായിരുന്നു എന്ന് സിനിമ കഴിഞ്ഞപ്പോൾ തോന്നി.

 സിനിമ കാണാത്തവർ ചുരുക്കം ആയിരിക്കും. കണ്ടില്ലെങ്കിൽ കണ്ടോളൂ.

 ഇനി OTT യിൽ സിനിമ കണ്ട് ഇഷ്ടം ആയില്ലേൽ പറയാൻ ഒന്നേ ഉളളൂ.

 ന്നാ, താൻ കേസ് കൊട്!!

1537. The Bad Seed (English, 2018)

 1537. The Bad Seed (English, 2018)

         Drama/Horror

  Orphan സിനിമയിലെ എസ്തറിനെ സിനിമ കണ്ടവർ ആരും മറക്കില്ല. അത് പോലെ മറ്റൊരു കഥാപാത്രം ആണ്‌ The Bad Seed ലെ എമ ഗ്രോസ്മാനും. എസ്തർ അവളുടെ പ്രായത്തിന്റെ കണക്കിൽ എല്ലാവരെയും പറ്റിച്ച് ക്രൂരതയുടെ മുഖം ആയെങ്കിൽ ഇവിടെ ഒമ്പതു വയസ്സുകാരി ആയ എമയുടെ പ്രവൃത്തികളിൽ, അവളുടെ പ്രായത്തിനും അപ്പുറം ഉള്ള ക്രൂരത ആണ്‌ ഒളിഞ്ഞിരിക്കുന്നത്. അമ്മ ഇല്ലാതെ വളർന്ന കുഞ്ഞായത് കൊണ്ട് തന്നെ അവളുടെ അച്ഛൻ ഡേവിഡ് നൽകിയ സ്നേഹത്തിനും അപ്പുറം അവളുടെ ചില ഇഷ്ടങ്ങൾ ഉണ്ടായിരുന്നു.

  അത് നേടിയെടുക്കാൻ അവൾ സഞ്ചരിച്ച വഴികൾ ആണ്‌ ഈ സിനിമയിലെ ഹൊറർ എന്ന് പറയുന്നത്. വളരെ ക്രൂരമായി ഒരു കുട്ടി തന്നെയാണോ ഇതൊക്കെ ചെയ്യുന്നത് എന്ന് പ്രേക്ഷകനെ കൊണ്ട് ചോദിപ്പിക്കുന്ന രീതിയിൽ ഉള്ള ക്രൂരത ആയിരുന്നു പലപ്പോഴും. സിനിമയുടെ പേരിൽ തന്നെ ഈ പറഞ്ഞ കഥയുണ്ട്. പക്ഷെ അവൾ എന്തൊക്കെ ആണ്‌ ചെയ്തതെന്ന് വിശദമായി അറിയാൻ സിനിമ കാണുക തന്നെ വേണം.എന്നിട്ട് വിലയിരുത്തണം.

  വില്യം മാർച്ചിന്റെ നോവലിനെ ആസ്പദം ആക്കി 1956 ലും 1985 ലും സിനിമ വന്നിരുന്നു. Lifetime അവതരിപ്പിച്ച സിനിമ പതിപ്പ് ആണ്‌ 2018 ലുള്ളത്.Lifetime സിനിമകളിൽ ഏറ്റവും ഇഷ്ടം ആയതും ഈ ചിത്രമാണ് . സൈക്കോളജിക്കൽ ഹൊറർ എന്ന വിഭാഗത്തിൽ ഉൾപ്പെടുത്താവുന്ന മികച്ച ഒരു സിനിമയാണ് The Bad Seed. നേരത്തെ ഇറങ്ങിയ ഭാഗങ്ങൾ കണ്ടിട്ടില്ല എന്നതും ഒരു കാരണം ആണ്‌ . സിനിമയുടെ അമ്പിയൻസ് തന്നെ അത്തരത്തിൽ ഒരു ഫീൽ പ്രേക്ഷകന് നൽകുന്നുണ്ട്.

  Orphan സിനിമയുമായി ഒരു താരതമ്യം നടത്തിയത് കഥാപാത്രങ്ങൾ തമ്മിൽ ഉള്ള ഒരു ചെറിയ ബന്ധം കാണിക്കാൻ മാത്രമാണ്. Orphan ശരിക്കും മറ്റൊരു ലീഗ് ആണ്‌ സിനിമ വിഭാഗത്തിൽ എന്ന അഭിപ്രായക്കാരൻ ആണ്‌ ഞാൻ. അത് കൊണ്ട് അത്തരത്തിൽ ഉള്ള താരതമ്യത്തിനും അപ്പുറം 'കുട്ടി പിശാച് ' എന്ന് വിളിക്കാവുന്ന എമയുടെ കഥ വ്യത്യസ്തമാണ്.

  കണ്ട് നോക്കുക.

Telegram Link: t.me/mhviews1

സിനിമയുടെ download ലിങ്ക് www.movieholicviews.blogspot.com ൽ ലഭ്യമാണ്.

1536. Where The Crawdads Sing (English, 2022)

 

1536. Where The Crawdads Sing (English, 2022)
           Mystery.

കാതറിൻ  എന്നാണ് അവളുടെ യഥാർഥ പേര്. അവളെ അടുത്ത് അറിയാവുന്നവര് കായ എന്ന് വിളിച്ചു. എന്നാൽ ആ ചെറിയ പട്ടണത്തിൽ അവൾ  അറിയപ്പെട്ടിരുന്നത് 'ചതുപ്പ് നിലത്തിലെ പെൺക്കുട്ടി' എന്നായിരുന്നു.അവൾ താമസിച്ചിരുന്നത് കാടിന്റെ ഉള്ളിൽ ചതുപ്പ് നിലത്തിൽ ഉള്ള ഒരു വീട്ടിലായിരുന്നു. ജീവിതത്തിൽ പലപ്പോഴായി അവളുടെ പ്രിയപ്പെട്ടവർ അവളെ ഒറ്റയ്ക്ക് ആക്കി പോയി. എന്നത് കൊണ്ടോ അവൾ മാത്രം അവിടെ തുടർന്നു . അവൾ വളർന്നു വലുതായി. അവളുടെ ഏകാന്ത ജീവിതത്തിൽ അവൾക്ക് കൂട്ടായി വന്നവർ പോലും അവളെ വിട്ടകന്നൂ. ഇന്നവൾ ഒരു കൊലയാളി ആണ് നിയമത്തിന്റെയും സമൂഹത്തിന്റെയും മുന്നിൽ. അവൾ താമസിച്ചിരുന്ന ചതുപ്പ് നിലയത്തിന്റെ അടുക്കൽ ചേസ് എന്ന യുവാവിനെ മരിച്ച നിലയിൽ കണ്ടെത്തിയിരിക്കുന്നു. അപകട മരണം ആണോ കൊലപാതകം ആണോ എന്ന സംശയത്തിന്റെ നടുവിലും സ്വാഭാവികമായി അവൾ പ്രതി ആയി മാറി കഴിഞ്ഞൂ. അതിനു കാരണം സമൂഹത്തിനു അവളോടുള്ള മനോഭാവം ആയിരുന്നു.

  കോടതിയിൽ ജൂറിക്ക് മുന്നിൽ അവളുടെ വിചാരണ നടക്കുമ്പോൾ അവളുടെ ജീവിതം പ്രേക്ഷകന്റെ മുന്നിൽ അനാവരണം ചെയ്യുകയാണ്. അവൾ ജീവിതത്തിൽ കടന്നു പോയ ഓരോ സാഹചര്യങ്ങൾ , അവളുടെ ജീവിതത്തിൽ അവൾ കണ്ടെത്തിയ പുതിയ വഴികൾ. അങ്ങനെ എല്ലാം. ഡെലിയ ഓവൻസിന്റെ പ്രശസ്തമായ ഇതേ പേരിൽ ഉള്ള നോവലിനെ ആസ്പദമാക്കി ആണ് ചിത്രം അവതരിപ്പിച്ചിരിക്കുന്നത്. കായയുടെ വിചാരണയിൽ അവൾ കുറ്റവാളി ആണെന്ന് കണ്ടെത്തുമോ?അതോ?

  വളരെ മനോഹരമായ വിഷ്വലുകൾ ആണ് ചിത്രത്തിൽ ഏറ്റവും അധികം ശ്രദ്ധിക്കപ്പെടുക. ഞണ്ടുകൾ പാടുന്ന ചതുപ്പ് നിലത്തിൽ ജീവിക്കുന്ന കായയിലൂടെ പ്രകൃതിയുടെ മനോഹരമായ ദൃശ്യ ഭംഗി അവതരിപ്പിച്ചിരിക്കുന്നു. ഒരു പക്ഷേ predictable ആണെന്ന് പറയാവുന്ന ക്ലൈമാക്സ് ആയിരുന്നു എങ്കിലും അതിലേക്ക് എത്തി ചേരുന്നതും മനോഹരമായ സിനിമ അനുഭവം ആയിരുന്നു. സിനിമയിലെ നായികയായ കായെ അവതരിപ്പിച്ച ഡെയ്സി നന്നായി തന്നെ ആ റോൾ കൈകാര്യം ചെയ്യുകയും ചെയ്തു.

  ഈ വർഷത്തെ വലിയ തീയറ്റർ ഹിറ്റുകളിൽ ഒന്നാണ് ചിത്രം. നോവൽ ഇഷ്ടപ്പെട്ട ആളുകൾ പൊതുവായി അതിനോടു നീതി പുലർത്തിയ ചിത്രം എന്നാണ് Where The Crawdads Sing നെ കുറിച്ച് പറഞ്ഞത്. ഞാൻ നോവൽ വായിച്ചിട്ടില്ലെങ്കിലും നല്ലൊരു സിനിമാനുഭവം ആയിരുന്നു.

  കണ്ടു നോക്കുക.

Download Link: t.me/mhviews1

ചിത്രത്തിന്റെ ലിങ്ക് www.movieholicviews.blogspot.com ൽ ലഭ്യമാണ് .

   

1535. Frygtelig lykkelig / Terribly Happy (Danish, 2008)

 1535. Frygtelig lykkelig / Terribly Happy (Danish, 2008)

          Crime.

 ഒരു കുറ്റം ചെയ്തെങ്കിലും ഒരാൾ കുറ്റവാളി ആകണം എങ്കിൽ ആ കുറ്റത്തെ കുറിച്ച് മറ്റുള്ളവർ അറിയണം. മന:സാക്ഷിയുടെ ഭാരം ഒക്കെ വേറെ കാര്യമാണ്. പ്രത്യക്ഷത്തിൽ ഒരു കുറ്റവും ചെയ്തു എന്ന തോന്നൽ ഇല്ലെങ്കിൽ അത് ഒരു Perfect Crime ആവുകയും ചെയ്യും. ഇതിനെ കുറിച്ച് പറയാൻ ഉള്ള കാരണം, ഏർലിംഗ് ജെപ്സൻ രചിച്ച നോവലിലെ പ്രധാന കഥാപാത്രം സമാനമായ അവസ്ഥയിൽ ആണ്‌.

  അതിലേക്കു അയാളെ നയിച്ച സംഭവങ്ങൾ ആണ്‌ സിനിമയുടെ വിഷയം. സ്ഥലം മാറി വന്ന പോലീസ് ഉദ്യോഗസ്ഥൻ ആണ്‌ നായകൻ. അയാൾ വന്നത് ഒരു കൊച്ചു ഗ്രാമത്തിലേക്കു ആണ്‌. Mare of Easttown ലെ രഹസ്യങ്ങൾ നിറഞ്ഞ കൊച്ചു ടൗണിനെ ഓർമപ്പെടുത്തുന്ന ഗ്രാമം. ഇവിടെ ഓർമ വരുന്നത് അവിടത്തെ ആളുകളുടെ ഇടയിൽ ഉള്ള രഹസ്യങ്ങൾ ആണ്‌. സിനിമയിലെ പ്രസ്തുത ഗ്രാമം കുറേകൂടി അപരിഷകൃതം ആണ്‌. വലിയ വികസനം ഒന്നും ഇല്ലാത്ത സ്ഥലം. എന്നാൽ, അവിടെ ചില എഴുതപ്പെടാത്ത ചട്ടങ്ങൾ ഉണ്ട്. അതിലേക്കു ആണ്‌ റോബർട്ട് എന്ന പോലീസുകാരൻ എത്തി ചേരുന്നത്.

 പ്രക്ഷുബ്ധമായ മനസ്സോടെ ജോലി ആരംഭിക്കുന്ന അയാളെ എന്നാൽ കാത്തിരുന്നത് മറ്റു ചിലതാണ്. ഒരു പോലീസുകാരൻ എന്നതിലുപരി അയാൾ പലതിലും ഉൾപ്പടേണ്ടി വരുന്നു. അതിൽ പ്രധാനമായും ഒരു മരണം നടക്കുന്നു. അതിനോട് അനുബന്ധിച്ചു ചില കാര്യങ്ങൾ വെളിവാകുന്നു.കഥ രസകരം ആകുന്നതു അവിടെയാണ്. അവസാനത്തോട് അടുക്കുമ്പോൾ ഇനിയെന്ത് എന്നുള്ള ഭാവത്തിൽ ആകും പ്രേക്ഷകൻ.

  അതിൽ നിന്നും കഥാപാത്രത്തിന് ഉണ്ടാകുന്ന ട്രാൻസിഷൻ മികച്ചതായി തോന്നി. അത് ഒരു കഥാപാത്രത്തിന്  മാത്രമല്ല ഉണ്ടായത്. കഥാ ഗതിയെ അതെങ്ങനെ ബാധിക്കും എന്നറിയാൻ ചിത്രം കണ്ട് നോക്കൂ.

  എനിക്ക് നല്ലത് പോലെ ഇഷ്ടമായി.

Telegram Link: t.me/mhviews1