1710. Eastern Promises (English, 2007)

 

1710. Eastern Promises (English, 2007)
          Crime/ Thriller

⭐️⭐️⭐️⭐️/5

രണ്ടു മരണങ്ങളിലൂടെ ആണ്  Eastern Promises ആരംഭിക്കുന്നത്. ഒന്ന്, ഒരു കൊലപാതകം. മറ്റൊന്ന് ഗരഭിണിയായ ഒരു പെൺക്കുട്ടിയുടെ മരണം. ഈ മരണങ്ങൾ  രണ്ടും ലണ്ടൻ നഗരത്തിൽ പകയുടെയും ചതിയുടെയും മേമ്പൊടി ചേർത്തുള്ള കുറച്ചു സംഭവങ്ങൾക്ക് തിരി കൊളുത്തുകയാണ്. ഈ സംഭവങ്ങൾ ആണ് Eastern Promises ന്റെ പ്രമേയം. നവോമി വാട്സ് , വിഗോ മോർടെനസൻ, വിൻസന്റ് കാസൽ തുടങ്ങി ഒരു നല്ല താര നിരയുണ്ട് ചിത്രത്തിൽ.

റഷ്യൻ മാഫിയയും അവരുടെ പിന്നാലെ ഉള്ള കെ ജി ഭീയും, അതിനൊപ്പം ആഭ്യന്തര കലഹങ്ങൾ മൂലം കുടിയേറി പാർത്തവരുടെ പിൻ തലമുറ അവരുടെ അതിജീവനത്തിനായി ചെന്നെത്തുന്ന ഇടങ്ങളും എല്ലാം ഈ ചിത്രത്തിന് മികച്ച ഒരു ക്രൈം- ത്രില്ലർ ചിത്രത്തിനുള്ള പരിസരം ഒരുക്കുന്നുണ്ട്. Eastern Promises ഒരു action - packed fast ത്രില്ലർ ഒന്നും അല്ല. പക്ഷേ നല്ല ആക്ഷൻ രംഗങ്ങളും അതിനൊപ്പം മികച്ച കഥാപാത്രങ്ങളും കൂടി ചേരുമ്പോൾ മികച്ചതായി മാറുന്നു എന്നതാണ് യാഥാർഥ്യം.

കഥാപരമായി സ്ഥിരം ഗ്യാങ്സ്റ്റർ ചിത്രങ്ങളിൽ കാണുന്നത് മാത്രം ആണ് ഇവിടെയും ഉള്ളത്. എങ്കിൽ പോലും ഡേവിഡ് ക്രോണൻബർഗിന്റെ സംവിധാന മികവിൽ ചിത്രത്തിന് ആരാധകർ ഉണ്ടാവുകയാണ് ചെയ്തത്. ആ വർഷത്തെ മികച്ച സിനിമകളുടെ ഇടയിൽ സ്ഥാനം പിടിച്ച ചിത്രം പ്രധാനപ്പെട്ട അന്താരാഷ്ട്ര സിനിമ പുരസ്ക്കാര വേദികളിൽ സ്ഥാനം പിടിച്ചിരുന്നു. പ്രത്യേകിച്ചും വിഗോ മോർടൻസൻ. നവോമി വാട്സ് ഓസ്ക്കാർ നാമനിർദേശവും നേടിയിരുന്നു ഈ ചിത്രത്തിലൂടെ.

കണ്ടു നോക്കൂ.

സിനിമയുടെ ലിങ്ക് t.me/mhviews1  ൽ ലഭ്യമാണ്   

1668. Gulmohar (Hindi, 2023)

1668. Gulmohar (Hindi, 2023)

          Streaming on Hotstar

⭐️⭐️⭐️⭐️/5

"ഗുൽമോഹർ". അല്ല. ഇത് അതല്ല. നമ്മളിടങ്ങളിലെ ഗുൽമോഹറിന്റെ കഥയല്ല ഇവിടെ. ഇതൊരു വലിയ വീടിന്റെ, കുടുംബത്തിന്റെ കഥയാണ്.പുറമെ നിന്നു നോക്കുമ്പോൾ സുഖകരമായ ജീവിതം ആണെന്ന് തോന്നുന്ന ഒരു കുടുംബം. അത്യാവശ്യം പണം, വിദ്യാഭ്യാസം എല്ലാം ഉള്ള കുടുംബംഗങ്ങൾ. ഗുൽമോഹർ വിൽപ്പനയ്ക്ക് വച്ച് വിൽക്കുന്നു. അവിടെ ഉള്ള അവസാന ദിവസം മുതൽ നാല് ദിവസത്തിനുള്ളിൽ വരുന്ന ഹോളി വരെയുള്ള സമയം, ആ കുടുംബത്തിലെ പല രഹസ്യങ്ങളും സംഘർഷങ്ങളും പുറത്തു കൊണ്ട് വരുകയാണ് ചിത്രത്തിൽ.

 ചില സന്ദർഭങ്ങളിൽ പ്രേക്ഷകന് നല്ലത് പോലെ കണക്റ്റ് ചെയ്യാൻ പറ്റും ഇതിലെ പല കഥാപാത്രങ്ങളെയും. ഒരു കുടുംബത്തിലെ രഹസ്യങ്ങൾ എന്ന് പറയുമ്പോൾ അത് സിനിമാറ്റിക് മിസ്റ്ററി പോലെ വലിയ സംഭവം ഒന്നും ആകില്ല. പക്ഷെ മുഖത്ത് അണിഞ്ഞിരിക്കുന്ന മുഖമൂടി ആണ്‌ മറ്റുള്ളവർ കാണുന്ന പലരുടെയും ജീവിതം എന്ന് മനസ്സിലാകുമ്പോൾ ആണ്‌ കഥാപത്രങ്ങളുടെ ഒപ്പം പ്രേക്ഷകനും പോകുന്നത്.

 ശർമിള ടാഗോർ, മനോജ്‌ ബാജപയ്, സിമ്രാൻ തുടങ്ങി എല്ലാവരും അവരുടെ കഥാപത്രങ്ങൾ നല്ലതായി ചെയ്തിട്ടും ഉണ്ട്. ഒരു കുടുംബത്തിന്റെ കഥ ആകുമ്പോൾ കഥാപത്രങ്ങൾ ചിലപ്പോൾ സോപ്പ്  സീരിയലുകളിലെ പോലെ തോന്നിക്കാം. എന്നാൽ അതിന് ഗുൽമോഹർ അധികം പിടി കൊടുത്തിട്ടില്ല എന്ന് തോന്നി.

നല്ല ഒരു സിനിമയാണ്. നല്ല കഥാപത്രങ്ങൾ. നല്ല ഒരു കഥ.

കണ്ടു നോക്കൂ. എനിക്ക് നന്നായി ഇഷ്ടപ്പെട്ടൂ.

 

1706. Son of A Rich (Russian, 2019)

1706. Son of A Rich (Russian, 2019)

          Comedy

 

⭐️⭐️⭐️½ /5

ധൂർത്തനും അലസനും ആയ കോടീശ്വര യുവാവിനെ നന്നാക്കാൻ ഉള്ള ശ്രമം ലോകമെമ്പാടും ഉള്ള സിനിമക്കാർ തുടങ്ങിയിട്ട് കാലം കുറെ ആയി. നമ്മുടെ മലയാളത്തിലും ഉണ്ടല്ലോ ഇതേ പ്രമേയത്തിൽ ഉള്ള ധാരാളം ചിത്രങ്ങൾ. എന്നാൽ, ഇത്തരത്തിൽ ഒരു സിനിമ റഷ്യയിൽ ഇറങ്ങിയപ്പോൾ അത് റഷ്യൻ ഭാഷയിൽ ഇറങ്ങിയ സിനിമകളിൽ ഏറ്റവും ലാഭകരമായ ചിത്രമായി മാറുകയാണ് ഉണ്ടായത്. അതാണ്‌ Son of A Rich, അഥവാ Serf എന്ന സിനിമയുടെ ചരിത്രം.

  വെറുതെ നന്മ ഉപദേശിച്ചും സുഖകരം അല്ലാത്ത ജീവിതം കണ്ടും അല്ല ഇവിടെ നായകനെ നന്നാക്കാൻ നോക്കുന്നത്. പകരം, അതിനായി ഒരു ലോകം തന്നെ ഉണ്ടാക്കുകയാണ്. എങ്ങനെ ആണെന്നല്ലേ? ഗ്രിഷ എന്ന ധനികനായ ധൂർത്തു പുത്രനെ നന്നാക്കാൻ അവന്റെ പിതാവ് അവൻ ടൈം ട്രാവൽ ചെയ്ത് 1860 കളിലെ റഷ്യയിൽ എത്തിയത് പോലെ ഒരു പ്രതീതി ഉണ്ടാക്കി.അടിമത്തം നില നിന്നിരുന്ന കാലഘട്ടത്തിൽ എത്തിയ ഗ്രിഷയെ കാത്തിരുന്നത് എന്താണ് എന്നതാണ് ചിത്രം അവതരിപ്പിക്കുന്ന കഥ.

 ഇത്തരത്തിൽ ഒരു പ്രമേയം ആയതു കൊണ്ട് വലിയ ക്യാൻവാസിൽ ആണ്‌ ചിത്രം അവതരിപ്പിച്ചിരിക്കുന്നത്. ഒരു പക്ഷെ നമ്മുടെ നാട്ടിലും വലിയ ബഡ്ജറ്റിൽ വരുന്ന ചിത്രങ്ങൾക്ക് കിട്ടുന്ന പ്രേക്ഷക ശ്രദ്ധ ഉണ്ടല്ലോ? അതായിരിക്കണം ഈ ചിത്രത്തിന് ഇത്രയും വലിയ വിജയം ആകാൻ കഴിഞ്ഞത്. പ്രവചിക്കാൻ ആകുന്ന കഥ ആണെങ്കിലും അവതരണം മികച്ചു നിന്നൂ. പ്രത്യേകിച്ചും ഇത്തരം ഒരു ലോകം ഉണ്ടാക്കി, അതിൽ കഥാപത്രങ്ങളെ ഉൾക്കൊള്ളിച്ചപ്പോൾ നല്ല ഒരു ചിന്ത ആയി തന്നെയാണ് ചിത്രം അനുഭവപ്പെട്ടത്.

സിനിമയുടെ ലിങ്ക് t.me/mhviews1 ൽ ലഭ്യമാണ്.

1705. Investigation of a Citizen Above Suspicion (Italian, 1970)

 1705. Investigation of a Citizen Above Suspicion (Italian, 1970)

          Psychological Thriller, Murder Investigation.

⭐️⭐️⭐️⭐️/5

  ഹോമിസൈഡ്  വിഭാഗത്തിന്റെ ചീഫ് ആയി ഉള്ള അവസാന ദിവസം ആണ് നമുക്ക് 'ചീഫ് ' എന്നു വിളിക്കാവുന്ന പോലീസ് ഉദ്യോഗസ്ഥന് ഒരു തോന്നൽ ഉണ്ടായത്. തന്റെ അധികാരത്തിന്റെ ശക്തി  എത്രത്തോളം ഉണ്ട് എന്നു മനസ്സിലാക്കണമായിരുന്നു ആയാൾക്ക്. സമൂഹത്തിലെ മറ്റ് പൌരന്മാരിൽ നിന്നും ആയാൾക്ക് ഉള്ള സമൂഹത്തിലെ സ്വാധീനം , ശക്തി എന്നിവ കണ്ടെത്തുക ആയിരുന്നു ഉദ്ദേശം. അതിനായി  അയാൾ ചെയ്തത് ഒരു കൊലപാതകം ആയിരുന്നു. തന്റെ രഹസ്യ കാമുകിയുടെ കഴുത്ത് അറുത്ത് അവരെ കൊലപ്പെടുത്തുന്നു. അവരെ കൊലപ്പെടുത്തിയത്തിന് ശേഷം അയാൾ അവളെ കൊന്ന സ്ഥലത്ത്  തന്നിലേക്ക് കുറ്റാന്വേഷകർ വന്നെത്താന് ഉള്ള എല്ലാ തെളിവുകളും മനപ്പൂർവം അവശേഷിപ്പിക്കുന്നു. ഇത്രയും തെളിവുകൾ നൽകിയാൽ തന്നെ ആരെങ്കിലും കുറ്റവാളി ആയി കണ്ടെത്തുമോ എന്നതായിരുന്നു ആയാൾക്ക് അറിയേണ്ടിയിരുന്നത്?

പെർഫക്റ്റ് ക്രൈം ആധാരമാക്കിയുള്ള സിനിമകൾ ധാരാളം നമ്മൾ കണ്ടിട്ടുണ്ടാകും. എന്നാൽ അതിന്റെ നേർ  വിപരീതം ആണ് Investigation of a Citizen Above Suspicion. ആരാലും കണ്ടെത്താൻ കഴിയാത്ത രീതിയിൽ കൊലപാതകം നടത്തുന്നതും, എന്നാൽ തന്റെ നേരെ താൻ ചെയ്ത കൊലപാതകത്തിന് നേരെ വിരൽ  ചൂണ്ടും എന്ന പ്രതീക്ഷയിലും ഉള്ള കേന്ദ്ര കഥാപാത്രം ആണ് ഈ ചിത്രത്തിൽ ഉള്ളത്. വളരെയധികം ലെയറുകൾ ഉള്ള ചിത്രം ആണ് Investigation of a Citizen Above Suspicion. ഒരു കുറ്റാന്വേഷണ ചിത്രം എന്ന നിലയിലും സൈക്കോളജിക്കൽ ത്രില്ലർ എന്ന നിലയിലും മുന്നോട്ട് പൊയ്ക്കൊണ്ടിരുന്ന സിനിമ ഒരു ഘട്ടം കഴിയുമ്പോൾ കേന്ദ്ര കഥാപാത്രമായ ചീഫിന് തന്റെ അധികാര ശക്തി നല്കിയ ഇറ്റലിയിലെ അന്നത്തെ രാഷ്ട്രീയ ഇടനാഴികളിലേക്ക്  ശ്രദ്ധ തിരിയുന്നുണ്ട്.

ഒരു മനുഷ്യന്റെ ഏറ്റവും വലിയ ഫാന്റസി ആയി ഒരു കൊലപാതകം മാറുന്ന രീതിയിൽ അയാളെ ചിന്തിപ്പിച്ചതും ആയാൾക്ക് അധികാരം നൽകിയ ശക്തി ആയിരുന്നു. അതിൽ അയാൾ ഉന്മാദം കൊള്ളുകയും ചെയ്യുന്നുണ്ട്. പിന്നീട് അയാളുടെ മാനസികാവസ്ഥ മാറുകയും  ഒരു അവസരത്തിൽ കൊലയാളി മറ്റൊരാൾ ആയി കണ്ടെത്തി പോലീസ് ഒരാളെ കുറ്റവാളി ആക്കാൻ ശ്രമിക്കുമ്പോൾ ചീഫിന്റെ ഉള്ളിൽ  ഉള്ള  ഈഗോ പുറത്തു വരുന്നതും കാണാം. സിനിമയിൽ ഇത് പോലെ ഉള്ള പല അവസരങ്ങളിലും ചീഫ് തന്നെ കണ്ടെത്താൻ വേണ്ടി പുതു തെളിവുകൾ നൽകുന്നും  ഉണ്ട്. ഇത്തരത്തിൽ ഒരു കഥയ്ക്ക് എന്തായിരിക്കും ക്ലൈമാക്സ് എന്നു ചിന്തിച്ചിട്ടുണ്ടോ? ഇല്ലെങ്കിൽ Investigation of a Citizen Above Suspicion കാണുക.

നമുക്ക്  പരിചിതമായ ഒരു പ്രമേയം അല്ല ചിത്രത്തിന് ഉള്ളത്. നേരത്തെ പറഞ്ഞത് പോലെ ഉള്ള ലെയറുകൾ ചിത്രത്തിന് മോടി കൂട്ടുന്നുണ്ട് എങ്കിലും അതിനും അപ്പുറം മനുഷ്യന്റെ ഇഗോ എന്ന വികാരത്തിൽ  ആണ് സംവിധായകൻ എലിയോ പെട്രി കൂടുതൽ ശ്രദ്ധ കൊടുത്തത് എന്നത് മനസിലാകും. അത് പോലെ അതായത് കാലത്ത് ഉള്ള രാഷ്ട്രീയ സാഹചര്യങ്ങൾ എങ്ങനെ എല്ലാം സമൂഹത്തിൽ ശക്തരായ ആളുകൾ  ദുരുപയോഗം ചെയ്തു എന്നതും വ്യക്തമാകും.ഏത് കാലഘട്ടത്തിലും പ്രസക്തി ഉള്ള സിനിമയാണ്.

സിനിമയുടെ ലിങ്ക് https://movieholicviews.blogspot.com/?m=1 ൽ ലഭ്യമാണ്.

സിനിമ കണ്ടവർ അഭിപ്രായങ്ങൾ പങ്ക് വയ്ക്കണേ.

1704. The Super Mario Bros. Movie (English, 2023)

 1704. The Super Mario Bros. Movie (English, 2023)

          Animation, Fantasy

⭐️⭐️⭐️⭐️/5

സൂപ്പർ മരിയോ എന്ന വിഡിയോ ഗെയിം ഞാൻ നാലാം ക്ലാസിൽ പഠിക്കുമ്പോൾ  ആണ്‌ ആദ്യമായി കളിക്കുന്നത്. പിന്നീട്  കുത്തി ഇരുന്ന് അത് തീർക്കുകയും ചെയ്തു. ഇതേ പോലെ ആകും ആക്കാലത്തു ഈ ഗെയിം കളിച്ച പലരുടെയും അനുഭവവും.വർഷങ്ങൾക്കു ശേഷം Nintendo Switch ൽ മക്കളോടൊപ്പം സൂപ്പർ മരിയോയിലെ പല ഗെയിമും കളിക്കുന്നതിന് കാരണം ആ നൊസ്റ്റാൾജിയ കൂടി ആണ്‌. Super Mario Bros.  എന്ന 1993 ലെ സിനിമ വലിയ പ്രേക്ഷക അഭിപ്രായം ഒന്നും ഉണ്ടാക്കിയില്ലെങ്കിലും അതിലും ഈ നൊസ്റ്റാൾജിയ ഉണ്ടായിരുന്നു, വർഷങ്ങൾക്കു ശേഷം കാണുമ്പോൾ.

എന്നാൽ 2023 ൽ സൂപ്പർ മരിയോ വീണ്ടും വരുമ്പോൾ, പരിചയം ഉള്ള കഥയും കഥാപത്രങ്ങളും ആയിരുന്നെങ്കിലും മികച്ച അനിമേഷനോടെ കാണാൻ കഴിഞ്ഞു. പ്രത്യേകിച്ചും Nintendo Switch ലെ ഗെയിമിന്റെ ഒരു എക്സ്റ്റൻഷൻ പോലെ തോന്നി എന്ന് പറയുന്നത് ആയിരിക്കും ശരി.തികച്ചും രസകരമായി അവതരിപ്പിച്ച സൂപ്പർ മരിയോ ബ്രോസ്.

തീരെ ബോർ അടിപ്പിക്കാതെ, സൂപ്പർ മറിയോയുടെ വീഡിയോ ഗെയിം കത്തി നിന്ന സമായത്തിലെ പാട്ടുകളും പശ്ചാത്തലത്തിൽ ഉപയോഗിച്ച് നൊസ്റ്റാൾജിയ എന്ന മനുഷ്യന്റെ ഏറ്റവും വലിയ തിരിച്ചു കിട്ടാത്ത കാഴ്ചകളെ മികച്ച രീതിയിൽ പ്രേക്ഷകനിൽ എത്തിച്ചിട്ടും ഉണ്ട്. അത് പോലെ തന്നെ സിനിമയിൽ വരുന്ന ചില കഥാപാത്രങ്ങളും ഇത്തരം ഒരു നൊസ്റ്റാൾജിയ പ്രേക്ഷകനിൽ എത്തിക്കുന്നുണ്ട്.

ഞാൻ ഈ സിനിമയെക്കുറിച്ച്  എഴുതിയതിൽ ഏറ്റവും കൂടുതൽ ഉള്ളത് നൊസ്റ്റാൾജിയ എന്ന വാക്കാണ്. സത്യം പറഞ്ഞാൽ ഇതിന്റെ അപ്പുറം ഈ സിനിമയെ വിവരിക്കാൻ ഉള്ള വാക്കുകൾ എനിക്കു കിട്ടിയില്ല എന്നതാണ് സത്യം. ഇത് പോലെ സൂപ്പർ മരിയോ എന്ന പ്ലംബറെ കുട്ടിക്കാലത്തെ ഓർമകളിൽ എവിടെയെങ്കിലും കാത്തു സൂക്ഷിക്കാൻ കഴിയുന്ന ആൾ ആണെങ്കിൽ സിനിമ തീർച്ചയായും കാണുക. ഇഷ്ടമാകും.

സിനിമയുടെ ലിങ്ക് t.me/mhviews1 ൽ ലഭ്യമാണ്.

സിനിമ കണ്ടവർ അഭിപ്രായങ്ങൾ പങ്ക് വയ്ക്കണേ.

1703. Sisu (Finnish/English, 2023)

 1703. Sisu (Finnish/English, 2023)

          Action

⭐️⭐️⭐️⭐️/5

നമ്മുടെ ജോൺ വിക്കിന് ഒരു അപ്പൂപ്പൻ ഉണ്ടെന്നു കരുതുക. സ്വന്തം നായയും, നഷ്ടപ്പെട്ട ഭാര്യയും, മരിക്കാൻ മനസ്സില്ലാത്ത ഒരു മനസ്സും. അങ്ങനെ ഒരു മനുഷ്യൻ.ഒരു മനുഷ്യൻ എന്നല്ല. ഫാന്റം എന്ന് വിളിക്കാവുന്ന ഒരു ഐറ്റം.ജോൺ വിക്കിന്റെ അടിസ്ഥാന കഥ എന്ന് പറയാവുന്ന രീതിയിൽ ജീവിക്കുന്ന ഒരാൾ.ആറ്റാമി എന്ന് പേരുള്ള, മറ്റുള്ളവരുടെ മുന്നിൽ ഭയം ഉളവാക്കുന്ന ഒരാൾ. മരണം വന്നു വിളിച്ചാൽ പോലും കൂടെ പോകാത്ത ഒരാൾ.ജോൺ വിക്കിന്റെ കഥയും ആയി ഉപമിച്ചതിനു ഒരു കാരണവും ഉണ്ട്.

സിസുവിന്റെ ട്രെയിലർ ആദ്യം കാണുന്നത് തിയറ്ററിൽ ജോൺ വിക്ക് തുടങ്ങുന്നതിനു മുന്നേ ആണ്‌. അന്ന് തന്നെ കാണണം എന്ന് മനസ്സിൽ കരുതിയ ചിത്രം ആണ്‌. സിനിമ സിനിമ തുടങ്ങുന്നതിനു മുന്നേ തന്നെ ഒരു ആക്ഷൻ സിനിമ ആമ്പിയൻസിലേക്ക് പോകാൻ സിസു ട്രെയിലർ ഒരു കാരണവും ആയിരുന്നു.

ഇനി സിനിമയിലേക്ക്. തന്റെ മുന്നിൽ വന്ന ഓരോ നാസിയെയും കൊന്നൊടുക്കി നടന്ന ഒരാൾ. അയാളുടെ കഥയാണ് സിസു എന്ന സിനിമ പറയുന്നത്. നായകൻ കുറച്ചു ഡയലോഗുകൾ മാത്രം ആണ് പറയുന്നത് എങ്കിലും മറ്റുള്ളവർ അയാളെ കുറിച്ച് പറയുന്നിടത്തു സിനിമയുടെ പഞ്ചും മാസും സൃഷ്ടിക്കപ്പെടുക ആണ്‌. കത്തി എന്നൊക്കെ മറ്റൊരു സിനിമയിൽ ആണെങ്കിൽ പറയാവുന്ന ആക്ഷൻ രംഗങ്ങൾ ഇത്തരത്തിൽ ഉള്ള കഥാപാത്ര വികാസത്തിലൂടെ പ്രേക്ഷകനിൽ വിശ്വാസം ഉണ്ടാക്കുന്നുണ്ട്.

നല്ലത് പോലെ റോ ആയ ആക്ഷൻ രംഗങ്ങൾ, അധികം സംസാരം ഇല്ലാതെ ഒന്നര മണിക്കൂർ ഉള്ള സിനിമയിൽ മാസ് സിനിമയുടെ മികച്ച അവതരണത്തിലൂടെ പോവുകയാണ്. രണ്ടാം ലോക മഹായുദ്ധ സമയം ആണ്‌ സിനിമയിൽ ഉള്ള കഥയുടെ കാലഘട്ടം. എന്നാൽ, അധികം ചരിത്രം ഒന്നും പറയാതെ നാസികളുടെ ക്രൂരത അവതരിപ്പിക്കുന്നതിനോടൊപ്പം അതിലെ ഓരോരുത്തരും കൊല്ലപ്പെടുകയാണ്. ക്ലൈമാക്‌സിലെ രംഗം നേരത്തെ പറഞ്ഞത് പോലെ മറ്റൊരു സിനിമയിൽ ആയിരുന്നെങ്കിൽ ഇരുന്നു കൂവിയേനെ. പക്ഷെ സിനിമ മൊത്തത്തിൽ നോക്കുമ്പോൾ ആ രംഗങ്ങൾ പോലും കുഴപ്പമില്ല എന്ന് തോന്നി പോകും.

നേരത്തെ പറഞ്ഞത് പോലെ നായകൻ ഒരു ഫാന്റം ആണ്‌. ഒരിക്കൽ മരിച്ചതിനു ശേഷം പിന്നെ മരണം ഇല്ലാത്ത ഒരാൾ. അയാളെ കൊല്ലാൻ അത്ര എളുപ്പവും അല്ല. ആക്ഷൻ സിനിമ സ്നേഹികൾക്ക് ഒരു ഫുൾ ട്രീറ്റ് ആയിരിക്കും സിസു. കണ്ടു നോക്കുക.ആദ്യം പറഞ്ഞത് പോലെ ജോൺ വിക്കിന്റെ അപ്പൂപ്പൻ തന്നെ ആയി ആ സീരീസ് സിസുവിലൂടെ പോയിരുന്നെങ്കിൽ കിടിലം ആയേനെ എന്ന് ഇപ്പോഴും തോന്നുന്നു.

സിനിമയുടെ ലിങ്ക് ബ്ലോഗിൽ ഉണ്ട്.

സിനിമയുടെ ലിങ്ക് t.me/mhviews1 ൽ ലഭ്യമാണ്.

സിനിമ കണ്ടവർ അഭിപ്രായങ്ങൾ പങ്ക് വയ്ക്കണേ.

1701. Kannai Nambathey ( Tamil, 2023)

 1701. Kannai Nambathey ( Tamil, 2023)

         Streaming on Netflix

⭐️⭐️⭐️/5

  മഴയുള്ള പാതിരാത്രി ഒരു സ്ത്രീയെ സഹായിക്കാൻ ശ്രമിക്കുന്നത് ആപത്തോ? അരുണിന് അങ്ങനെ തോന്നിയാലും കുഴപ്പം ഒന്നും പറയാൻ ഇല്ല. കാരണം അത് പോലെ ട്വിസ്റ്റുകൾ ആണ്‌ പിന്നീട് അയാളുടെ ജീവിതത്തിൽ ഉണ്ടാകുന്നത്. അത് ക്ലൈമാക്സ് വരെ തുടരുകയും ചെയ്യുന്നു. സിനിമ കാണുന്ന പ്രേക്ഷകന് ആണെങ്കിൽ സ്‌ക്രീനിൽ നിന്നും ഒന്ന് കണ്ണെടുത്താൽ അടുത്തത് എന്താണ് സംഭവിച്ചത് എന്ന് മനസ്സിലാകാതെ സിനിമ റീവൈൻഡ് അടിക്കേണ്ട അവസ്ഥയും. സത്യം പറഞ്ഞാൽ ഒരു സിനിമയിലെ ട്വിസ്റ്റുകൾ കണ്ടു വട്ടായി പോയ വേറെ ഒരു സിനിമ ഉണ്ടെന്നു തോന്നുന്നില്ല. അതാണ്‌ കണ്ണേ നമ്പാതെ എന്ന ഉദയനിധി സ്റ്റാലിൻ സിനിമ.

  ഇടയ്ക്ക് ഓരോ കഥാപാത്രവും വരുമ്പോൾ ദൈവമേ! ഇനിയും ട്വിസ്റ്റോ എന്നത് ആയിരുന്നു അവസ്ഥ. തല കുഴയ്ക്കുന്ന രീതിയിൽ ഉള്ള ട്വിസ്റ്റുകൾ ഒന്നും അല്ലെങ്കിലും അതിന്റെ ബാഹുല്യം കാരണം ഇങ്ങനെ തോന്നിയേക്കാം. അന്ന് സ്ത്രീയെ സഹായിച്ച അരുൺ പിന്നെ ചെന്ന് എത്തുന്നത് ചതിയുടെയും കൊലകളുടെയും മറ്റൊരു ലോകത്തിൽ ആയിരുന്നു. അതിൽ പലരും വരുന്നു. ചിലർ മരിക്കുന്നു, ചിലർ ജീവിക്കുന്നു. അങ്ങനെ ആയിരുന്നു പിന്നീട് സിനിമയുടെ കഥ.

 സിനിമയുടെ അവസാനം മറ്റൊരു സിനിമാറ്റിക് യൂണിവേഴ്‌സിലേക്ക് പോയതായും കാണാം.മു. മാരൻ യൂണിവേഴ്‌സ് എന്ന് വിളിക്കാം. ഇനിയും ബാക്കി സിനിമകൾ ഈ വഴി വന്നാൽ കൊള്ളാം. ഈ സിനിമയെ കുറിച്ച് പലരും പറഞ്ഞ പ്രശ്നം ഇത്രയും ഫോഴ്സ്ഡ് ആയി വന്ന ട്വിസ്റ്റുകളെ കുറിച്ച് ആണ്‌. ചിലപ്പോഴൊക്കെ ട്വിസ്റ്റിനു വേണ്ടി ട്വിസ്റ്റ് ഉണ്ടാക്കുന്നത് പോലെ തോന്നുമായിരുന്നു. എന്നാലും എന്നേ സംബന്ധിച്ച് കുഴപ്പമില്ലാത്ത ഒരു സിനിമ കാഴ്ച ആയിരുന്നു. എന്തായാലും പ്രേക്ഷകൻ എന്ന നിലയിൽ ശ്രദ്ധിച്ചു സിനിമ കാണിക്കാൻ ഉള്ള എന്തോ ഒന്ന് സിനിമയിൽ ഉണ്ടെന്നു തോന്നി.

Must - watch ആണെന്ന് ഒന്നും പറയുന്നില്ല. പക്ഷെ സമയം ഉണ്ടെങ്കിൽ ഒന്ന് കണ്ടു നോക്കാൻ ഉള്ളത് ഉണ്ട് കണ്ണേ നമ്പാതെ എന്ന സിനിമയിൽ.