1287. American Murder: The Family Next Door.(English, 2020)

 1287. American Murder: The Family Next Door.(English, 2020)

        Documentary, Crime

One wrote on Twitter: "Takes a lot to bring me to tears. But the last 15 mins of this has broken me. I actually shed a few tears and not an emotional guy, but this got me.."

A second said: "I'm sick to my stomach over this Netflix documentary 'American Murder: The Family Next Door."

(Courtesy:Daily Record)

  Netflix Canada യിൽ ഒന്നാം സ്ഥാനത്തു ആണ് ഇപ്പോൾ American Murder: The Family Next Door. ഈ ഡോക്യുമെന്ററിയെ കുറിച്ചു പൊതുവെ Netflix ൽ ഇറങ്ങിയ ഏറ്റവും disturbing ആയ ഡോക്യുമെന്ററി എന്നാണ് പ്രേക്ഷകർ ഭൂരിഭാഗവും വിലയിരുത്തുന്നത്.എന്താകും അതിനു കാരണം എന്ന് നോക്കാം.

  ഗർഭിണിയായ ഒരു സ്ത്രീയും അവരുടെ രണ്ടു പെണ്കുട്ടികളെയും കാണാതായ സംഭവത്തിന്റെ ദുരൂഹതകൾ എന്നാണ് Netflix ഈ ഡോക്യുമെന്ററിയെ കുറിച്ചു synopsis നൽകിയത്.എന്നാൽ അതിനും അപ്പുറം ആയിരുന്നു ഈ ഡോക്യുമെന്ററി. അമേരിക്കയിലെ കോളറാഡോയിൽ നടന്ന ഈ സംഭവം അമീപിക്കായിലെ സമൂഹ മനസാക്ഷിയെ മൊത്തം ഞെട്ടിച്ച ഒന്നായിരുന്നു.
 
  ഷനോൻ എന്ന സ്ത്രീയും അവരുടെ മക്കളും ദുരൂഹമായ സാഹചര്യത്തിൽ അപ്രത്യക്ഷരായി.വീടിനു പുറത്തേക്കു അവർ പോയതിന്റെ ഒരു സൂചനയും ഇല്ലായിരുന്നു.ജോലി സംബന്ധമായി ദൂരെ ആയിരുന്ന ഭർത്താവ് വന്നപ്പോഴേക്കും ഷനോന്റെ സുഹൃത്തു അവർക്ക് എന്തെങ്കിലും സംഭവിച്ചിരിക്കും എന്നു കരുതി പോലീസിൽ അറിയിക്കുകയും അവർ അന്വേഷണം തുടങ്ങുകയും ചെയ്തിരുന്നു.ഓർക്കണം, ഒറ്റ തെളിവ് പോലും ഇല്ലാത്ത കേസ് ആയിരുന്നു ഇതു.

  എന്നാൽ നാലാം ദിവസം പ്രതിയെ കണ്ടു പിടിക്കുമ്പോൾ അമേരിക്കൻ ജനതയിൽ മൊത്തം ഒരു ഞെട്ടൽ ആണ് ഈ സംഭവത്തെ കുറിച്ചു ഉണ്ടായത്.അത്രയ്ക്കും disturbing ആയിരുന്നു ഈ കേസിലെ ദുരൂഹത മാറിയപ്പോൾ ഉണ്ടായത്.അതിന്റെ നാൾ വഴിയിലൂടെ ആണ് ഈ ഡോക്യുമെന്ററി സഞ്ചരിക്കുന്നത്.

  The Watts Tapes എന്ന Spotify യിലെ പോഡ്കാസ്റ്റ് വഴി ആണ് ആദ്യമായി ഈ കേസിനെ കുറിച്ചു ഞാൻ കേൾക്കുന്നത്.അതു കൊണ്ടു തന്നെ ആ സംഭവം ഡോക്യുമെന്ററി ആയി വന്നപ്പോൾ കാണാൻ ഉള്ള ത്വര സ്വാഭാവികം ആയും ഉണ്ടായി.പോലീസ് അന്ന് കേസ് അന്വേഷണ സമയത്തു റെക്കോർഡ് ചെയ്ത വീഡിയോകൾ, സി സി ടി വി ദൃശ്യങ്ങൾ,ഷാനോന്റെ ഫേസ്ബുക്, ഫോണ് മെസേജുകൾ എല്ലാം അന്നത്തെ സംഭവങ്ങൾ ചിത്രീകരിക്കാൻ ആയി ഉപയോഗിച്ചിട്ടുണ്ട്.

  ഈ സംഭവങ്ങളിലേക്കു അന്നത്തെ തെളിവുകളിൽ കൂടി നോക്കുമ്പോൾ ശരിയാണ് , ആദ്യം പറഞ്ഞ പോലെ നല്ല disturbing ആണ്.സ്വാർത്ഥ താല്പര്യങ്ങൾക്ക് വേണ്ടി പലപ്പൊഴും ചെയ്യുന്ന കാര്യങ്ങൾ മനുഷ്യനെ മൃഗം ആക്കി മാറ്റാറുണ്ട്.ഒരു പക്ഷെ അൽപ്പ സമയത്തെ ചിന്താ കുഴപ്പം ആയിരിക്കാം വലിയ ഒരു ക്രൈമിലേക്കു പോകുന്നത്.ക്രിമിനൽ വാസന ഇല്ല എന്നു കരുതുന്ന ഒരാളെ പോലും അങ്ങനെ ആക്കി മാറ്റാൻ സാധിയ്ക്കും.

  അപ്പോഴും ചിന്തിക്കുക.നമ്മൾ എന്താണ്?നമ്മൾ എന്തിനു വേണ്ടി ആണ് നിലകൊള്ളുന്നത്?ജീവിതത്തിലെ priority കൾ എന്താണ്?ഇത്തരം ഒരു retrospection ഒരു പക്ഷെ ഇത്തരത്തിൽ ഉള്ള പ്രവൃത്തികളിൽ നിന്ന് മനുഷ്യനെ രക്ഷിക്കാൻ കഴിയും എന്ന് തന്നെ വിശ്വസിക്കുന്നു.

  തീർച്ചയായും കാണേണ്ട ഡോക്യുമെന്ററികളിൽ ഒന്നാണ് American Murder: The Family Next Door.

Netflix ൽ ലഭ്യമാണ്.

         

1286. The Social Dilemma (English,2020)

 1286. The Social Dilemma (English,2020)

          Documentary

  "The Social Dilemma യെ കുറിച്ചു ഫേസ്‌ബുക്കിൽ പോസ്റ്റ് ഇടുന്ന അത്ര കോമഡി വേറെ ഇല്ല എന്നാണ് തോന്നുന്നത്"

  നമ്മൾ ആശയവിനിമയത്തിന് ഉപയോഗിക്കുന്ന സോഷ്യൽ നെറ്റ്‌വർക്കുകൾ എങ്ങനെ നമ്മളെ നിയന്ത്രിക്കുന്നു, എങ്ങനെ അവരുടെ കച്ചവട താല്പര്യങ്ങൾക്കായി ഉപയോഗിക്കുന്നു എന്നത് ആണ് ഈ ഡോക്യുമെന്ററി ഈ സത്യങ്ങൾ ഒക്കെ മനസ്സിലാക്കി ഇത്തരം സോഷ്യൽ നെറ്റ്‌വർക്കുകളിൽ തുടക്ക കാലത്തു ഇതിനെല്ലാം ചുക്കാൻ പിടിച്ച ആളുകളുടെ തുറന്നു പറച്ചിലുകളും, വിദഗ്ധരുടെ അഭിപ്രായങ്ങളും ആയി ആണ് മുന്നോട് പോകുന്നത്‌.

  ആദ്യം ഫേസ്ബുക് നമ്മളെ ശ്രദ്ധിക്കുന്നു എന്നു പേഴ്സണലി  തോന്നിയത്‌ നമ്മൾ ഗൂഗിളിൽ സെർച്ച് ചെയ്തതിനു ശേഷം ഫേസ്‌ബുക്കിൽ അതേ കാര്യങ്ങൾ പരസ്യമായി വന്നു കണ്ടപ്പോൾ ആണ്.ഉദാഹരണമായി പറഞ്ഞാൽ, പല പ്രോഡക്റ്റുകളും അങ്ങനെ ഓണ്ലൈന് ആയി വാങ്ങാനായി കാണും.പക്ഷെ ആ സമയത്തു ആവശ്യം ഉള്ള കാര്യമായത് കൊണ്ട് സഹായകരമായി തോന്നി.പിന്നീട് ഫോണിൽ ഏതെങ്കിലും ഒരു പ്രോഡക്റ്റിനെ കുറിച്ചു സുഹൃത്തുക്കളോടൊ സഹോദരനോടൊ സംസാരിച്ചു കഴിയുമ്പോൾ അതേ കാര്യത്തെ കുറിച്ചു പരസ്യങ്ങൾ കാണാൻ തുടങ്ങി.

  കൂടുതൽ നേരവും വെറ്റിലയിൽ ചുണ്ണാമ്പ് തേയ്ക്കുന്ന പോലെ മൊബൈൽ സ്‌ക്രീനിൽ വിരല് വച്ചു പ്രവർത്തിപ്പിക്കുന്ന എന്നെ സംബന്ധിച്ചു അതൊക്കെ നോർമൽ ആയി മാറി.എന്റെ മാത്രം അല്ല.നമ്മളിൽ ഭൂരിഭാഗം പേരുടെയും അവസ്ഥ അതായിരിക്കണം.സിനിമ ഇഷ്ട വിഷയം ആയതു കൊണ്ടു ആകണം, സുഹൃത്തുക്കൾ മുതൽ വീഡിയോ സജഷൻ വരെ അതിനെ സംബന്ധിച്ചു ആണ്.എന്നെ സംബന്ധിച്ചു അതം ഒരു ബോണസ് ആണ്.

  പക്ഷെ The Social Dilemma കണ്ടപ്പോൾ തോന്നിയത്‌ ഇങ്ങനെ ഒക്കെ ബോണസ് ആയി കാര്യങ്ങൾ കൈ വെള്ളയിൽ ഉണ്ടെന്നു കരുതിയ എന്നെ ഞെട്ടിച്ച കാര്യങ്ങൾ ആയിരുന്നു.പ്രത്യേകിച്ചു AI യുടെ പ്രവർത്തന രീതി ഒക്കെ.സുക്കസർബര്ഗ് AI നല്ല കാര്യങ്ങൾക്ക് വേണ്ടി ഉപയോഗിക്കാം എന്നൊക്കെ പേഴ്സയുന്നുണ്ടെങ്കിലും ക്ളൈമാക്സിൽ വിദഗ്ധർ അതു എത്ര മാത്രം പ്രായോഗികം ആകും എന്നതിനെ കുറിച്ചു ആശങ്കകൾ പങ്കു വയ്ക്കുന്നുണ്ട്.

  വാട്സ്ആപ് കേശവൻ അമ്മാവനെ പോലെ ഫേസ്ബുക് പ്രവർത്തിച്ച കുറെ ഏറെ കാര്യങ്ങൾ ഉണ്ട്. Pizzagate Conspiracy Theory , Flat Earth Conspiracy Theory തുടങ്ങി വാക്‌സിൻ വിരുദ്ധർ, രാഷ്ട്രീയ propoganda തുടങ്ങി ധാരാളം സംഭവങ്ങളിൽ ഒരു കേശവൻ അമ്മാവൻ ആയി ആളുകളെ തെറ്റിദ്ധാരണകൾ പറഞ്ഞു പഠിപ്പിച്ച എത്രയോ സംഭവങ്ങൾ.ഈ ഡോക്യുമെന്ററി അവതരിപ്പിച്ചിരിക്കുന്നത് ഒരു ചെറിയ സിനിമ രൂപത്തിൽ കൂടി ആണ്.ചർച്ച ചെയ്യുന്ന കാര്യങ്ങളുടെ സിനിമാവിഷ്‌ക്കാരം കൂടി കാണാൻ കഴിയും.വെറുതെ ടെക്നിക്കൽ കാര്യങ്ങൾ പറഞ്ഞു പോകുന്നത് അല്ലാതെ നമ്മുടെ എല്ലാം ജീവിതത്തിൽ പ്രായോഗികമായി എങ്ങനെ ഇതെല്ലാം സ്വാധീനിക്കുന്നു എന്നു കാണാൻ കഴിയും.

 സോംബികളെ പോലെ നമ്മളെ എല്ലാം മാറ്റിയെടുക്കാൻ കഴിഞ്ഞതിന്റെ ബയോളജിക്കൽ ആയ കാര്യങ്ങളെ കുറിച്ചും പ്രതിപാദിക്കുന്നുണ്ട് ഇതിൽ.വെറുതെ പറഞ്ഞു പോകുന്ന കാര്യങ്ങൾ അല്ല ഇതൊന്നും.ഈ വിഷയങ്ങൾ ആയി നല്ല അറിവ് ഉള്ള ആളുകൾ അവരുടെ ആശങ്കകൾ ആണ് പങ്കു വയ്ക്കുന്നത്.പലരും ഈ ടെക്‌നോളജി ഒക്കെ നിര്മിച്ചവരും ആണ്.

 ഇതു കണ്ടു കഴിഞ്ഞു എഴുതി എങ്കിലും ഇതിനെല്ലാം വിപരീതമായി പ്രവർത്തിക്കാൻ എനിക്ക് തന്നെ കഴിയുമോ എന്നു പോലും സംശയമാണ്.ഇല്ല.കഴിയില്ല!!ജീവിതത്തിന്റെ ഒരു ഭാഗം തന്നെ ആയി മാറിയിട്ടുണ്ട് ഒപ്പം ഉള്ള devices എല്ലാം.ഇതെല്ലാം വാങ്ങിക്കൂട്ടുമ്പോൾ, അറിഞ്ഞു കൊണ്ട് അപകടത്തിൽ ചാടുക ആണെന്ന് മനസ്സിലാക്കുന്നുണ്ടെങ്കിലും നേരത്തെ പറഞ്ഞ പോലെ ജീവിതത്തിന്റെ ഭാഗം ആണ് ഇന്ന് എല്ലാം.

 ആദ്യം പറഞ്ഞ പോലെ വലിയ ഒരു തമാശ ആകും ഈ പോസ്റ്റ് ഫേസ്‌ബുക്കിൽ തന്നെ ഇടുമ്പോൾ.പിന്നെ ഒരു സമാധാനം ഉള്ളത് AI യെ നമ്മൾ മൈൻഡ് ചെയ്യാത്തത് കൊണ്ടു ഈ എഴുതി ഇടുന്നതൊന്നും അഞ്ചോ പത്തോ പേരിൽ കൂടുതൽ കാണുക പോലും ഇല്ല എന്നാണ്.AI യ്ക്ക് പോലും വേണ്ടാത്ത ആളായത് കൊണ്ടു തന്നെ, ആരെങ്കിലും കാണുക ആണ് കാണാൻ മറക്കല്ലേ എന്നു പറയാൻ ഉദ്ദേശിക്കുന്നു.പ്രത്യേകിച്ചു ഒരു കാര്യമുണ്ട് അതു ഈ ഡോക്യുമെന്ററി കണ്ട ഉടനെ ഫേസ്‌ബുക്ക് ഒക്കെ ഉപേക്ഷിക്കും എന്നല്ല, പകരം ഒരു മികച്ച ത്രില്ലർ ഡോക്യുമെന്ററി കാണാൻ ഉള്ള അവസരം എന്ന നിലയിൽ ആണ്.അതു കൊണ്ടു കാണാൻ ശ്രമിക്കുക..

Netflix ൽ ലഭ്യമാണ് ഡോക്യുമെന്ററി!!

1285. A Perfect Getaway(English, 2009)

 1285. A Perfect Getaway(English, 2009)

          Crime, Mystery

  ഹണിമൂൺ ആഘോഷിക്കാൻ ആയി പ്രകൃതി രമണീയമായ സ്ഥലത്തേക്ക് പോകുന്ന ദമ്പതികൾ.അവർ പോകുന്ന വഴിക്ക് കുറച്ചു പേരെ പരിചയപ്പെടുന്നു. ആ സമയത്താണ് ക്രൂരമായ രീതിയിൽ ദമ്പതികളെ കൊല്ലുന്ന കൊലപാതകികളെ കുറിച്ചുള്ള വാർത്തകൾ പുറത്തു വരുന്നത്.ഒരു പക്ഷെ ആ കൂട്ടത്തിൽ ആരെങ്കിലും ആയിരിക്കാം കൊലപാതകികൾ.പോലീസ് അന്വേഷണം നടത്തുന്നു.പരസ്പ്പരം ആർക്കും ആരെയും സംശയിക്കാവുന്ന അവസ്ഥ. കൊലപാതകികൾ ഇവരിൽ ആരെങ്കിലും ആണോ??

 

 2011 ൽ ആണ് ആദ്യമായി ഈ പടം കാണുന്നത്.ക്ളൈമാക്സിലേക്കു എത്തിയപ്പോൾ അന്ന് ഞെട്ടിപ്പോയിരുന്നു.അങ്ങനെ ഒരു കഥ ആയിരിക്കും എന്ന് തീരെ ഐഡിയ ഇല്ലായിരുന്നു.കഴിഞ്ഞ ദിവസം Amazon Prime ൽ suggestion ആയി കണ്ടപ്പോൾ ആണ് ഭാര്യയോട് സിനിമ കണ്ടിട്ടുണ്ടോ എന്നു ചോദിച്ചത്.ഇല്ല എന്ന മറുപടി കേട്ടപ്പോൾ ഒന്നു കൂടി കണ്ടൂ.ക്ളൈമാക്‌സ് മാത്രം ഓർമ ഉണ്ടായിരുന്നെങ്കിലും ഇപ്പോൾ കാണുമ്പോഴും , സമാനമായ ധാരാളം സിനിമകൾ കണ്ടിട്ടുണ്ടെങ്കിലും A Perfect Getaway യ്ക്ക് ഒരു ഫ്രഷ്നസ് ഉള്ളതായി തോന്നി.

  പ്രത്യേകിച്ചും മനോഹരമായ സ്ഥലങ്ങൾ, ഇടയ്ക്കു ഭീതി ഉണ്ടാക്കുന്ന കഥ എന്നിവ ഒക്കെ സിനിമയുടെ പോസിറ്റിവ് വശമാണ്.മികച്ച മിസ്റ്ററി/ത്രില്ലർ സിനിമകളിൽ ഉൾപ്പെടുത്താവുന്ന ചിത്രമാണ് ഇതു. Creepy ആയ ഒരു അന്തരീക്ഷം ആണ് സിനിമയ്ക്ക് നല്കിയിരിക്കുന്നതെങ്കിലും ഹവായി ദ്വീപുകളിലെ വശ്യമായ മനോഹാരിതയും കൂടി ചേരുമ്പോൾ പ്രേക്ഷകനെ സിനിമയുടെ മൂഡിലേക്കു എത്തി ചേർക്കാൻ എളുപ്പം കഴിയുന്നുണ്ട്. Zodiac അല്ലെങ്കിൽ Seven പോലെ ഉള്ള ചിത്രങ്ങൾ അല്ലാതെ പ്രേക്ഷകനെ പെട്ടെന്ന് ഞെട്ടിക്കുന്ന, cheap thrills എന്ന ഓമന പേരിൽ വിളിക്കുന്ന സസ്പെൻസുകൾ ഇല്ലേ? അത്തരത്തിൽ ഒരെണ്ണം നല്ല രീതിയിൽ വർക് ഔട്ട് ആയ ചിത്രമാണ്.

  സിനിമ ഇറങ്ങിയ സമയം മിക്സഡ് ആയ അഭിപ്രായങ്ങൾ കണ്ടിരുന്നു.പക്ഷെ അന്ന് പ്രമേയം വായിച്ചപ്പോൾ കാണാൻ തോന്നിയത് കൊണ്ടാണ് ചിത്രം കണ്ടത്.എന്തായാലും സിനിമ കാണാത്തവർ ഉണ്ടെങ്കിൽ കണ്ടു നോക്കിക്കൊള്ളു.ഇപ്പോഴത്തെ അവസ്ഥയിൽ മുകളിൽ പറഞ്ഞ cheap thrills എങ്കിലും ഉള്ള സിനിമ ആണെങ്കിൽ നന്നായി എന്ന അവസ്ഥ ആണ് പുതിയ സിനിനകൾ കാണുമ്പോൾ.

  ചിത്രം Amazon Prime ൽ ലഭ്യമാണ്.

ചിത്രത്തിന്റെ ടെലിഗ്രാം ചാനൽ ലിങ്ക് @mhviews എന്ന ടെലിഗ്രാം സെർച്ചിൽ ലഭ്യമാണ്.

1284.Villains (English,2019)

 1284.Villains (English,2019)

         Horror, Comedy

  മിക്കിയും ജൂൾസും ഒരു കടയിൽ നിന്നും പണം മോഷ്ടിച്ചതിന് ശേഷം രക്ഷപ്പെടുകയാണ്.വിജനമായ ഒരു റോഡിലൂടെ സഞ്ചരിക്കുമ്പോൾ ആണ് വണ്ടിയിൽ ഉള്ള ഇന്ധനം തീർന്നൂ എന്നു മനസ്സിലാകുന്നത്.സഹായിക്കാൻ ആരുമില്ലാത്ത അവസ്ഥ.പോലീസ് ആണെങ്കിൽ അവരുടെ മോഷണം കാരണം അവരെക്കുറിച്ചു ഉള്ള അന്വേഷണവും തുടങ്ങി. ആ സമയമാണ് മരുഭൂമിയിലെ മരുപ്പച്ച എന്ന പോലെ ആണ് അവിടെ ഒരു വീട് കണ്ടത്.അവർ ചോദിക്കാനും പറയാനും ഒന്നും നിൽക്കാതെ വീടിന്റെ പൂട്ടു തകർത്തു അകത്തു കയറി.എന്നാൽ, മോഷ്ടാക്കൾ ആയ അവരെ അമ്പരപ്പിച്ചു കൊണ്ടുള്ള സംഭവങ്ങൾ ആണ് അവിടെ നടന്നത്.അവർ അവിടെ കണ്ടത് എന്തായിരുന്നു?അവരുടെ പിന്നീടുള്ള അനുഭവങ്ങൾ ആണ് Villains എന്ന സിനിമ അവതരിപ്പിക്കുന്നത്.

  സ്ഥിരം home intrusion സിനിമ എന്ന വിചാരത്തിൽ ആണ് സിനിമ കണ്ടു തുടങ്ങിയത്.സിനിമയുടെ പേരിൽ ഉള്ള വില്ലന്മാർ ഇവരാണെന്നും കരുതി.എന്നാൽ പ്രതീക്ഷകളെ മാറ്റി കൊണ്ടു സിനിമയുടെ സ്വഭാവം മാറുകയാണ് ചെയ്തത്.ഒരു സൈക്കോ ത്രില്ലർ ആയി സിനിമ മാറാൻ അധികം താമസമുണ്ടായില്ല.ജോർജ്, ഗ്ലോറിയ എന്നീ കഥാപാത്രങ്ങൾ ശരിക്കും വേറെ ഒരു ലോകത്തു ജീവിക്കുന്ന ആളുകളെ പോലെ ആണ് തോന്നിയത്.ശരിക്കും വെറുപ്പ് തോന്നുന്ന കഥാപാത്രങ്ങൾ.

  ശരിക്കും ഈ സിനിമ വില്ലന്മാരുടെ കഥയാണ്.ഒറ്റ അന്വേഷണം മാത്രമേ ഉള്ളൂ.വില്ലന്മാരിൽ നല്ല വില്ലൻ ചീത്ത വില്ലൻ എന്നൊന്നും ഇല്ലങ്കിലും ഇവിടെ ആരാണ് നന്മ ഉള്ള വില്ലൻ ,തിന്മ അധികം ഉള്ള വില്ലൻ എന്ന കണക്കെടുപ്പിൽ ആണ് കഥ പോകുന്നത്.

 Home Intrusion സിനിമകളിൽ അടുത്തു ഇറങ്ങിയതിൽ വച്ച് തരക്കേടില്ലാത്ത ചിത്രം ആണ് Villains.എനിക്ക് എന്തായാലും സിനിമ ഇഷ്ടമായി.

  Amazon Prime ൽ ചിത്രം ലഭ്യമാണ്.

ചിത്രത്തിന്റെ ടെലിഗ്രാം ചാനൽ ലിങ്ക്  t.me/mhviews യിൽ ലഭ്യമാണ്.

1283. I See You(English, 2019)

 1283. I See You(English, 2019)

          Mystery

   സൈക്കിൾ ഓടിച്ചു കൊണ്ടു കാടിന്റെ അടുത്തുള്ള പാതയിലൂടെ പോയിരുന്ന പത്തു വയസ്സുകാരനെ കാണാതായി.കേസന്വേഷണം നടത്തുന്ന ഗ്രെഗ് എന്ന പൊലീസ് ഉദ്യോഗസ്ഥൻ ആണ്.ഇതേ സമയം അയാളുടെ വീട്ടിലും ചില പ്രശ്നങ്ങൾ നടക്കുക ആയിരുന്നു.കുടുംബ പ്രശ്നങ്ങൾക്ക് ഒപ്പം തീരെ പ്രതീക്ഷിക്കാത്ത ഒരു സംഭവവും കൂടി ഉണ്ടായിരുന്നു അതിനു അകമ്പടിയായി.ഇതിന്റെ ഇടയിൽ ആണ് മറ്റൊരു വിവരം പുറത്തു വരുന്നത്.വർഷങ്ങൾക്കു മുൻപ് നടന്ന സമാനമായ കുട്ടികളുടെ തിരോധാനവും ആയി ഇപ്പോഴത്തെ സംഭവത്തിനു ഉള്ള ബന്ധം.ഇതു കേസിനെ കുറിച്ചുള്ള ദുരൂഹത കൂട്ടി.എന്നാൽ അന്നത്തെ കേസിലെ പ്രതിയെ  പോലീസ് പിടികൂടുകയും, അയാൾ ഇപ്പോൾ ജയിലിലും ആണ്.ഒരു കോപ്പി ക്യാറ്റ് കുറ്റവാളിയുടെ സാന്നിധ്യം ഉണ്ടോ ഇവിടെ?അതോ മറ്റെന്തെങ്കിലും?

  ഒരു ഹാർലാൻ കൊബേൻ സിനിമ/പരമ്പര കാണുന്നത് പോലെ ആയിരുന്നു സിനിമയുടെ കാഴ്ചാനുഭവം.സിനിമയിലുടനീളം കേൾക്കുന്ന eerie music സിനിമയുടെ മൂഡ് നല്ല രീതിയിൽ പ്രേക്ഷകനിൽ എത്തിക്കാൻ സാധിക്കുന്നുണ്ട്.കഥാപരമായി നേരത്തെ പറഞ്ഞ പോലെ കുടിമ്പ ബന്ധങ്ങളിലൂടെ, അവയിലെ ദുരൂഹതകളിലൂടെ ഉണ്ടാക്കിയെടുക്കുന്ന സസ്പെന്സും ട്വിസ്റ്റും എല്ലാം നന്നായി തോന്നി.

  ക്ളൈമാക്സിലേക്കി പോകുന്നതിനു മുന്നേ രണ്ടാമതൊരു കഥ കൂടി വന്നതോടെ നമ്മൾ പ്രതീക്ഷിക്കുന്ന ഒരു ട്വിസ്റ്റിൽ നിന്നും കഥ മാറുകയാണ്.ഒരു പക്ഷെ സിനിമയിൽ പലയിടത്തും വന്ന ചില ചോദ്യങ്ങൾക്ക് മറുപടി കൂടി ആയി മാറി അതു.

  Phrogging എന്താണെന്ന് അറിയാമോ?ചില സിനിമകളിൽ കണ്ടിട്ടുണ്ടാകും പലരും ഈ ഒരു സാഹചര്യം.എന്തായാലും സിനിമ കാണുമ്പോൾ കുറേക്കൂടി പ്രേക്ഷകന് ലഭിക്കും.അതു പോലെ ആ കുട്ടിയുടെ തിരോധാനത്തിന് പിന്നിൽ ആരാണെന്നും അറിയണ്ടേ?? Amazon Prime ൽ സിനിമ ലഭ്യമാണ്.

   എനിക്ക് മൊത്തത്തിൽ ചിത്രം ഇഷ്ടമായി.Prime ൽ സിനിമ ഉണ്ടോ എന്ന് നോക്കാതെ ടെലിഗ്രാമിൽ നിന്നും ഡൌൺലോഡ് ചെയ്തു കണ്ടു തുടങ്ങിയത് വേറെ ഏതോ പടമായിരുന്നു.അതു കൊണ്ടു തന്നെ എങ്ങനെ എങ്കിലും കാണണം എന്ന ആഗ്രഹം ആണ് Prime ൽ എത്തിച്ചത്. സിനിമ കണ്ടതിനു ശേഷം അഭിപ്രായം പറയണേ.

1282. The Adventures of Tintin: The Secret of the Unicorn (English, 2011)

 1282. The Adventures of Tintin: The Secret of the Unicorn (English, 2011)

         Adventure, Mystery, Action, Animation

  Tintin ചെറുപ്പം മുതലേ ഇഷ്ട കഥാപാത്രം ആയിരുന്നു. The Week ൽ വരുന്ന ഒറ്റ പേജ് കാർട്ടൂണിനായി അതിറങ്ങുന്ന ദിവസം കാത്തിരിക്കുമായിരുന്നു.വായനയുടെ ലോകത്തിൽ Tintin എന്ന Hergeയുടെ വിഖ്യാതമായ കഥാപാത്രത്തിന് വലിയ ഒരു പങ്കുണ്ടായിരുന്നു. പൂമ്പാറ്റ, ബാലരമ തുടങ്ങിയവയുടെ കളർ അല്ലാത്ത പേജുകളിൽ ആണ് വായന തുടങ്ങിയത്.അന്നത്തെ  പേജുകളുടെ മണം പോലും വലിയ നൊസ്റ്റാൾജിയ ആണ്.എണ്പതുകളിൽ ജനിച്ചു തൊണ്ണൂറുകളിൽ സ്ക്കൂളിൽ പോയിരുന്നവർക്ക്  ഒക്കെ മറക്കാൻ പറ്റാത്ത അത്ര നൊസ്റ്റാൾജിയ ആണ് ഇവയൊക്കെ.

    കഴിഞ്ഞ ദിവസം വീട്ടിൽ മകൻ പുസ്തകം വായിക്കൻ ഉള്ള താല്പര്യം പറഞ്ഞപ്പോൾ ആണ് Tintin കോമിക്‌സ് എവിടെയെങ്കിലും കിട്ടുമോ എന്നു അന്വേഷണം തുടങ്ങിയത്.നോക്കിയപ്പോൾ ടോറന്റിൽ മുഴുവനും കിടക്കുന്നു.എന്തായാലും എനിക്ക് വായിക്കാൻ ആയി.അവനു പുസ്തകം ആയി തന്നെ ഒപ്പിച്ചു കൊടുക്കണം.എന്തായാലും ആ അന്വേഷണത്തിന്റെ സമയത്താണ് Tubi TV യിൽ സ്പീൽബെർഗിന്റെ 2011 ലെ സിനിമ കിടക്കുന്നത് കണ്ടത്.നേരത്തെ കണ്ടതാണെങ്കിലും ഒന്നൂടി കണ്ടു.

    സ്പീൽബർഗ് 15%  ലൈവ് ആക്ഷനും 85% അനിമേഷനും ആണെന്ന് പറഞ്ഞു അവതരിപ്പിച്ച ചിത്രത്തിലെ ആനിമേഷൻ ആണ് Up നോടൊപ്പം എനിക്ക് ഏറ്റവും ഇഷ്ടപ്പെട്ടത്.Herge യുടെ രണ്ടു ഭാഗങ്ങൾ ഉള്ള കഥയിലെ ആദ്യ ഭാഗവും ,Zootopia യും ഈ ഒരു വിഭാഗത്തിൽ എനിക്ക് ഇഷ്ടപ്പെട്ട ആനിമേഷൻ ചിത്രങ്ങൾ.

  Tintin  '90 കളുടെ തുടക്കത്തിൽ ഒക്കെ ആണെന്ന് തോന്നുന്നു ഇൻഡ്യയിൽ കൂടിത്തൽ പരിചിതം ആയത്.ബംഗാളിയിൽ Tintin വളരെ പ്രശസ്തനും ആയിരുന്നു.രണ്ടു പ്രാവശ്യം ഇന്ത്യ Tintin കോമിക്സിൽ വന്നിട്ടും ഉണ്ട് . എന്തായാലും ഇൻഡ്യയിൽ അത്ര അപരിചിതൻ അല്ലായിരുന്നു Tintin.ഇടയ്ക്കു Tintin നോടുള്ള ആരാധന മൂത്ത് ഹെയർ സ്റ്റൈൽ അതു പോലെ ആക്കാൻ നോക്കിയെങ്കിലും നാട്ടുകാർ "പച്ചക്കുതിര" യിലെ ആകാശ് മോൻ വിളി തുടങ്ങിയപ്പോൾ നിർത്തേണ്ടി വന്നതാണ് ജീവിതത്തിൽ ഉള്ള Tintin സ്വാധീനം.

  നേരത്തെ പറഞ്ഞ പോലെ Herge ന്റെ രണ്ടു ഭാഗങ്ങൾ ഉള്ള കഥയിലെ ആദ്യ ഭാഗം ആണ് സിനിമ ആയി വന്ന  The Adventures of Tintin: The Secret of the Unicorn. രണ്ടാം ഭാഗത്തിന്റെ പേര് Red Rackham's Treasure എന്നുമാണ്.യാദൃച്ഛികമായി ഒരു കപ്പലിന്റെ miniature വാങ്ങിയ Tintin എന്നാൽ അവൻ അറിയാതെ തന്നെ വലിയ ഒരു ലെഗസിയുടെ ഭാഗം ആവുകയായിരുന്നു.അതിന്റെ ഭാഗമായി അവനെ തപ്പി ആളുകൾ വന്നു തുടങ്ങി.Tintin ലെ അന്വേഷണ കുതുകി ഉണർന്നു.സ്നോയി കൂടി കൂടിയപ്പോൾ മികച്ച ഒരു സാഹസിക കഥ കൂടി ആയി മാറി കഥ. Tintin ന്റെ ഉറ്റ സുഹൃത്തായ ക്യാപ്റ്റൻ Haddock നെ പരിചയപ്പെടുന്നതും ഈ കഥയിലൂടെ ആണ്.

  ബെല്ജിയൻ ആയ Tintin അവരുടെ സംസ്ക്കാരത്തിന്റെ ഭാഗം കൂടി ആയിരുന്നു.കുറച്ചു വർഷങ്ങൾക്കു മുൻപ് നടന്ന ബോംബ് ആക്രമണ സമയത്തു ആയിരുന്നു എന്ന് തോന്നുന്നു പല പോസ്റ്ററുകളും Tintin ആയിരുന്നു കഥാപാത്രം.സിനിമയെ കുറിച്ചു അധികം ഒന്നും പറയുന്നില്ല. Tintin-Herge- Spielberg.ഇതിന്റെ അപ്പുറം എന്താണ് പറയേണ്ടത് അല്ലെ?സിനിമ കാണാത്തവർ വളരെ കുറവായിരിക്കാം.കണ്ടില്ലേൽ തീർച്ചയായും കാണണം. സിനിമ അത്ര മികച്ചതായി തന്നെ അവതരിപ്പിച്ചിട്ടുണ്ട്.കുട്ടികളെ കാണിച്ചു തുടങ്ങൂ.അവർക്കും ഇഷ്ടം ആകും.ഒപ്പം Tintin കഥകളും, സാഹസികതയും, കുറ്റാന്വേഷണവും ഒക്കെ അടങ്ങിയ വലിയ ഒരു ലോകത്തിലേക്ക്‌ കയറി ചെല്ലാൻ inspire ചെയ്യും അതു.

 Tubi TV യിൽ ഫ്രീ ആയും Netflix സബ്സ്ക്രിപ്ഷനോടും ഒപ്പം സിനിമ കാണാൻ സാധിക്കും.

സിനിമയുടെ ടെലിഗ്രാം ചാനൽ ലിങ്ക് t.me/mhviews ൽ ലഭിയ്ക്കും.

 More movie suggestions @www.movieholicviews.blogspot.ca

1281. My Friend Dahmer(English, 2017)

 

1281. My Friend Dahmer(English, 2017)
          Drama, Biography, Horror

"The End is the Beginning"

Synopsis:

    ജെഫ്രി ഡാമർ ഒരു പ്രത്യേകതരം ടീനേജർ ആയിരുന്നു.വഴിയിൽ ചത്തു കിടക്കുന്ന മൃഗങ്ങളെ എടുത്തു ആസിഡിൽ മുക്കി വച്ചു, മാംസത്തിന്റെ ഉള്ളിലായി എന്താകും ഉണ്ടാവുക എന്ന ചോദ്യം ആയിരുന്നു അവനെ ഹരം പിടിപ്പിച്ചത്.സുഹൃത്തുക്കൾ അധികം ഇല്ലാതിരുന്ന അവൻ പിന്നീട് അവന്റെ കോമാളിത്തരം ഉപയോഗിച്ചു സുഹൃത്തുക്കളെ നേടി.അവന്റെ മാതാപിതാക്കൾ വേർപിരിഞ്ഞു.പിന്നീട് മദ്യത്തിന് അടിമപ്പെടുകയും, പുരുഷന്മാരോട് അഭിനിവേശം ഉണ്ടാവുകയും ചെയ്തു.

  പറഞ്ഞു വരുന്നത് ഡാമറിന്റെ കഥയാണ്.ചുരുങ്ങിയ കാലം കൊണ്ട് 17 പുരുഷന്മാരെ കൊലപ്പെടുത്തിയ, അമേരിക്കയിലെ ഏറ്റവും കുപ്രസിദ്ധൻ ആയ പരമ്പര കൊലയാളികളിൽ ഒരാളുടെ കഥ.

My Views:

ഡാമറിന്റെ സ്ക്കൂൾ സുഹൃത്തായ  ഡർഫ് അവതരിപ്പിച്ച ഗ്രാഫിക് നോവലിനെ ആസ്പദമാക്കിയാണ് ചിത്രം അവതരിപ്പിച്ചിരിക്കുന്നത്. 'ഒരു സീരിയൽ കില്ലറുടെ കുട്ടിക്കാലം" എന്നു ധൈര്യമായി പേരു നൽകാൻ പറ്റിയ ചിത്രം.സുഹൃത്തുക്കളെ നേടാൻ ആയി കോമാളി ആയി മാറുന്ന, അസുഖങ്ങൾ ഉള്ള ആളുകളെ പോലെ പെരുമാറുന്ന, അവരെ വികലമായി അവതരിപ്പിച്ചു കയ്യടി നേടാൻ ശ്രമിക്കുന്ന എത്ര ആളുകളെ നമുക്കറിയാം?ചുരുക്കം ആയി ഉണ്ടെങ്കിൽ പോലും അതു ഒരു മാനസിക വൈകൃതം ആയിരിക്കും.

സമൂഹം ആണ് ജെഫ്രിയെ ഇങ്ങനെ ആക്കി തീർത്തത് എന്നു പൂർണമായും പറയാൻ കഴിയില്ല.ഒരു പക്ഷെ അങ്ങനെ ആണെങ്കിലും പ്രായത്തിന്റെ രസത്തിൽ ഇരയാക്കപ്പെട്ട ആൾ എന്നു വിളിക്കാം.അവന്റെ ചിന്തകൾ, അവന്റെ താൽപ്പര്യങ്ങൾ ഒക്കെ നമ്മൾ നോർമൽ എന്നു വിളിക്കാവുന്ന ഒരു രീതിയിൽ അല്ലായിരുന്നു.പ്രോം നൈറ്റിന് കൊണ്ടു പോയ പെണ്കുട്ടിയുടെ കാര്യം നോക്കുക.

  ഇത്തരത്തിൽ ഉള്ള ആളുകളെ കുറിച്ചു പഠിക്കാൻ താൽപ്പര്യം ഉള്ളവർക്ക് സൂക്ഷ്മമായി പഠിക്കാൻ ഉള്ള ഒരു സ്റ്റഡി മെറ്റീരിയൽ ആയി ഈ ചിത്രത്തെ കാണാവുന്നതാണ്.പ്രത്യേകിച്ചും ഇത്തരത്തിൽ ഉള്ള സ്വഭാവങ്ങൾ ഉള്ള കുട്ടികളുമായി ജോലിയുടെ ഭാഗമായി കണ്ടു മുട്ടേണ്ടി വന്നിട്ടുള്ളത് കൊണ്ടു തന്നെ അവിശ്വസനീയമായി ഡാമറിന്റെ കഥ തോന്നിയില്ല.ഗ്രാഫിക് നോവൽ എന്ന നിലയിൽ ഉള്ള സ്വാതന്ത്ര്യം കഥയിൽ എടുത്തിട്ടുണ്ട് എന്നു പറഞ്ഞാൽ പോലും അസാധാരണം അല്ല ഇത്തരം സ്വഭാവം എന്നു തോന്നുന്നു.

  പതിഞ്ഞ താളത്തിൽ ആണ് ചിത്രം പോകുന്നത്.ജെഫ്രിയെ അവതരിപ്പിച്ച റോസ് ലിഞ്ച് ശരിക്കും ഞെട്ടിച്ചു.ആ ഒരു ശരീര ഭാഷ സിനിമയിലുടനീളം മറക്കാതെ അവതരിപ്പിച്ചു എന്നത് തന്നെ കൗതുകകരം ആയിരുന്നു.

  ആദ്യം പറഞ്ഞ പോലെ; ഈ സിനിമയുടെ അവസാനം ആണ് ചില കാര്യങ്ങളുടെ തുടക്കം.ക്ളൈമാക്സിലേക്കു പോകുമ്പോൾ റേഡിയോയിൽ ഒരു പാട്ട് കേൾക്കുന്നുണ്ട് പശ്ചാത്തലത്തിൽ. ക്രിസ്റ്റഫർ ബ്ലൂവിന്റെ " It's Not Too Late". അതിലെ ഒരു വരിയുണ്ട്.' It's Not Too Late My Friend' എന്നു.പ്രണയത്തെ കുറിച്ചു ഉള്ള പാട്ടാണെങ്കിലും ജെഫ്രി ഡാമറിന്റെ ജീവിതത്തിൽ അതു വരെ കാത്തിരുന്ന രക്തം കൊണ്ടു ചുവന്ന, മാംസത്തിന്റെ ഉള്ളിൽ എന്താണ് ഉള്ളത് എന്നു അറിയാൻ ഉള്ള അവന്റെ ജിജ്ഞാസ ആയിരിക്കണം അവിടെ പ്രണയം ആയി മാറുന്നത്.ഒപ്പം അവൻ കാമുകനും ആയി മാറുന്നു!!

  അവസരം കിട്ടിയാൽ കാണുക.!!!

  ചിത്രം ഫ്രീ ആയി Tubi TV യിൽ കാണാവുന്നതാണ്.നിങ്ങൾ താമസിക്കുന്ന സ്ഥലത്തു Tubi TV കിട്ടുന്നുണ്ടെങ്കിൽ അതു ഉപയോഗിക്കുക.ഫ്രീ ആണ്.കുഴപ്പമില്ലാത്ത സിനിമ കലക്ഷനും ഉണ്ട്.ലീഗലും ആണ്.

ചിത്രത്തിന്റെ ടെലിഗ്രാം ചാനൽ ലിങ്ക് t.me/mhviews യിൽ ലഭ്യമാണ്.