875.RANSOM(ENGLISH,1996)

    പണക്കാരന്‍-വില്ലന്മാര്‍ തട്ടി കൊണ്ട് പോയ കുട്ടി.Hostage സിനിമകളിലെ സ്ഥിരം ഒരു തീം ആണെന്ന് തോന്നിയിട്ടുണ്ട്.മേല്‍ ഗിബ്സന്‍ നായകനായി അഭിനയിച്ച Ransom അത്തരത്തില്‍ ഒരു പ്രമേയം ഉള്ള ചിത്രമാണ്.അമേരിക്കയിലെ എയര്‍ലൈന്സുകളില്‍ നാലാമത്തെ സ്ഥാനത്തുള്ള കമ്പനിയുടെ ഉടമയ ടോം മുല്ലെന്‍ ഭാര്യയും ഏക മകനും അടങ്ങുന്ന കുടുംബവുമായി കഴിയുകയാണ്.

   ഒരു ദിവസം അവരുടെ മകന്‍ അജ്ഞാതര്‍ തട്ടി കൊണ്ട് പോകുന്നു.മോചനദ്രവ്യമായി പണം ആവശ്യപ്പെടുന്നു.എന്നാല്‍ തന്റെ ഭൂതക്കാലത്തിലെ ഒരു ചെയ്തിയില്‍ പലപ്പോഴും കുറ്റ ബോധം തോന്നുന്ന ടോം ആദ്യം ഇത്തരം ഒരു അവസ്ഥയില്‍ തന്റെ ചെയ്തികളുടെ ഫലം ആണെന്ന് കരുതി ദുര്‍ബലന്‍ ആകുന്നു.തട്ടിക്കൊണ്ടു പോയവരുടെ ആവശ്യങ്ങള്‍ക്ക് അനുസരിച്ച് പ്രവര്‍ത്തിക്കാന്‍ ശ്രമിച്ചുവെങ്കിലും FBI കുട്ടിയെ കണ്ടെത്താന്‍ അവരെ സഹായിക്കുന്ന ശ്രമത്തിലാണ്.


  എന്നാല്‍ ഒരു അവസരത്തില്‍ കുട്ടിയെ ഇനി തിരികെ കിട്ടും എന്ന് ഉറപ്പു അയാള്‍ക്ക്‌ തോന്നുമ്പോള്‍ ടോം എല്ലാവരെയും അമ്പരിപ്പിച്ചു കൊണ്ട് ഒരു നീക്കം നടത്തുന്നു.മനസ്സില്‍ ദേഷ്യം തോന്നിയ ഒരു പിതാവിനെ സംബന്ധിച്ചിടത്തോളം വളരെയധികം റിസ്ക്കും കുഴപ്പവും പിടിച്ച ഒന്നായിരുന്നു അത്.സ്ഥിരം ക്ലീഷേ ചിത്രങ്ങളില്‍ നിന്നും Ransom എന്ന ചിത്രത്തിനെ വ്യത്യസ്തമാക്കുന്ന ഒരു സംഭവം അതായിരുന്നു.സാധാരണ രീതിയില്‍ പോകേണ്ടിയിരുന്ന ഒരു പക്ഷെ ബോര്‍ ആകുമായിരുന്ന കഥയുടെ ജീവന്‍ നിലനിര്‍ത്തിയത് ആ ഒരു സംഭവം ആയിരുന്നു.


ഒരു ആക്ഷന്‍ /ത്രില്ലര്‍ എന്ന ന്നിലയില്‍ മെച്ചപ്പെടുത്താന്‍ ധാരാളം സംഭവങ്ങള്‍ അവിടെ നിന്നും ഉണ്ടെങ്കിലും അതിനായി സിനിമയുടെ പ്രവര്‍ത്തകര്‍ അധികം ശ്രമിച്ചില്ല എന്ന് തോന്നുന്നു.എന്നാല്‍ക്കൂടിയും ധൈര്യപൂര്‍വമായ അത്തരം ഒരു നീക്കം അപ്രതീക്ഷിതമായിരുന്നു എന്നത് കണക്കിലെടുക്കുമ്പോള്‍ ചിത്രം അത്ര മോശമായി തോന്നിയുമില്ല.ത്രില്ലര്‍ സിനിമയുടെ ആരാധകര്‍ക്ക് കണ്ടു നോക്കാവുന്ന ഒരു സാധാരണ ഹോളിവുഡ് ചിത്രമാണ് Ransom.


875.Ransom
       English,1996
       Thriller,Action
        Dir:Ron Howard
        Stars:Mel Gibson, Gary Sinise, Rene Russo 

874.MURDER SHE SAID(ENGLISH,1961)

     "ട്രെയിനില്‍ വച്ച് കണ്ട കൊലപാതകത്തിന്റെ രഹസ്യങ്ങളിലേക്ക്-Murder, She Said"


     ഒരു മിന്നായം പോലെ ആണ് മിസ്‌.മാര്‍പിള്‍ സമീപത്തുള്ള ട്രെയ്നില്‍ ഒരു യുവതിയെ ആരോ കഴുത്ത് ഞെരിച്ചു കൊല്ലാന്‍ ശ്രമിക്കുന്നത് കാണുന്നത്.അവര്‍ അധികാരികളെ വിവരം അറിയിച്ചെങ്കിലും അത്തരം ഒരു സംഭവം നടന്നിരിക്കാന്‍ സാധ്യതയില്ല എന്ന് പോലീസുകാരന്‍ വീട്ടില്‍ വന്നു പറയുമ്പോള്‍,സ്വന്തം കണ്ണുകളെ വിശ്വസിച്ച മിസ്‌.മാര്‍പ്പിള്‍ ആ സംഭവത്തിന്റെ നിഗൂഡത കണ്ടെത്താന്‍ ശ്രമിക്കുന്നു.കുറ്റാന്വേഷണ കഥകള്‍ വളരെയധികം സ്വാധീനം ചെലുത്തുന്ന അല്‍പ്പം പ്രായമുള്ള മിസ്‌ മാര്‍പ്പിള്‍ ആ സംഭവം നടന്നിരിക്കാന്‍ സാധ്യതയുള്ള സ്ഥലം കണ്ടെത്താന്‍ ശ്രമിക്കുന്നു.അവര്‍ അവിടേക്ക് യാത്ര ആകുന്നു.

  Murder, She Said, അഗത ക്രിസ്റ്റിയുടെ  4.50 from Paddington എന്ന നോവലിനെ ആസ്പദമാക്കിയാണ് അവതരിപ്പിച്ചിരിക്കുന്നത്.യഥാര്‍ത്ഥ കഥയില്‍ നിന്നും അല്‍പ്പം വ്യത്യസ്തതകള്‍ വരുത്തിയാണ് ചിത്രം അവതരിപ്പിച്ചിരിക്കുന്നത്.അഗത ക്രിസ്റ്റിയുടെ കുറ്റാന്വേഷണ തല്‍പരരായ കഥാപാത്രങ്ങളില്‍ 3 ചിത്രങ്ങളില്‍ അവതരിപ്പിക്കപ്പെട്ട മിസ്‌.മാര്‍പ്പിളിനും പ്രധാനപ്പെട്ട സ്ഥാനമുണ്ട്.അഗത ക്രിസ്റ്റിയുടെ നോവലുകള്‍ ഒരു തലമുറയിലെ കുറ്റാന്വേഷണ കഥകള്‍ക്കും കഥാപാത്രങ്ങള്‍ക്കും അവ അവതരിപ്പിക്കപ്പെട്ട രീതികളിലും reference ആയിരുന്നു എന്ന് പറഞ്ഞാല്‍ അതിശയോക്തി ആകില്ല.വായിച്ചു പോയ പല കുറ്റാന്വേഷണ നോവലുകള്‍ക്കും ഇത്തരത്തില്‍ ഉള്ള സാദൃശ്യം കാണാം.


     ഒരു കുറ്റാന്വേഷണ കഥ വായിക്കുന്ന അതെ മനസ്സോടെ കണ്ടിരിക്കാവുന്ന ചിത്രമാണ് Murder,She Said.ഒരു വലിയ കുടുംബവും അവിടെ നടക്കുന്ന നിഗൂഡമായ മറ്റു കൊലപാതകങ്ങളും എല്ലാം കൂടി ചേരുമ്പോള്‍ ഇത്തരത്തില്‍ ഉള്ള ചിത്രങ്ങളുടെ ആരാധകര്‍ക്ക് നല്ല ഒരു അനുഭവം ആയി മാറുന്നു.മാര്‍ഗരറ്റ് രൂതര്ഫോര്ദ് അവതരിപ്പിച്ച മിസ്‌.മാര്‍പ്പിള്‍ എന്ന കഥാപാത്രം രസകരവും അതെ സമയം ശ്രദ്ധേയമായ കൂരമ ബുദ്ധിയും ഇഴകി ചേര്‍ന്ന ഒന്നായിരുന്നു.


  874.Murder,She Said
   English,1961
   Mystery
  Dir:-George Pollock
  Stars:Margaret Rutherford, Arthur Kennedy, Muriel Pavlow

873.FRONT OF THE CLASS(ENGLISH,2008)

"Tourette Syndrome" എന്ന അപൂര്‍വ രോഗത്തെ അതി ജീവിച്ച ബ്രാഡിന്റെ കഥ.


    'Tourette Syndrome'  -ഈ പേര് ടൈപ്പ് ചെയ്യുമ്പോള്‍ അതിന്റെ അടിയില്‍ ചുവന്ന വര കാണിക്കുന്നു.അതായതു തെറ്റായ ഒരു വാക്കാണ്‌ ടൈപ്പ് ചെയ്തതെന്ന് അര്‍ത്ഥം.അതെ,Tourette Syndrome അങ്ങനെ ഒരു അവസ്ഥയാണ്.ഒരു വിധം ഇത് പോലത്തെ രോഗങ്ങളുടെ പേരുകള്‍ മനസ്സിലാകുന്ന ഗൂഗിളിനു പോലും വലിയ അറിവുണ്ടെന്ന് തോന്നുന്നില്ല ഈ വാക്ക്.അതാണല്ലോ അങ്ങനെ കാണിച്ചത്.ഇത് തന്നെയാണ് ഈ അവസ്ഥയുടെ ഭീകരമായ വശവും.'അജ്ഞത'.തലച്ചോറിനെ സംബന്ധിക്കുന്ന ചില അവസ്ഥകള്‍  Tourette Syndrome നു കാരണം ആകുന്നതു.എന്നാല്‍ അത്തരത്തില്‍ ഒരു അവസ്ഥയില്‍ ഉള്ള ആളുടെ സാമൂഹികമായ ഇടപ്പെടലുകള്‍ പലപ്പോഴും തെറ്റിദ്ധരിക്കപ്പെടും.അയാളെ ശല്യക്കാരന്‍ ആയും,സമൂഹത്തില്‍ ഇടപ്പെടാന്‍ കൊള്ളാത്ത ആളായും കണക്കാക്കും.കാരണം.നമ്മള്‍ ആരും പരിചിതര്‍ അല്ല ഈ രോഗാവസ്ഥയെ.


   'ബ്രാഡ്' ചെറുപ്പം മുതല്‍ ശാന്ത ശീലന്‍ ആയിരുന്നു.പ്രത്യേകിച്ചും പ്രശ്നങ്ങള്‍ ഒന്നും ഇല്ലാതിരുന്ന അവന്‍ പിന്നീട് ചില അപ ശബ്ദങ്ങള്‍ പുറപ്പെടുവിച്ചു തുടങ്ങി.കണക്ക് വിഷമകരമായ ആ  വിദ്യാര്തിക്ക് ടെന്‍ഷന്‍ കൂടുമ്പോള്‍ അത്തരത്തില്‍ ഉള്ള ശബ്ദവും കൂടുമായിരുന്നു.എന്നാല്‍ അധ്യാപകര്‍ ,സഹപാഠികള്‍ എന്ന് വേണ്ട അവന്റെ സ്വന്തം അച്ഛന്‍ പോലും ശല്യക്കാരന്‍ ആയി അവനെ മുദ്ര കുത്തി.എന്നാല്‍ അവന്റെ അമ്മ അങ്ങനെ അവനെ ഉപേക്ഷിക്കാന്‍ തയ്യാറല്ലായിരുന്നു.ഡോക്റ്റര്‍ പോലും സമാനമായ അഭിപ്രായം പറഞ്ഞപ്പോള്‍ അക്കാലത്തെ പരിമിത സൌകര്യങ്ങളില്‍ നിന്ന് കൊണ്ട് മെഡിക്കല്‍ പുസ്തകങ്ങളില്‍ നിന്നും അവര്‍ കണ്ടു പിടിച്ചു.ബ്രാഡ് 'Tourette Syndrome' എന്ന അപൂര്‍വ അവസ്ഥ ഉള്ള ആളാണ്‌ എന്ന്.


  നല്ല വിദ്യാഭ്യാസം ലഭിച്ച ബ്രാഡ് എന്നാല്‍ തന്റെ സ്വപ്നങ്ങള്‍ക്ക് വിലങ്ങു തടി ആയി തന്റെ അസുഖത്തെ കാണുന്നില്ല.ഒരു ടീച്ചര്‍ ആവുക എന്നതായിരുന്നു അവന്റെ ഉദ്ദേശം.അതിനായി അവനെ സഹായിച്ച മറ്റൊരാള്‍ കൂടി ഉണ്ടായിരുന്നു.അവന്റെ സ്ക്കൂളിലെ പ്രിന്‍സിപ്പാള്‍.ഒരു പക്ഷെ ബ്രാഡിന്റെ അമ്മയും  പ്രിന്‍സിപ്പാളും ഇല്ലായിരുന്നെങ്കില്‍ ഒരു പക്ഷെ അവന്റെ കഥ പുസ്തകം ആയും സിനിമ ആയും നമ്മുടെ മുന്നില്‍ എത്തില്ലായിരുന്നു.തീര്‍ച്ച!!തന്റെ ശാരീരികാവസ്ഥ ഒരു സാധാരണ മനുഷ്യനായി ജീവിക്കുന്നതില്‍ നിന്നും തന്നെ തടയാന്‍ കഴിയില്ല എന്നുള്ള ആത്മവിശ്വാസം ആയിരുന്നു ബ്രാഡിന്റെ ഏറ്റവും വലിയ കൈ മുതല്‍.ബ്രാഡിന്റെ സ്വപ്നങ്ങളിലേക്കുള്ള യാത്രയാണ് ബാക്കി ചിത്രം.


ടി വി സിനിമകളിലെ 'ക്ലാസിക്' എന്ന് വിശേഷിപ്പിക്കാം.അത്ര മാത്രം പോസിറ്റീവ് എനെര്‍ജി ആയിരുന്നു ഈ ചിത്രം നല്‍കിയത്.'Hallmark Hall of Fame ' ടി വി ചിത്രമായി അവതരിപ്പിക്കപ്പെട്ട ചിത്രം പിന്നീട് CBS ല്‍ സംപ്രേക്ഷണം ചെയ്യുകയും ചെയ്തു.ജെയിംസ് വോക്ക് എന്ന പുതുമുഖ നടന്‍ ആയിരുന്നു പ്രധാന കഥാപാത്രത്തെ അവതരിപ്പിച്ചത്.എന്നാല്‍ മികച്ച രീതിയില്‍ ,ഒരു ഫീല്‍ ഗുഡ് മൂവി ആക്കി മാറ്റാന്‍ ആ പുതുമുഖത്തിന് തന്റെ കഥാപാത്രത്തിലൂടെ സാധിച്ചു.അത്രയ്ക്കും പോസിറ്റീവ് ആയിരുന്നു അയാളുടെ അഭിനയം.എന്നെന്നും ഓര്‍ക്കുന്ന കഥാപാത്രം ആണ് ഈ ചിത്രത്തിലെ ബ്രാഡ്.

"ഹിച്കി" എന്ന റാണി മുഖര്‍ജീ സിനിമ റിലീസ് ആയപ്പോള്‍ ഒരു സുഹൃത്തിന്റെ സജഷന്‍ ആയിരുന്നു 'Front of the Class' എന്ന ചിത്രം."ഹിച്കി", 'Front of the Class' നു ആസ്പദമായ 'Front of the Class: How Tourette Syndrome Made Me the Teacher I Never Had' എന്ന ബ്രാഡ് കൊഹന്റെ ജീവിത കഥയെ ആസ്പദമാക്കി ആണ് അവതരിപ്പിച്ചിരിക്കുന്നത്.യഥാര്‍ത്ഥത്തില്‍ ഇത്തരത്തില്‍ ഉള്ള ഒരു മനുഷ്യന്‍ ജീവിച്ചിരിപ്പുണ്ട് എന്ന് ചിത്രത്തിന്റെ അവസാനം കാണുമ്പോള്‍ ആണ് കഷ്ടപ്പാടുകളെയും സമൂഹത്തിന്റെ കാഴ്ചപ്പാടുകളെയും മാറ്റി മറിയ്ക്കാന്‍ കഴിയുന്ന മനുഷ്യന്റെ ദൃഡ നിശ്ചയത്തിന്റെ ശക്തിയെ കുറിച്ച് ഓര്‍ത്തു അഭിമാനം തോന്നുന്നത്.തീര്‍ച്ചയായും കണ്ടിരിക്കേണ്ട ചിത്രങ്ങളില്‍ ഒന്നാണ് 'Front of the Class'


873.Front of the Class
       English,2008
       Drama
       Dir:Peter Werner
       Stars:James Wolk, Treat Williams, Dominic Scott Kay
   

872.THE GIRL ON THE TRAIN(ENGLISH,2016)

"റേച്ചല്‍ ട്രെയിനില്‍ വച്ച് കണ്ട കാഴ്ചയും അതിനു പിന്നിലെ ദുരൂഹതകളും'-"The Girl on the Train".


  'അഗത ക്രിസ്റ്റി' യുടെ കഥയെ ആസ്പദമാക്കി നിര്‍മിച്ച ചിത്രമായിരുന്നു 'Murder She Said'.'പോള ഹോക്കിന്സിന്റെ' പ്രഥമ നോവലായ 'The Girl on the Train' ഉം സമാനമായ കഥാഗതി ഉള്ള ചിത്രമാണ്.എന്നാല്‍ കഥയുടെ നിര്‍ണായകമായ വഴിത്തിരുവില്‍ നിന്നും വ്യത്യസ്തമായ രീതിയില്‍ സഞ്ചരിക്കുന്ന രണ്ടു ചിത്രങ്ങളും ആണ്."Murder She Said" കോമഡി ഒക്കെ ചേര്‍ത്ത് ഒരു സ്ഥിരം കുറ്റാന്വേഷണ ചിത്രമായി ആണ് അവതരിപ്പിച്ചിരുന്നത്.എന്നാല്‍ 'The Girl on the Train' ഗൗരവമായ സമീപനം കഥയുടെ അവതരണത്തില്‍ കാണാന്‍ ആകും.

  റേച്ചല്‍ ജീവിതത്തില്‍ ആകെ പരാജയമായിരുന്നു.പ്രധാനമായും അവളുടെ മദ്യപാനം അവളുടെ കുടുംബ ജീവിതം തന്നെ തകര്‍ത്തൂ.ജോലിയും പോയ അവസരത്തില്‍ അവള്‍ എല്ലാ ദിവസവും ട്രെയിനില്‍ അങ്ങോട്ടുമിങ്ങോട്ടും അലക്ഷ്യമായി,മദ്യപാനം ചെയ്തു യാത്ര ചെയ്തു കൊണ്ടിരുന്നു.എല്ലാ ദിവസവും അവള്‍ പോകുമ്പോള്‍ തന്റെ മുന്‍ ഭര്‍ത്താവും കുടുംബവും താമസിക്കുന്ന വീട് അവള്‍ കാണാറുണ്ട്‌.അവരെ ശ്രദ്ധിക്കുകയും ചെയ്യാറുണ്ട്.അത് പോലെ അവളുടെ കാഴ്ചപ്പാടില്‍ ഉള്ള ഏറ്റവും മികച്ച ദമ്പതികള്‍ ആയ സ്ക്കോട്ട്-മേഗന്‍ എന്നിവരെയും.


   അവളുടെ ചിന്തകളില്‍ പലപ്പോഴും ഇവരെല്ലാം വന്നു പോകാറും ഉണ്ടായിരുന്നു.അങ്ങനെ ഉള്ള ഒരു ദിവസം അവള്‍ സ്കോട്ട്-മേഗന്‍ ദമ്പതികളുടെ വീടിന്റെ മുകളിലത്തെ നിലയില്‍ ഒരു കാഴ്ച കണ്ടൂ.റേച്ചല്‍ ഒരിക്കലും പ്രതീക്ഷിക്കാത്ത ഒന്ന്.അതിനു പിന്നാലെ അവള്‍ അറിഞ്ഞത് മേഗന്‍റെ  തിരോധാനം ആയിരുന്നു.എന്നാല്‍ മേഗനെ കാണാതായ ദിവസം റേച്ചല്‍ പരിസര പ്രദേശങ്ങളില്‍ കണ്ടതായ സൂചനകള്‍ ലഭിച്ചു.എന്നാല്‍ മദ്യ ലഹരിയില്‍ ആയിരുന്ന അവള്‍ക്കു അവിടെ എത്തിയതിനു ശേഷം എന്തുണ്ടായി എന്ന് ഒരു അറിവും ഇല്ലായിരുന്നു.പോലീസ് കേസ് വിഷയമായി റേച്ചലിനെ സംശയിക്കുന്നു.എന്നാല്‍ റേച്ചല്‍ അന്ന് കണ്ട ആ കാഴ്ചയുമായി മേഗന്‍റെ തിരോധാനത്തിനു ബന്ധം ഉണ്ടെന്നു കരുതുന്നു.

 ആകെ മൊത്തം സങ്കീര്‍ണമായ അവസ്ഥകളിലൂടെ ആണ് ചിത്രം പിന്നീട് കടന്നു പോകുന്നത്.ദുരൂഹതകള്‍ ഏറെ ഉള്ള കഥാപാത്രങ്ങള്‍.പലരും സമൂഹത്തിന്റെ മുന്നില്‍ മറ്റൊരാളായി അഭിനയിക്കുന്നു,ഉള്ളില്‍ മറ്റൊരു മുഖം ഒളിപ്പിച്ചു കൊണ്ട്.ശതമായ സ്ത്രീ കഥാപാത്രങ്ങളും അവരിലെ നിസഹായതയും എല്ലാം ചിത്രത്തില്‍ അവതരിപ്പിക്കപ്പെടുന്നുണ്ട്.ക്ലൈമാക്സിനോട് അടുക്കുമ്പോള്‍ ചിത്രത്തിന്റെ അത് വരെ ഉള്ള കഥാഗതി തന്നെ മാറുന്നതായി കാണാം.ദുരൂഹതകള്‍ ഏറെ നിറഞ്ഞ ഭംഗിയായി അവതരിപ്പിച്ച ഒരു slow-burner ആണ് 'The Girl on the Train'.മിസ്റ്ററി ത്രില്ലര്‍ ചിത്രങ്ങളുടെ ആരാധകര്‍ക്ക് ഇഷ്ടമാകാന്‍ സാധ്യതയുള്ള ഒന്നാണ് ഈ ചിത്രം.


872.The Girl on the Train 
        English,2016
        Mystery,Drama,Thriller
        Dir:Tate Taylor
        Stars:Emily Blunt, Haley Bennett, Rebecca Ferguson

871.GAME NIGHT(ENGLISH,2018)

        കൂട്ടുകാരും കുടുംബവുമായി എവിടെയെങ്കിലും ഒരു രാത്രി ഒത്തു കൂടുമ്പോള്‍ ശരാശരി മലയാളികള്‍ അല്‍പ്പം ഗോസിപ്പും വെള്ളമടിയും ഒക്കെ ആയി ചിലവഴിക്കും ഭൂരിഭാഗം അവസരങ്ങളിലും.എന്നാല്‍ വിദേശികള്‍ കുറച്ചു കൂടി അത്തരം അവസരങ്ങള്‍ താല്‍പ്പര്യം ഉള്ളത് ആക്കാനായി പലതരം ഗെയിമുകളും ഉള്‍പ്പെടുത്തുന്നു.മലയാളിയുടെ ചീട്ടു കളി മറക്കുന്നില്ല.എന്തായാലും അത്തരത്തില്‍ ചില രാത്രികള്‍ കഴിച്ചു കൂട്ടുന്ന ഒരു കൂട്ടം ആളുകളുടെ കഥയാണ് Game Night അവതരിപ്പിക്കുന്നത്‌.

   വെറുതെ സമയം ചിലവഴിക്കുക എന്നതിലുപരി പലപ്പോഴും ഇത്തരം കളികള്‍ മത്സരത്തിന്റെ പിടിമുറുക്കത്തില്‍ പെടാറുണ്ട്.മാക്സ്-ആനി ദമ്പതികള്‍ ഇത്തരം കളികളുടെ ഇടയില്‍ പരിചയപ്പെട്ടു വിവാഹിതര്‍ ആയവരാണ്‌.മാക്സ് സാധാരണ രീതിയില്‍ ഇത്തരം കളികളില്‍ കേമന്‍ ആണെങ്കിലും അയാളുടെ സഹോദരന്‍ ബ്രൂക്സ് അയാളെ സ്ഥിരമായി കളികളില്‍ പരാജയപ്പെടുത്തുമായിരുന്നു.ജീവിത നിലവാരത്തില്‍ പോലും തന്നെക്കാള്‍ മുന്നില്‍ ഉള്ള കോടീശ്വരനായ എല്ലാവര്ക്കും പ്രിയങ്കരന്‍ ആയ ബ്രൂക്സ് മാക്സിനെ കാണാന്‍ എത്തുന്നു എന്ന് അറിഞ്ഞത് മുതല്‍ അയാളുടെ ആധി കൂടി.

 അവസാനം ബ്രൂക്സ് എത്തുന്നു.പതിവ് പോലെ മാക്സിന്റെ വീട്ടില്‍ വച്ച് അയാളെ പരാജയപ്പെടുത്തിയതിനു ശേഷം മാക്സിനെയും സുഹൃത്തുക്കളെയും ബ്രൂക്സ് സ്വന്തം വീട്ടില്‍ നടക്കാന്‍ പോകുന്ന Game Night നു ക്ഷണിക്കുന്നു.അവരുടെ ജീവിതത്തില്‍ ഇത് വരെയും അനുഭവിച്ചിട്ടില്ലാത്ത ഒരു രാത്രിക്ക് വേണ്ടി എന്ന രീതിയില്‍ ആയിരുന്നു അവര്‍ക്കുള്ള വാഗ്ദാനം.എന്നാല്‍ പ്രതീക്ഷകള്‍ക്കും അപ്പുറം ആയിരുന്നു ആ രാത്രി.അവര്‍ പ്രതീക്ഷിച്ചതിലും സാഹസികമായ ഒരു രാത്രി.

  ആ രാത്രിയുടെ കഥയാണ് രസകരമായ രീതിയില്‍ Game Night അവതരിപ്പിക്കുന്നത്‌.'ജേസന്‍ ബേറ്റ്മാന്‍' സിനിമകളുടെ സ്ഥിരം രീതിയില്‍ അവതരിപ്പിച്ച തമാശ ചിത്രം.ഒപ്പം റേച്ചല്‍ മക് ആഡംസും ഉണ്ട്.Entertainer എന്ന നിലയില്‍ മികച്ച അനുഭവമായിരുന്നു ചിത്രം.ചിരിപ്പിക്കുന്ന ധാരാളം സന്ദര്‍ഭങ്ങള്‍ ചിത്രത്തിലുണ്ട്.ഒപ്പം ചെറിയ ട്വിസ്റ്റുകളും.'Sibling Rivalry'  രസകരമായ രീതിയില്‍ അവതരിപ്പിച്ച ഒരു ചിത്രമാണ് Game Night.കോമഡി-ത്രില്ലര്‍ എന്ന അസ്വാഭാവികമായ ഒരു ഴോന്രെയില്‍ മികച്ചു നിന്ന ഒരു ചിത്രമാണ് Game Night.


871.Game Night
  English,2018
Comedy,Thriller
Dir:John Francis Daley, Jonathan Goldstein
Stars:Jason Bateman, Rachel McAdams, Kyle Chandler

870.24 HOURS TO LIVE(ENGLISH,2017)

'24 Hours To Live'-സ്ഥിരം ഹോളിവുഡ് ഫോര്മുലയിൽ വീണ്ടും ഒരു ആക്ഷൻ ചിത്രം കൂടി!!

Ethan Hawke എന്ന ഒറ്റ പേര് കാരണം ആയിരിക്കും സമ്മിശ്രണ-മോശം അഭിപ്രായം നിരൂപകരിൽ നിന്നും ലഭിച്ച ഈ ചിത്രം പലരും കണ്ടിരിക്കുക.'ക്ളീഷേ' എന്ന വാക്കിന്റെ അന്വർത്ഥം ആക്കുന്ന മറ്റൊരു ചിത്രം ആണ് 24 Hours To Live.

    ഇന്റർപോളിന്റെ കയ്യിൽ നിന്നും Red Mountain എന്ന നിഗൂഢതകൾ ഏറെ നിറഞ്ഞ ഒരു കമ്പനിക്കു വേണ്ടി ,അവരുടെ രഹസ്യങ്ങൾ അറിയാവുന്ന ഒരാളെ കൊല്ലപ്പെടുത്തണം.ട്രവിസ് (Hawke) ആ ഉദ്യമം ഏറ്റെടുക്കുന്നു.ഭാര്യയും മകനും നഷ്ടപ്പെട്ട വേദന മാറാത്ത ട്രവിസ് എന്നാൽ ആ ഉദ്യമത്തിൽ ലഭിക്കാൻ പോകുന്ന വലിയ തുക മോഹിച്ചു തന്റെ ജോലിയിലേക്ക് തിരിക്കുന്നു.
 
എന്നാൽ ഒരു പ്രത്യേക സാഹചര്യത്തിൽ മരണത്തെ നേരിൽ കാണേണ്ടി വരുന്ന ട്രവീസിനും അയാൾ ഏറ്റെടുത്ത ഉദ്യമത്തിനും എന്തു സംഭവിച്ചു എന്നതാണ് കഥ.

  കഥാഗതിയിൽ തന്നെ ഒരു പ്രത്യേകതയും ഇല്ല അല്ലെ?ഇടയ്ക്കു കുറച്ചു sci-fi elements ഉൾപ്പെടുത്തി ആ ക്ളീഷേയെ ഒഴിവാക്കാൻ ശ്രമിക്കുന്നുണ്ടെങ്കിലും അതൊന്നും പുതുമ തോന്നിക്കാൻ മാത്രം എന്തെങ്കിലും ഉള്ളതായി അനുഭവപ്പെട്ടില്ല.

  ഇത്തരം അടി,വെടി,ബോംബ് കഥകൾക്ക് പിന്നെ ഒരു ഗുണമുണ്ട്.ചുമ്മാ അങ്ങു ഇരുന്നു   കാണാം അധികം ബുദ്ധിമുട്ടില്ലാതെ.ഈ സിനിമയും ആ നിലയിൽ നോക്കിയാൽ നല്ലതായിരുന്നു.കുറെ അധികം ഷൂട്ടൗട്ട് രംഗങ്ങൾ,ലോകത്തെ നിയന്ത്രിക്കാൻ ശ്രമിക്കുന്ന ആളുകൾ,അന്താരാഷ്ട്ര കൊലയാളികൾ ,ഇടയ്ക്കു പരിചയപ്പെടുന്ന നായിക തുടങ്ങി സ്ഥിരം ചേരുവകൾ എല്ലാം ഒത്തു ചേർന്ന അധികം ബോർ അടിപ്പിക്കാത്ത ഒരു ശരാശരി അനുഭവം ആയി മാറി "24 Hours To Live"

870.24 Hours To Live
  English,2017
 Action,Thriller
 Dir:Brian Smrz
Stars: Ethan Hawke, Paul Anderson, Rutger Hauer

869.SAVARAKATHI(TAMIL,2018)

"സവരക്കത്തി"- 'മനുഷ്യ സ്വഭാവത്തിന്റെ പഠനം' ,ബ്ളാക് ഹ്യൂമറിലൂടെ!!

ക്രോധം ഒരു മനുഷ്യനെ എത്ര മാത്രം ക്രൂരൻ ആക്കാം??മങ്കേശ്വരൻ എന്ന ഗുണ്ടാ തലവൻ പരോളിന് ശേഷം ജയിലിലേക്ക് തിരിച്ചു പോകുന്ന ദിവസം.സ്വതവേ എന്തിനേയും ആക്രമിക്കാൻ ശ്രമിക്കുന്ന ഒരു കഥാപാത്രം തിരിച്ചു പോകുന്ന വഴി പിച്ചൈ മൂർത്തി എന്ന ബാർബറുമായി ചെറിയ പ്രശ്നങ്ങൾ ഉണ്ടാകുന്നു.എന്നാൽ താൻ തിരിച്ചു പോകുന്നതിനു മുൻപേ പിച്ചൈയെ കൊല്ലും എന്നു മങ്കേശ്വരൻ ശപഥം ചെയ്യുന്നു.

പിച്ചൈ മൂർത്തി അൽപ്പം പിരി ഇളകിയ ആൾ ആണോ എന്ന് വരെ സംശയിക്കാം.അയാൾ പലപ്പോഴും eccentric ആയാണ് പ്രേക്ഷകന് അയാളുടെ ശരീര ഭാഷയിലൂടെ തോന്നുക.തന്റെ കടയിൽ നിന്നും ഭാര്യയുടെ അങ്ങളയുടെ രെജിസ്റ്റർ കല്യാണയത്തിനു പോകവേയാണ് അയാളുടെ ആ ദിവസത്തിൽ അപ്രതീക്ഷിതമായ പലതും സംഭവിക്കുന്നത്.

അബദ്ധത്തിൽ ഉണ്ടായ ഒരു സംഭവത്തിൽ പിച്ചൈയുടെ പ്രതികരണവും അതിനൊപ്പം മങ്കേശ്വരന്റെ ദേഷ്യവും കൂടി ആയപ്പോൾ പ്രശ്നം വഷളായി.പൂർണ ഗർഭിണി ആയ പിച്ചൈമൂർത്തിയുടെ ഭാര്യയായി ഷംന മികച്ച പ്രകടനം ആണ് നടത്തിയത്.കേൾവിക്കു പ്രശ്നമുള്ള കഥാപാത്രമായി അവർ മികച്ചു നിന്നു.സംവിധായകരായ റാമും മിഷ്ക്കിനും ശരിക്കും കഥാപാത്രങ്ങളായി മാറുക കൂടി ചെയ്തപ്പോൾ നല്ല ഒരു സിനിമ ആയി മാറി സവരക്കത്തി.

  ഇടയ്ക്കിടെ ഒരു ത്രില്ലർ സിനിമയുടെ സ്വഭാവങ്ങൾ ഉണ്ടായിരുന്നെങ്കിലും അതിൽ ബ്ളാക് ഹ്യൂമർ കൂടി കലർത്തി ഉള്ള അവതരണം ആയിരുന്നു മിഷ്ക്കിന്റെ സഹോദരൻ ആയ സംവിധായകൻ ആദിത്യ അവതരിപ്പിച്ചത്.മനുഷ്യൻ അവന്റെ സ്വാഭാവികമായ പ്രതികരണങ്ങൾ ഓരോ സന്ദർഭങ്ങളിലും പ്രകടിപ്പിക്കുമ്പോൾ എന്താകും ഉണ്ടാവുക??ഈ ചിത്രത്തിലെ കഥാപാത്രങ്ങളെ ശ്രദ്ധിച്ചാൽ പിച്ചൈയുടെ ജീവിതം അയാളെ അങ്ങനെ ആക്കിയതായിരിക്കാം.സമാനമായ അവസ്ഥ ആണ് മങ്കേശ്വരനും.അതു പോലെ കല്യാണം കഴിക്കാൻ പോകുന്ന പെണ്കുട്ടിയുടെ മാതാപിതാക്കളും.അവർ പ്രവർത്തിച്ചതെല്ലാം സാധാരണമായ മനുഷ്യ പ്രതികരണങ്ങൾ ആയിരുന്നു.

  എന്നാൽ ക്ളൈമാക്സിലെ ആ രംഗം!!ഒരു മഴ പെയ്തു തീർന്ന പോലെ ഒരു സുഖമായിരുന്നു.എന്തു മാത്രം ശാന്തത ആയിരുന്നു ആ രംഗം പ്രേക്ഷകനും കൊടുത്തിട്ടുണ്ടാവുക?മരണക്കളിയിൽ നിന്നും തങ്ങളുടെ പ്രതികാരത്തിന്റെയും നിലനിൽപ്പിന്റെയും സംഘർഷങ്ങളിൽ നിന്നും പെട്ടെന്നൊരു മാറ്റം.അപ്രതീക്ഷിതം ആയിരുന്നു അങ്ങനെ ഒന്നു.ഒരു മിസ്റ്ററി സിനിമ പോലെ അല്ല.പകരം അവിടെ നടന്ന സംഭവങ്ങൾക്ക് അങ്ങനെ ഒരു അവസാനം പ്രതീക്ഷിക്കുകയും അതു ലഭിക്കുകയും ചെയ്യുമ്പോൾ ഉള്ള ആശ്വാസം,മനസിന്റെ സുഖം. അതു കണ്ടു തന്നെ അറിയുക..

869.Savarakathi

  Tamil,2018

Action,Comedy

Dir:G R Adithya

Stars:Ram,Myskkin,Shamna