738.ELEVATOR TO THE GALLOWS(FRENCH,1958),|Crime|Thriller|,Dir:-Louis Malle,*ing:-Jeanne Moreau, Maurice Ronet, Georges Poujouly .
"If you want to kill someone, you'd better pull off a perfect crime. Our security lies in the fact that that's damnably hard to do." .
പ്രശസ്ത ഫ്രഞ്ച് സംവിധായകന്‍ ആയ ക്ലോഡ് ലെലോയുടെ "Perfect Crime" നെ കുറിച്ചുള്ള പ്രശസ്തമായ വാക്കുകള്‍ ആണിത്.ഒരാളെ കൊല്ലണം എങ്കില്‍ പൂര്‍ണത ഉള്ള ഒരു കൊലപാതകം ചെയ്യുക എന്നത് ആയിരിക്കും ഓരോ കൊലയാളിയുടെയും ലക്‌ഷ്യം.നിയമത്തിന്റെ കണ്ണില്‍ അയാള്‍ തെറ്റുകാരന്‍ ആകുന്നതു വരെ അത് ഒരു പരിപൂര്‍ണ വിജയം ആയ കുറ്റകൃത്യം ആയി മാറുന്നു.എന്നാല്‍ പലപ്പോഴും കുറ്റകൃത്യം ചെയ്ത ആള്‍ ബാക്കി വയ്ക്കുന്ന ചെറിയ ഒരു അശ്രദ്ധ മതിയാകുംഅയാളുടെ പ്രവൃത്തിക്ക് കളങ്കം ചാര്‍ത്താന്‍.മനുഷ്യനാല്‍ ഏറെക്കുറെ അസാധ്യം ആയ ഒന്നാണെന്ന് പറയാം തെളിവില്ലാതെ ഒരു കുറ്റകൃത്യം ചെയ്യുക എന്നത്."Elevator To the Gallows " എന്ന ഫ്രഞ്ച് ചലച്ചിത്രം പ്രതിനിധീകരിക്കുന്നത് ഇത്തരം സങ്കീര്‍ണം ആയ ആശയത്തെ ആണ്;ഒപ്പം അതിന്റെ പാളിച്ചകളെയും.
ഒരു ഫോണ്‍ സംഭാഷണത്തിലൂടെ ആണ് ചിത്രം ആരംഭിക്കുന്നത്.ഫ്ലോറന്‍സ് കരാല ഒരു ടെലിഫോണ്‍ ബൂത്തില്‍ നിന്നും തന്റെ കാമുകന്‍ ആയ ജൂലിയനും ആയുള്ള സംഭാഷണത്തിലാണ്.വൈകിട്ട് അവര്‍ തമ്മില്‍ കാണാം എന്ന് പറഞ്ഞു ഫോണ്‍ വയ്ക്കുമ്പോള്‍ ക്രൂരമായ ഒരു കൊലപാതകത്തിന് അരങ്ങൊരുങ്ങുന്നു.ഫ്ലോരന്സിന്റെ ഭര്‍ത്താവും പ്രശസ്ത ആയുധ വ്യാപാരിയും ആയ കരാലയെ അന്ന് ജൂലിയന് കൊല ചെയ്യാന്‍ തീരുമാനിക്കുന്നു.ജൂലിയന് കരാലയുടെ വിശ്വസ്തനായ ജോലിക്കാരന്‍ ആണ്.സൈനിക സേവനം അനുഷ്ഠിച്ച ജൂലിയന് ആത്മഹത്യ ആണെന്ന് തോന്നിപ്പിക്കുന്ന വിധത്തില്‍ കൃത്യം നടത്താന്‍ സാധിക്കുന്നു.ഓഫീസില്‍ വച്ച് കൊല നടത്തിയതിനു ശേഷം ജൂലിയന് തന്റെ കാറിന്റെ അടുക്കലേക്കു പോകുന്നു.
ചിത്രത്തിന്റെ നേരത്തെ സൂചിപ്പിച്ച അപ്രതീക്ഷിതം ആയ "അശ്രദ്ധ" ഇവിടെ ആരംഭിക്കുന്നു.കൊലപാതകം നടത്താന്‍ വേണ്ടി കരാലയുടെ ഓഫീസിലേക്ക് കയറാന്‍ ജൂളിയനെ സഹായിച്ച കയര്‍ അയാള്‍ അവിടെ നിന്നും മാറ്റാന്‍ മറന്നു പോയി.ഒരു വലിയ അശ്രദ്ധ തന്നെ ആയിരുന്നു അത്.ഒരു പക്ഷെ ഒരിക്കലും തെളിയാതെ പോകുമായിരുന്ന കേസില്‍ പ്രധാന ഭാഗം ആ കയറിനു കൈ വരുന്നു.തന്റെ കാറില്‍ ഇരുന്നു കൊണ്ട് ഓഫീസ് കെട്ടിടത്തിന്റെ മുകളില്‍ ആടുന്ന ആ കയര്‍ കണ്ട ജൂലിയന് അതെടുക്കാന്‍ ആയി വെപ്രാളത്തില്‍ തിരിച്ചു കയറുന്നു.ഓഫീസിലെ ലിഫ്റ്റില്‍ കയറിയ ജൂലിയന്റെ വിധി അവിടെ മാറുന്നു.ഓഫീസ് അടയ്ക്കാന്‍ നേരം വൈദ്യുതി നിലയ്ക്കുമ്പോള്‍ അയാള്‍ അവിടെ അകപ്പെട്ടു പോകുന്നു.പുറത്തിറങ്ങാന്‍ ഒരു വഴിയും ഇല്ലാതെ ആയ ജൂലിയന് അവിടെ അകപ്പെടുന്നു."തൂക്കു കയറിലേക്ക് ഉള്ള അയാളുടെ യാത്ര അവിടെ ആരംഭിക്കുന്നു".
ഇനി ഇതിനു സമാന്തരം ആയി മറ്റൊരു കഥ കൂടി നടക്കുന്നു.ജൂലിയന്റെ വിലപ്പിടിപ്പ് ഉള്ള കാറില്‍ ആകൃഷ്ടന്‍ ആയ ചെറിയ കുറ്റകൃത്യങ്ങളും ആയി നടക്കുന്ന ലൂയിസും അവന്റെ കാമുകി വെറോനിക്കയും ആ കാര്‍ മോഷ്ടിച്ച് യാത്ര തുടങ്ങുന്നു.ഒരു പക്ഷെ പിടിക്കപ്പെടും എന്ന ഉറപ്പു ഉണ്ടായിരുന്നിട്ടു കൂടി അത്ര വിലപ്പിടിപ്പ് ഉള്ള കാറില്‍ യാത്ര ചെയ്യാന്‍ ഉള്ള അവരുടെ ആഗ്രഹം ആയിരുന്നു അവരെ കൊണ്ട് അത് ചെയ്യിച്ചത്.അവരുടെ യാത്രയില്‍ കണ്ടു മുട്ടുന്ന ബെന്ക്കര്‍-ഫ്രീഡ ദമ്പതികളും ആയി അവര്‍ ചങ്ങതത്തില്‍ ആകുന്നു.ലൂയിസിന്‍റെ പേര് മാറ്റി ജൂലിയന് എന്ന പേരാണ് അവര്‍ അവിടെ ഉപയോഗിച്ചത്.എന്നാല്‍ അന്ന് നടന്ന ചില അപ്രതീക്ഷിത സംഭവങ്ങള്‍ അവസാനിക്കുന്നത്‌ ബെന്ക്കര്‍-ഫ്രീഡ ദമ്പതികളുടെ കൊലപാതകത്തില്‍ ആയിരുന്നു.ജൂലിയന്റെ കാര്‍ അവിടെ ഉപേക്ഷിച്ച് ലൂയിസും വെറോനിക്കയും മരണപ്പെട്ടവരുടെ കാറില്‍ തിരിച്ചു എത്തുന്നു.തങ്ങള്‍ ചെയ്ത കുറ്റകൃത്യത്തിന് ശിക്ഷ ലഭിക്കും എന്ന് ഭയന്ന അവര്‍ ആത്മഹത്യക്ക് ശ്രമിക്കുന്നു.
പോലീസ് അന്വേഷണം ആരംഭിക്കുന്നതിന് മുന്‍പുള്ള ചിത്രത്തിന്റെ കഥ ഇതാണ്.നേരിട്ട് പരിചയം ഇല്ലാത്ത വ്യക്തികള്‍ ചെയ്യുന്ന 3 കൊലപാതകങ്ങള്‍.എന്നാല്‍ ജിഗ്സോ പസിലില്‍ ചേര്‍ത്ത് വയ്ക്കുന്ന പരസ്പര പൂരകങ്ങള്‍ ആയ വിടവുകള്‍ പോലെ അവരുടെ ഇടയില്‍ ഒരു ബന്ധം ഉണ്ട്.അന്ന് ഈ മൂന്നു പേരുടെയും അവസ്ഥയ്ക്ക് പ്രധാന കഥാപാത്രം ആയ കാര്‍.മോട്ടലില്‍ കൊലപാതക സമയത്ത് ഉപയോഗിച്ച കാര്‍ ജൂലിയനെ ബെന്ക്കര്‍-ഫ്രീഡ ദമ്പതികളുടെ കൊലയാളി ആയി മാറ്റുന്നു.അവിടെ അവര്‍ ഉപയോഗിച്ച പേരും ജൂലിയന് എന്നായിരുന്നു.ജൂലിയന് ചെയ്യാത്ത കുറ്റകൃത്യത്തില്‍ അയാള്‍ പ്രതിയാകുന്നു.അയാള്‍ പിറ്റേദിവസം ലിഫ്റ്റില്‍ നിന്നും പുറത്തു വരുമ്പോള്‍ പോലീസ് പിടിയില്‍ ആകുന്നു.
ആത്മഹത്യക്ക് ശ്രമിച്ച ലൂയിസിനെയും വെറോനിക്കയെയും ഫ്ലോറന്‍സ് കണ്ടെത്തുന്നു.തലേ ദിവസം രാത്രി തന്റെ കാമുകന്റെ ഒപ്പം എത്തി ചേരാന്‍ കൊതിച്ച ഫ്ലോറന്‍സ് ജൂലിയന്റെ കാറില്‍ യാത്ര ചെയ്യുന്ന വെറോനിക്കയെ കണ്ടു ഇടയ്ക്ക് തെറ്റിദ്ധരിക്കുന്നുണ്ട്.എന്നാല്‍ മോട്ടലില്‍ നടന്ന കൊലപാതകത്തിന്റെ പിന്നില്‍ ഉള്ള രഹസ്യം അറിയാന്‍ ഉള്ള അവരുടെ ത്വര ആണ് അവളെ അവിടെ എത്തിക്കുന്നത്.ഇവിടെ ആണ് അടുത്ത തെളിവ് വില്ലന്‍ ആകുന്നതു.ജൂലിയന്റെ പോക്കറ്റ് ക്യാമറ.കരാലയുടെ മരണം ആത്മഹത്യ ആണെന്ന് കരുതിയ പോലീസിനു അടുത്ത പിടി വള്ളി ആയി അത് മാറുന്നു.ആ ഫോട്ടോയില്‍ കണ്ടെത്തുന്ന തെളിവുകളോടെ ചിത്രം അവസാനിക്കുന്നു.നേരത്തെ പൂരിപ്പിക്കാന്‍ കഴിയാതെ ഇരുന്ന സമസ്യ അവിടെ തീരുന്നു.ഒരു പക്ഷെ തെളിവുകളുടെ അഭാവത്തില്‍ ജൂലിയനും,ലൂയിസ്-വെറോണിക്ക എന്നിവര്‍ക്കും ഒപ്പം ഈ കേസുകളില്‍ വരാന്‍ സാധ്യത പോലും ഇല്ലാതിരുന്ന ഫ്ലോറന്‍സ് പോലും അവിടെ അകപ്പെടുന്നു.,
ഇവിടെ വിധി മാറുന്നത് അവസാനം 4 വ്യക്തികളുടെ ആണ്.കുറ്റകൃത്യം ചെയ്യുമ്പോള്‍ അവര്‍ വിചാരിക്കുന്നത് തങ്ങള്‍ ഒരിക്കലും പിടിക്കപ്പെടുക ഇല്ല എന്ന് തന്നെ ആണ്.ആത്മഹത്യക്ക് ശ്രമിച്ച ലൂയിസും വെറോനിക്കയും പോലുംചിത്രത്തിന്റെ ഒരു ഘട്ടത്തില്‍ അങ്ങനെ തന്നെ കരുതി.എന്നാല്‍ "ദൈവത്തിന്റെ കരങ്ങള്‍" എന്ന് വിശേഷിക്കപ്പെടുന്ന നിര്‍ണായക തെളിവുകള്‍,അത് ഒളിപ്പിച്ചു വയ്ക്കാന്‍ തക്ക കഴിവ് ഓരോരുത്തരുടെയും പ്രവൃത്തികളുടെ ശേഷിപ്പുകള്‍ ആയി ചുറ്റും ഉണ്ട് എന്നതാണ് ഒരു വസ്തുത.തങ്ങളുടെ ബാക്കി ഉള്ള ജീവിതത്തില്‍ വര്‍ഷങ്ങള്‍ ഇരുട്ട് മുറിയില്‍ പകല്‍ എന്നോ രാത്രി എന്നോ അറിയാതെ കഴിഞ്ഞു കൂടേണ്ടി വരുന്ന അവരുടെ വിധിയിലേക്ക് നയിച്ച കാര്യങ്ങള്‍ ഒരു സിനിമ എന്ന നിലയില്‍ ആസ്വദിച്ചു തന്നെ കാണണം.യാഥാസ്ഥിക കൊലപാതക ചിത്രങ്ങളില്‍ നിന്നും മാറി കഥാപാത്രങ്ങളില്‍ ഉണ്ടാകുന്ന അപ്രതീക്ഷിതം ആയ സംഭവങ്ങളിലൂടെ പോകുന്ന ചിത്രത്തിലെ പല രംഗങ്ങളും ഊഹിക്കവുന്നതിന്റെ അപ്പുറം ആണ്.അന്വേഷണ ഉദ്യോഗസ്ഥരുടെ കണ്ണിലൂടെ ഈ ചിത്രം അവതരിപ്പിച്ചാല്‍ പോലും സുപ്രധാനം ആയി മാറുന്ന തെളിവുകള്‍ അവരെ തേടി എത്തുന്നതായി കാണാം.
ഒരു ബ്ലാക്ക് & വൈറ്റ് ചിത്രം എന്ന നിലയില്‍ അവഗണിക്കണ്ട ചിത്രം അല്ല Elevator of the Gallows.കാരണം ഇതിലെ വര്‍ണമില്ലായ്മ കൂട്ടിച്ചേര്‍ക്കുന്നത് പ്രേക്ഷകനില്‍ സങ്കീര്‍ണം എന്ന് തോന്നിപ്പിക്കുന്ന കൊലപതങ്ങളിലെ തീക്ഷണതയിലേക്ക് ആണ്.ഫ്രഞ്ച് സിനിമകളില്‍ മാറ്റത്തിന്റെ അലയടികള്‍ തുടങ്ങിയ സമയത്ത് അവതരിപ്പിച്ച ഈ ചിത്രം ഇന്നത്തെ പരിതസ്ഥിതികളില്‍ പോലും പുതുമയേറിയ വിഷയം ആണ്.കാമുകന്‍/കാമുകിയും ആയി ചേര്‍ന്ന് സ്വന്തം ഭര്‍ത്താവ്/ഭാര്യയെ കൊല്ലുന്ന എത്രയോ കേസുകള്‍ മിക്കപ്പോഴും വായിക്കുന്നു മാധ്യമങ്ങളിലൂടെ.ആ കുറ്റകൃത്യങ്ങളില്‍ എല്ലാം ഇത് പോലെ തന്നെ അശ്രദ്ധമായ തെളിവുകള്‍ പടര്‍ന്നു കിടക്കുന്നുണ്ടാകാം.എത്ര മറച്ചാലും ഒളിച്ചാലും കുറ്റാന്വേഷണ സമയത്ത് അപ്രതീക്ഷിതമായി വരുന്ന തെളിവുകള്‍.Elevator to the Gallows ലെ കാറും,ക്യാമറയും പോലെ.
More movie suggestions @www.movieholicviews.blogspot.ca
