1598. Smile (English, 2022)

 

1598. Smile (English, 2022)
           Psychological Horror, Mystery: Streaming on Paramount+

            

          
            ഡോ. റോസ് കോട്ടറിന്റെ മുന്നിൽ വച്ചാണ് ഒരു യുവതി ഭീതിപ്പെടുത്തുന്ന ഒരു ചിരിയോടെ സ്വന്തം കഴുത്ത് മുറിക്കുന്നത് .ചിരിച്ചു കൊണ്ട് കഴുത്ത് അറക്കുക എന്നൊക്കെ പറയില്ലേ? അതിലും ഭീകരമായ ഒരു ചിരി.ചിരി എന്ത് കൊണ്ട് ഇവിടെ പരാമർഷിച്ചു എന്നതിന് ഇത്രയും ക്രൂരമായ ചിരികൾ പുറത്തു അധികം എവിടെയും കാണാൻ സാധിക്കില്ല എന്നാണ് ഉത്തരം. ട്രോമ  നിറഞ്ഞ ജീവിതം, മറ്റുള്ളവരിൽ നിന്നും അകന്നു കഴിയുന്നവർ എന്നു വേണ്ട ജീവിക്കാൻ ഉള്ള സമയം സ്വയം കൊടുക്കാതെ ജോലി ചെയ്യുന്നവരെ പോലും ആക്രമിക്കുന്ന, ഒരാളിൽ നിന്നും മറ്റൊരാളിലേക്ക് പടരുന്നത് പോലെ ഒരു ചിരിയാണ് ഇവിടെ എല്ലാത്തിനും ഉത്തരവാദി. സിനിമയുടെ കഥയും ഇതാണ്. ഈ ചിരി എന്താണ്  എന്നുള്ള ചോദ്യത്തിന് ഉത്തരം ആണ് ഈ ചിത്രം.

ആ ചിരി സൂപ്പർ നാച്ചുറൽ ശക്തികൾ എന്തെങ്കിലും ആണോ?അതോ പല ഘടങ്ങളും ചേര്ന്ന് ഒരു മനുഷ്യൻ സ്വന്തമായി മനസ്സിൽ നിർമിക്കുന്ന ഒരു ഭീകരൻ ആണോ ആ ചിരി?സിനിമയിൽ പല സാധ്യതകൾ പ്രേക്ഷകന് തിരഞ്ഞെടുക്കാൻ കഴിയുന്നുണ്ട്. വെറും ഒരു ഹൊറർ സിനിമ പോലെ, അതും ഇടയ്ക്ക് കുറച്ചു മാത്രം jump scare രംഗങ്ങൾ വച്ച് വിലയിരുത്തേണ്ട ചിത്രമല്ല Smile.പകരം, വളരെ വലിയ ഒരു ക്യാൻവാസിലേക്ക് പകർത്തിയാൽ , അത് സ്വന്തം ജീവിതത്തിലേക്ക് അല്ലെങ്കിൽ പരിചയം ഉള്ള ആരുടെയെങ്കിലും jeevithathilekkഉ എടുക്കുക ആണെങ്കിൽ കൂടുതൽ മനസ്സിലാക്കാൻ സാധിക്കും സിനിമ നൽകുന്ന ഭീകരമായ ഒരു അനുഭവം.

ഈ രീതിയിൽ സിനിമ കാണണം എന്നു നിർബന്ധിക്കുക ഒന്നുമല്ല. പകരം, അങ്ങനെയും കാണാം എന്നു മാത്രം. ഹൊറർ/ സൈക്കോജിക്കൽ ഹൊറർ സിനിമകളുടെ വർഷം ആണ് 2022 എന്നു തന്നെ പറയാം. പ്രത്യേകിച്ചും പലരും മരണത്തെ മുഖാമുഖം കണ്ട കോവിഡ് എന്ന ദുരന്തത്തിന് ശേഷം വന്ന സിനിമകൾ പലതും മനുഷ്യനെ നല്ല രീതിയിൽ haunt ചെയ്യാൻ ഉദ്ദേശിച്ച് തന്നെ ആയിരുന്നു എന്നു പറയേണ്ടി വരും. ആ രണ്ടു വർഷക്കാലത്തെ ജീവിതം കാരണം കൂടി ആകണം ഇപ്പോൾ അല്പ്പം ഹൊറർ ഇല്ലാതെ ജീവിക്കാൻ കഴിയില്ല എന്നായിട്ടുണ്ട് എന്നു തോന്നുന്നു.

Smile ഇത്തരം സിനിമകളിൽ ഒരു ബെഞ്ചമാർക്ക് കൂടി ആണ്. സാധാരണ ഒരു ഹൊറർ സിനിമ നല്കുന്ന ഫീലിനെക്കാളും ഒരു സൈക്കോളജിക്കൽ ഹൊറർ ആയി കാണുമ്പോൾ അമാനുഷിക ശക്തിയെ കുറിച്ച് പറയുന്ന ഒരു ചിത്രം എന്ന നിലയിൽ ധാരാളം മാറുന്നുണ്ട് Smile .കഥാപാത്രങ്ങളിൽ പലരുടെയും ജീവിതം analysis നടത്തി കൊണ്ട് ഡോ . റോസ്, അവരുടെ മാറിയ മാനസിക നിലയിൽ നിന്നു കൊണ്ട് എന്തെല്ലാം ചെയ്യാൻ ശ്രമിക്കുന്നു എന്നു സിനിമയിൽ കാണാം.

സിനിമ കാണാനോ എന്നു ആരെങ്കിലും ചോദിച്ചാൽ വേണം എന്നോ വേണ്ട എന്നോ പറയാൻ എനിക്കു കഴിയില്ല. കാരണം, സിനിമ നല്കുന്ന അത്രയും ഭയങ്കരമായ ഡിപ്രഷൻ എഫെക്റ്റ് കൂടി കാരണം ആണ്.അത് സിനിമയുടെ മെന്മയായി കൂടി കരുതുന്നു.പ്രത്യേകിച്ചും സിനിമയുടെ അവസാന ഭാഗങ്ങളിൽ അത് നന്നായി കാണാനും സാധിക്കും. മനുഷ്യനെ ഭയപ്പെടുത്തുന്ന ഴോൻറെയിൽ വന്ന ചിത്രം എന്ന നിലയിൽ,  It served its purpose എന്നു പറയേണ്ടി വരും. കഴിയുമെങ്കിൽ കാണുക.

ഒരു ചെറിയ റേറ്റിംഗ് 4/5

സിനിമയുടെ ലിങ്ക് ആവശ്യം ഉള്ളവർ t.me/mhviews1  സന്ദർശിക്കുക .

സിനിമ കണ്ടവരുടെ അഭിപ്രായം എന്താണ്? മിക്സഡ് ആയിരിക്കും എന്നാണ് ഒരു തോന്നൽ. എന്നാലും പറഞ്ഞോളൂ.

1597. Padma (Malayalam, 2022)

 1597. Padma (Malayalam, 2022)

         Streaming on Amazon Prime (എന്ന് പറയപ്പെടുന്നു )

   പഴയ ബാലചന്ദ്ര മേനോൻ സിനിമകളെക്കാളും ഇഷ്ടമാണ് ഇപ്പോഴത്തെ  അനൂപ് മേനോൻ സിനിമകൾ. ആദ്യം പറഞ്ഞത് ടി വി സീരിയൽ കഥ പോലെ ഉള്ള സിനിമകൾ  ആണെങ്കിൽ ,(എന്റെ അഭിപ്രായം മാത്രമാണ്.പക്ഷേ സിനിമകൾ ഇഷ്ടവും ആയിരുന്നു )  അനൂപ് മേനോന്റെ പടം: ആഹ് ഹാ, എന്താ ഫിലോസഫി? ഓരോ ഡയലോഗ് കേൾക്കുമ്പോഴും, അദ്ദേഹത്തിന്റെ ജീവിത വീക്ഷണങ്ങളെ കുറിച്ച്  കൂടുതൽ അറിയുമ്പോഴും ആണ്‌ നമ്മൾ ജീവിതത്തിൽ എത്ര ചെറിയ ആളുകൾ ആണെന്നു മനസ്സിലാവുക.

  

 ജീവിതത്തിലെ എലീറ്റ് വിഷ് ലിസ്റ്റിൽ എന്തൊക്കെ ഇനി ആഡ് ചെയ്യണം എന്ന് ഓരോ അനൂപ് മേനോൻ സിനിമ കഴിയുമ്പോഴും മനസ്സിലാക്കാൻ കഴിയും. അത്രയ്ക്കും റിച്ചും വലിയ സെറ്റപ്പുമാണ് അദ്ദേഹത്തിന്റെ ആശയങ്ങൾ . ഓൺലി ഹൈ ക്ലാസ് ആകാൻ വേണ്ടി അനൂപ് മേനോൻ സമൂഹത്തിന് വേണ്ടി ഇറക്കുന്ന സിനിമകളെ പ്രോൽസാഹിപ്പിക്കുക തന്നെ വേണം. 

 ഹൈ ക്ലാസ് സൊസൈറ്റി ആകുമ്പോൾ അവിഹിതം നിർബന്ധം ആണല്ലോ?അത് അനൂപിന്റെ സിനിമകളിൽ ധാരാളം ഉണ്ട്. അതിനൊക്കെ പശ്ചാത്തലം ആയി കവിത പോലുള്ള കുറച്ചു പാട്ടുകളും. അത് പോലെ തന്നെ ആണ് ബ്രാൻഡഡ് വസ്തുക്കളുടെ  ഉപയോഗം ജീവിതത്തിലും പ്രൊഫഷനിലും എന്ത് നേടി തരും എന്നുള്ള ഉപദേശവും. പല പേരറിയാത്ത വലിയ ബ്രാൻഡുകളും അനൂപ് മേനോൻ സിനിമകളിലൂടെ നമുക്കും മനസ്സിലാകും. 

പദ്മ എന്ന കഥാപാത്രം ഭർത്താവിന്റെ ഒപ്പം പുതിയ കൊട്ടാരം പോലുള്ള വീട്ടിലേക്കു മാറുമ്പോൾ അവിടെ ഉള്ള പല ഫെമിസ്റ്റുകളെയും പഴയ തലയിണ മന്ത്രം സിനിമയിലെ ജിജിയേയും സുലോചന തങ്കപ്പനെയും ഓർമിപ്പിച്ചു . പഴയ സൊസൈറ്റി ലേഡീസിന്റെ പുതിയ വേർഷൻ ആണ് ഫെമിനിസ്റ്റുകൾ എന്നു പറയാതെ പറയുന്നുണ്ട് ചിത്രത്തിൽ . പദ്മ ആണെങ്കിൽ ഇക്കാലത്തെ കാഞ്ചന ആണ്. ആണ് ഡാൻസ് മാഷ് വളയ്ക്കാൻ നോക്കിയിട്ട് വീഴാത്ത കാഞ്ചനയെ പോലെ അല്ല പദ്മ എന്നു മാത്രം. അതാണ് ഇക്കാലത്തെ കാഞ്ചന എന്നു പറഞ്ഞത്.  പക്ഷേ രവി ശങ്കർ സുകുമാരനെക്കാളും ഡെവെലപ്ഡ് ആണ് താനും .ഇടയ്ക്ക് അനൂപേട്ടൻ എന്നത്തേയും പോലെ ചിറയ്ക്കൽ ശ്രീഹരി തുടങ്ങി ലാലേട്ടന്റെ പല തരം ആവാഹനങ്ങളും സ്വന്തം ശരീരത്തിൽ നടത്തുന്നുണ്ട്. പ്രത്യേകിച്ചും ആൾ വെള്ളമടിച്ചാൽ ലാലേട്ടന്റെ ഫിഗർ ചെയ്യാൻ, വിത് വോയിസ് ആൻഡ് ചിരി ശ്രമിക്കും. ഇതിലും അങ്ങനെ തന്നെ. 

 അതിന്റെ കൂടെ എടുത്തു പറയേണ്ട ഒരാൾ ആണ്‌ രവിശങ്കരിന്റെ സുഹൃത്ത്‌.രവി ശങ്കറിന്റെ കൂട്ടുകാരൻ ശങ്കർ രാമകൃഷ്ണൻ ആകുമ്പോൾ ഫിലോസഫിയുടെ ആഴം കൂടുന്നത് നമുക്ക് കൂടുതൽ കാണാൻ സാധിക്കും. പഴയ ട്രിവാൻഡ്രം ലോഡ്ജിലെ അബ്ദു ആയി വന്ന ജയസൂര്യ ആണ് ഇതിൽ വോയിസ് ഓവർ പ്രത്യേകിച്ച് ഒരു കാരണ്യവും ഇല്ലാതെ കൊടുത്തിരിക്കുന്നത്. മേനോന്റെ സുഹൃത്തു ആയത് കൊണ്ടാകും. എന്നാൽ അബ്ദുവിനെ ഓർമിപ്പിക്കുന്ന മറ്റൊരു അബ്ദു സിനിമയിൽ ഉണ്ട്. ആ റോൾ ചെയ്യാൻ കഴിയാത്തത് കൊണ്ടാണ് 'നട്പൂക്കാക' ജയസൂര്യ  ശബ്ദമായി അഭിനയിച്ചു എന്നു വിശ്വസിക്കുന്നു.   

പദ്മ എന്ന സിനിമയെ കുറിച്ച് പറയാൻ പോയാൽ  കുറെയേറെ പറയാൻ ഉണ്ട്. തുടരെ തുടരെ സിനിമകൾ ചെയ്യുന്ന അനൂപ് മേനോന്റെ കയ്യിൽ നിന്നും ഇനിയും ഇത്തരം സിനിമകൾ പ്രതീക്ഷിക്കുന്നുണ്ട്. ജീവിതത്തിൽ വലിയ സംഭവം അല്ല എന്നു തോന്നുന്നവർക്ക് വലിയ ഒരു സെറ്റപ്പിൽ എങ്ങനെ ജീവിക്കാം എന്നു വിദ്യാഭ്യാസം നല്കുന്ന സിനിമ ജീവിതത്തിൽ വലിയ മാറ്റങ്ങൾ ഉണ്ടാക്കും. 

റേറ്റിംഗ് ഇടാൻ പറയരുത് . എത്ര ഇട്ടാലും അത് ഒരു കുറവാകും സിനിമയ്ക്ക്. അഞ്ചിൽ പത്തു ഇട്ടാൽ പോലും കുറവ് ആണ് എന്നു മാത്രമേ പറയാൻ സാധിക്കൂ. 

Verbal Diarrhea ആണ് സിനിമയിൽ മൊത്തം എന്നും. സിനിമ ഒന്നും മനസ്സിലായില്ല എന്നും, എന്താണ് ഈ സിനിമ കൊണ്ട് ഉദ്ദേശിച്ചത് എന്നു ചോദിക്കുന്നവർ ദയവായി ഈ പോസ്റ്റ് വായിക്കരുത്. അഭിപ്രായം പറയുകയും ചെയ്യരുത് . ഹൈ ക്ലാസ് ആളുകൾ മാത്രം , അതും ഫിലോസഫി എല്ലാം നന്നായി മനസ്സിലാകുന്നവർ മാത്രം അഭിപ്രായം രേഖപ്പെടുത്തുമല്ലോ?

     

1596. Love Today ( Tamil, 2022)

 1596. Love Today ( Tamil, 2022)

          Committed ആകുന്നതിനു മുന്നേ ഉള്ള സിംഗിൾ പസങ്ക ലൈഫിൽ അർമാദിച്ച നായകൻ. പിന്നീട്, പ്രണയിച്ചു വിവാഹം ചെയ്യാൻ വേണ്ടി ശ്രമിക്കുമ്പോൾ ആണ്‌ കാമുകിയുടെ അച്ഛൻ ഒരു നിബന്ധന വയ്ക്കുന്നത്. വെറും നാല് ദിവസം മാത്രം നീണ്ടു നിൽക്കുന്ന കാര്യം മാത്രമായിരുന്നു അത്. പക്ഷെ വെറും ഒരു ദിവസം കൊണ്ട് തന്നെ അവരുടെ ജീവിതം കുളം തോണ്ടുകയാണ്. അതാണ്‌ Love Today യുടെ കഥ synopsis എന്ന് പറയാം.

 സംവിധായൻ പ്രദീപ്‌ തന്നെയാണ് നായകൻ കഥാപാത്രമായി വന്നിരിക്കുന്നത്. സത്യം പറഞ്ഞാൽ ധനുഷിനെ ആണ്‌ സ്‌ക്രീനിൽ പ്രദീപിനെ കാണുമ്പോൾ ഓർമ വന്നത്. മാനറിസങ്ങൾ മുതൽ ഇടയ്ക്ക് രൂപത്തിൽ പോലും പ്രദീപ്‌ ധനുഷിനെ ഓർമിപ്പിച്ചു. എന്നാലും സ്‌ക്രീനിൽ ആൾ നന്നായിരുന്നു. സ്വന്തം സിനിമയിൽ സ്‌ക്രീനിൽ അഴിഞ്ഞാട്ടം തന്നെ ആയിരുന്നു ആ റോളിൽ പ്രദീപ്‌.

 സിനിമയെക്കുറിച്ച് മൊത്തത്തിൽ പറഞ്ഞാൽ ചുമ്മാ കണ്ടു ചിരിക്കാൻ കുറച്ചൊക്കെ ഉള്ള, പലരുടെയും ബാച്ചിലർ ലൈഫിനെയും ഓർമിപ്പിക്കുന്ന ഒരു ചെറിയ രസകരമായ സിനിമ. അതാണ്‌ Love Today. മൊത്തത്തിൽ fun ride എന്ന അഭിപ്രായം ആണ്‌ എനിക്ക്. പ്രത്യേകിച്ചും സോഷ്യൽ മീഡിയ ഉപയോഗം ഇത്രയും വളർന്ന കാലത്ത് ഓരോ ബന്ധങ്ങളിലും അതെല്ലാം എങ്ങനെ സ്വാധീനം ചെലുത്തുന്നു എന്നത് സിംപിൾ ആയി സിനിമയിൽ പറയുന്നുണ്ട്. സിനിമയിൽ മെസേജ് വേണം എന്നുള്ളവർക്ക് അങ്ങനെ ചിന്തിക്കാം. വേണ്ടാത്തവർക്ക് ചുമ്മാ കണ്ടു കൊണ്ടിരിക്കാവുന്ന ഒരു സിനിമ.

റേറ്റിങ് : 3.5/5

 സിനിമ Netflix ൽ ആണ്‌ OTT വരാൻ പോകുന്നത്. IPTV യിൽ നല്ല പ്രിന്റ് കിടന്നതു കൊണ്ട് കണ്ടൂ.

  

       

1595. The Execution (Russian, 2021)

 

1595. The Execution (Russian, 2021)
           Thriller, Mystery.

ഈ അടുത്ത് ഞാൻ കണ്ട ഏറ്റവും മികച്ച കുറ്റാന്വേഷണ കഥയുള്ള സിനിമ  ആണ് The Execution . ആധുനിക റഷ്യ ഉണ്ടാകുന്നതിന് മുന്നേ ഉള്ള കാലഘട്ടം. അതിൽ പത്തു വർഷമായി നടക്കുന്ന കൊലപാതകങ്ങൾ . ചിലരുടെ വ്യക്തി താൽപ്പര്യങ്ങൾക്ക് വേണ്ടി പ്രതികളെ സൃഷ്ടിക്കുന്നു. എന്നാലും പിന്നീട് നടക്കുന്ന കൊലപാതകങ്ങൾ പ്രതികളായി കരുതിയിരുന്നവർ അല്ല നടത്തിയത് എന്ന തോന്നലും ഉണ്ടാക്കുന്നു. സീരിയൽ കില്ലർ എന്ന രീതിയിൽ വിളിക്കാവുന്ന ആരും തങ്ങളുടെ രാജ്യത്ത് ഇല്ല എന്നു വിശ്വസിച്ചിരുന്ന , അത് അമേരിക്കൻ വിശ്വാസം മാത്രം  ആണെന്ന് കരുതിയിരുന്ന ഒരു ഭരണകൂടം ആണ് റഷ്യയിൽ ഉണ്ടായിരുന്നതും.

  എന്നാൽ ഇത് സീരിയൽ കില്ലർ ആയ ഒരാൾ ആണ് നടത്തിയത് എന്നു വിശ്വസിക്കുന്ന ഒരാൾ ഉണ്ടായിരുന്നു. ഇസ ദവിഡോവ് എന്ന പോലീസ് ഉദ്യോഗസ്ഥൻ . അയാൾ  കേസ് അന്വേഷണം  ഏറ്റെടുക്കുന്നതോട് കൂടി പോലീസ് കുറ്റാവാളിയുടെ അടുക്കലേക്കു എത്തി തുടങ്ങുകയാണ് . എന്നാൽ ചില സംഭവങ്ങൾ കേസിന്റെ അന്വേഷണത്തെ ബാധിക്കുന്നുണ്ട്. ഈഗോ, സ്വന്തം നില നിൽപ്പിനും സ്ഥാനങ്ങൾക്കുമായി ചെയ്യുന്ന വഴിവിട്ട പ്രവർത്തികൾ , അങ്ങനെ പലതും.എൺപതുകളുടെ  തുടക്കത്തിൽ നിന്നും തൊണ്ണൂറ്റി ഒന്നിലേക്കു വരുമ്പോൾ ഇസയുടെ അന്വേഷണം പോലും ശരിയായ ദിശയിൽ അല്ലായിരുന്നു എന്നു മനസ്സിലാകുന്നു. കാരണം കേസ് അത്ര സങ്കീർണം ആയിരുന്നു. ഈ കേസിന്റെ അന്വേഷണത്തിന് പിന്നിൽ പ്രവർത്തിച്ചിരുന്ന പലരും  ഇപ്പോഴും കേസിന് പുറകിൽ ഉണ്ട്.

ഈ അന്വേഷണം നടക്കുന്നതിന്റെ ഇടയ്ക്കാണ്, ധാരാളം സ്ത്രീകളെ കൊലപ്പെടുത്തിയ നിലയിൽ കണ്ടെത്തിയതിൽ ഒന്ന് അവരുടെ ഊഹം പോലെ ഒരു കൊലപാതകി അല്ല എന്നു മനസ്സിലാകുന്നത്. സിനിമയുടെ മുഖ്യമായ ട്വിസ്റ്റും അവിടെയാണ്. തികച്ചും സങ്കീർണമായ ഒരു കേസ് ആണ് സിനിമയിൽ അവതരിപ്പിക്കുന്നത്.  ഒരു ദശാബ്ദത്തിന് ഇടയിൽ ഉള്ള രണ്ടു കാലഘട്ടം ആണ് സിനിമയിൽ സമാന്തരമായി കാണിക്കുന്നത്. സിനിമയിൽ കേസ് അന്വേഷണത്തിന് ഒപ്പം കഥാപാത്രങ്ങളുടെ ജീവിതം കൂടി കടന്നു വരുന്നുണ്ട്.   അത് സിനിമയുടെ മുന്നോട്ട് ഉള്ള പൊക്കിനെ സംബന്ധിച്ച് അത്യാവശ്യവും ആണ്. അത് കൊണ്ട് വളരെ വേഗത്തിൽ ക്യാറ്റ് ആൻഡ് മൌസ് കളിയുമായി പോകുന്ന കൊലയാളിയും പോലീസ് ഉദ്യോഗസ്ഥനും അല്ല ഈ ചിത്രത്തിൽ. പകരം സമയം എടുത്തു കഥാപാത്രങ്ങൾ പ്രേക്ഷകന്റെ അടുക്കലേക്കു എത്തുന്ന രീതിയിൽ ആണ് ചിത്രം ഉള്ളത്. അതിനായി കഥയുടെ ഓരോ വഴിയും എപ്പിസോഡ് പോലെ ആണ് അവതരിപ്പിച്ചിരിക്കുന്നതും. കഥാപാത്രങ്ങളുടെ പരിണാമം ഇതിലൂടെ കാണാൻ സാധിക്കും.

എനിക്കു നന്നായി ഇഷ്ടപ്പെട്ടൂ സിനിമ. ഒരു റേറ്റിംഗ് കൊടുക്കുക ആണെങ്കിൽ 4/5 കൊടുക്കും ചിത്രത്തിന്. സിനിമ കണ്ടവരുടെ അഭിപ്രായം പങ്ക് വയ്ക്കാമോ?

സിനിമയുടെ ലിങ്ക് വേണ്ടവർക്കു t.me/mhviews1 ൽ ലഭിക്കും.

1594. Sardar (Tamil, 2022)

 1594. Sardar (Tamil, 2022)

         Streaming on Simply South

നാടിനെ ചതിച്ച ഒരു ചാരനിൽ നിന്നും ആണ് കഥ തുടങ്ങുന്നത്. ആ സംഭവം അയാളുടെ കുടുംബത്തെ മൊത്തത്തിൽ തകർത്തൂ.അയാളുടെ മകൻ ഇപ്പോൾ പോലീസിൽ ഇൻസ്പെക്റ്റർ ആണ്. സോഷ്യൽ മീഡിയായിലൂടെ തമിഴ്നാട്ടിലെ പോലീസ് മാമൻ ആയി പ്രശസ്തനും ആണ്. പക്ഷേ സ്വന്തം പിതാവ് വരുത്തി വച്ച നാണക്കേട് ആയാളെയും വിടാതെ പിന്തുടരുന്നു. ഈ സമയം ആണ് One India, One Pension പോലെ One India, One Pipeline പ്രോജകറ്റുമായി റാത്തോർ എന്ന വ്യവസായ കാന്തം വരുന്നത്. ഇതിന് പിന്നിൽ അങ്ങ് കേന്ദ്രത്തിൽ പോലും പിടിയുള്ളവർ ഇടപ്പെടുമ്പോൾ നായകനായ ഇൻസ്പെക്റ്ററും എന്നത്തേയും പോലെ നീതിക്കായി പോരാടേണ്ടി വരുന്നു. അതിനു ശേഷം ഉള്ള കഥയാണ് സിനിമ. ഇതിൽ സർദാർ ആരാണ്?അതൊക്കെ സിനിമ കാണുമ്പോൾ മനസ്സിലാകും. 

  ഒരു സ്പൈ ത്രില്ലർ എന്ന നിലയിൽ കുറച്ചു സീനുകൾ നന്നായിരുന്നു. ഒരു തമിഴ് കൊമേർഷ്യൽ മസാല എന്ന നിലയിലേക്ക് പോയില്ലെങ്കിലും അതിനോടു തൊട്ട് അടുത്ത് നിൽക്കുന്നുണ്ട് സിനിമ. സിനിമയിലെ പാട്ടുകൾ നേരത്തെ കേട്ടിരുന്നില്ലെങ്കിലും സിനിമയിൽ കണ്ടപ്പോൾ ഇഷ്ടപ്പെട്ടൂ. കാർത്തി എന്നത്തേയും പോലെ energetic ആയിരുന്നു സിനിമയിൽ. അതാണ് സിനിമയുടെ ഏറ്റവും വലിയ പ്ലസ് പോയിന്റ് ആയി തോന്നിയത്. 

 സിനിമ ഇടയ്ക്ക് മറ്റുള്ള വിഷയങ്ങളിലേക്ക് മാറി ബോർ അടിപ്പിച്ചു ഇടയ്ക്ക് കുറച്ച് . പക്ഷേ വിഷയത്തിലേക്ക് വന്നപ്പോൾ  അതും മാറി. വിക്രം സിനിമയുമായി ചെറിയ ഒരു സാമ്യം തോന്നിയത് യാദൃച്ഛകമായി ഉണ്ടായത് ആണെന്ന് കരുതുന്നു. എന്തായാലും മൊത്തത്തിൽ കുഴപ്പമില്ലാത്ത സിനിമയാണ് Sardar. ഭയങ്കര സംഭവം ആക്കാമായിരുന്ന കഥയെ കുറച്ച് കൂടി നന്നായി ട്രീറ്റ് ചെയ്തിരുന്നെങ്കിൽ അതിനുള്ളസാധ്യത ഉണ്ടായിരുന്നു. രണ്ടാം ഭാഗം ഉണ്ടാകുമെന്ന് കരുതുന്നു. 

ഒരു 3/5 റേറ്റിംഗ് ആയി കൊടുക്കാം എന്നു കരുതുന്നു. 

സിനിമ കണ്ടവരുടെ അഭിപ്രായം എന്താണ്?

        

1593. Naane Varuvean (Tamil, 2022)

 1593. Naane Varuvean (Tamil, 2022)

          Streaming on Amazon Prime.

 OTT റിലീസ് സമയം തന്നെ കണ്ട സിനിമയാണ്. പക്ഷെ സിനിമ കണ്ടു കഴിഞ്ഞപ്പോൾ ഇഷ്ടമായോ ഇല്ലയോ എന്ന സംശയത്തിൽ ആയിരുന്നു. അതിനു കാരണം സിനിമയുടെ തുടക്കത്തിൽ ഉള്ള premises നൽകിയ പ്രതീക്ഷ ആയിരുന്നു. Good twin, evil twin രീതിയിൽ അവതരിപ്പിക്കപ്പെടുന്ന ഫ്ലാഷ്ബാക്കും ഇപ്പോഴത്തെ കാലഘട്ടവും ആണ്‌ സിനിമയിൽ ഉള്ളത്. ആളവന്താൻ ഒക്കെ കണ്ടു ഇഷ്ടപ്പെട്ട ആളെന്ന നിലയിൽ എന്തെങ്കിലും ഒക്കെ സെൽവ രാഘവൻ ചിത്രത്തിൽ ഉണ്ടാകും എന്നും പ്രതീക്ഷിച്ചു. പക്ഷെ സിനിമ അപ്രതീക്ഷിതമായ ഒരു ടേൺ ആണ്‌ എടുത്തത്.

 സിനിമ ഹൊററിലേക്ക് രൂപാന്തരം പ്രാപിച്ചു. അവിടെ നിന്നും വേറെ എന്തൊക്കെയോ ആയി മാറി സിനിമ. ഒരു പക്ഷെ നല്ല സാധ്യതകൾ ഉണ്ടായിരുന്ന ഒരു കഥ, അതിൽ ക്ളീഷേ കഥ മാത്രമേ ഉണ്ടായിരുന്നെങ്കിൽ പോലും നല്ല അവതരണത്തിലൂടെ നന്നാക്കാമായിരുന്നു.എന്നാൽ ഇവിടെ അതൊന്നും ഉണ്ടായില്ല. പകരം അവസാന സീനിൽ മാത്രം ചെറിയ ഒരു കൗതുകം കൊണ്ട് വന്നൂ എന്ന് മാത്രം.

തുടക്കം പറഞ്ഞത് പോലെ സിനിമ ഇഷ്ടമായോ ഇല്ലയോ എന്ന സംശയത്തിൽ നിന്നും സിനിമ പോരായിരുന്നു എന്ന അഭിപ്രായം ആണ്‌ ഉള്ളത് എന്ന് ഇപ്പോൾ ഉറപ്പിച്ചു പറയാൻ പറ്റുന്ന അവസ്ഥയാണ്.അവസാനം ഒക്കെ വെറും തട്ടിക്കൂട്ടു സെറ്റപ്പ് തന്നെ ആയിരുന്നു. സിനിമയുടെ തുടക്കത്തിൽ തന്ന പ്രതീക്ഷ എല്ലാം നഷ്ടമായിരിക്കുന്നു ഇപ്പോൾ. ഒരു ശരാശരി ചിത്രം എന്ന് വേണമെങ്കിൽ പറയാം നാൻ വരുവേൻ എന്ന ചിത്രത്തെ. ധനുഷിന്റെ സിനിമ ഇഷ്ടപ്പെടുന്ന ആൾ എന്ന നിലയിലും let down ആയിരുന്നു സിനിമ.

2.5/5 റേറ്റിങ് ഒക്കെ കൊടുക്കാം അല്ലെ? സിനിമ കണ്ടവരുടെ അഭിപ്രായം എന്താണ്?

 

1592. Mei Hoom Moosa (Malayalam, 2022)

 1592. Mei Hoom Moosa (Malayalam, 2022)

          Streaming on Zee5

ആദ്യം തന്നെ പറയട്ടെ, സിനിമ ഇഷ്ടപ്പെട്ടില്ല. നല്ല ഒരു പ്രമേയം ആയിരുന്നു എന്നത് മാത്രമാണ് സിനിമ കണ്ടപ്പോൾ തോന്നിയ പോസിറ്റീവ് ആയ  കാര്യം.  തമാശകൾ പോലും പലപ്പോഴും ബോർ അടിപ്പിക്കുകയും ചെയ്തു. വെള്ളി മൂങ്ങ ചെയ്ത സംവിധായകനിൽ നിന്നും കുറേക്കൂടി പ്രതീക്ഷിച്ചിരുന്നു. കഥാപാത്രങ്ങൾ ആയി അഭിനയിച്ചവരുടെ പ്രശ്നം ആല്ലാ യിരുന്നു. സുരേഷ് ഗോപിയും സൈജു കുറപ്പും എല്ലാം കിട്ടിയ വേഷം നന്നായി തന്നെ ചെയ്തു.ഹരീഷിന്റെ തള്ള് പോലും അത്ര ഒരു ഗും ഉണ്ടായില്ല . സിനിമ  എന്ന നിലയിൽ ഇഷ്ടപ്പെടണമെങ്കിൽ എല്ലാ വിഭാഗവും നന്നായാൽ അല്ലേ കഴിയൂ. ഇവിടെ കഥയുടെ അവതരണം നല്ലത് പോലെ പാളി എന്നു തോന്നി. കിച്ചാമണി എം ബി ഏ , ഹൈലസ തുടങ്ങിയ സിനിമകളുടെ ഒരു വൈബ് ആയിരുന്നു കിട്ടിയത്. 

ക്ലൈമാക്സ് ആകാറായപ്പോൾ എവിടെ കൊണ്ട് നിർത്തണം എന്നറിയാതെ അവസാനം ഒരു തട്ടിക്കൂട്ടിലേക്ക് പോയത് പോലെ ആണ് തോന്നിയത്. സിനിമ കണ്ടു ഇഷ്ടപ്പെട്ടവരെയും ചിരിച്ചവരെയും ആണ് ഫേസ്ബുക്കിൽ സിനിമ വിശകലനത്തിൽ കൂടുതലും കണ്ടത്. എന്നാലും എന്തോ അത്തരം ഒരു അനുഭവംഎനിക്കു  സിനിമ നൽകിയില്ല എന്നു നിരാശയോടെ പറയുന്നു. എന്തൊക്കെയോ കൂടുതൽ ആയി പ്രതീക്ഷിച്ചത് കൊണ്ടും ആകാം. 

എന്നെ സംബന്ധിച്ച് വെറുതെ ഇരുന്നു കണ്ടു മറക്കാവുന്ന ഒരു സിനിമയാണ് Mei Hoom Moosa. സിനിമ കണ്ടവരുടെ അഭിപ്രായങ്ങൾ പങ്ക് വയ്ക്കാമോ?

1591. Monica, O My Darling (Hindi, 2022)

 1591. Monica, O My Darling (Hindi, 2022)

         Streaming on Netflix.

 ഡാർക്ക്‌ ഹ്യൂമർ നിറഞ്ഞ, ധാരാളം സസ്പെൻസ്, ട്വിസ്റ്റുകൾ ഉള്ള ചിത്രമാണ് Monica, O My Darling. ഹിന്ദി സിനിമകൾ ഒരു ഭാഗത്തു മാറ്റങ്ങളുമായി നിറഞ്ഞു നിൽക്കുമ്പോൾ അത്തരം സിനിമകളിൽ പലതിലും നായകനായ രാജ്‌കുമാർ റാവു ആണ്‌ ഇതിലെ നായകനായ ജയന്തിനെ അവതരിപ്പിക്കുന്നത്. രാജ്‌കുമാർ റാവു എന്ന പേര് ഒന്ന് കൊണ്ട് മാത്രം ആണ്‌ റിവ്യൂ, synopsis എന്നിവ പോലും നോക്കാതെ സിനിമ കണ്ടു തുടങ്ങിയതും.

 ചെറിയ ചുറ്റുപാടുകളിൽ നിന്നും കോർപ്പറേറ്റ് ലോകത്തിലേക്കു എത്തിയ, സ്വന്തം ആയി രൂപകൽപ്പന ചെയ്ത സാങ്കേതിക വിദ്യയിൽ വിശ്വാസം ഉള്ള ജയന്ത്, പെട്ടെന്ന് തന്നെ അയാൾ ജോലി ചെയ്യുന്ന കമ്പനിയിൽ ഉന്നത സ്ഥാനത്തു എത്തുന്നു. എന്നാൽ ഇതിനു ശേഷം അയാൾ ജോലി ചെയ്യുന്ന കമ്പനിയിൽ കുറെ മരണങ്ങൾ സംഭവിക്കുന്നു. അതിനു പിന്നിൽ ഉള്ള രഹസ്യവും കാരണങ്ങളും ആണ്‌ പിന്നീട് സിനിമ അവതരിപ്പിക്കുന്നത്.

 തുടക്കത്തിൽ കോമഡി ആയി പോയിരുന്ന സിനിമ പെട്ടെന്ന് ഡാർക്ക്‌ മൂഡ് ഉള്ള, എന്നാൽ അതിൽ ബ്ലാക് ഹ്യൂമർ നിറഞ്ഞ ഒരു സിനിമ ആയി മാറുകയാണ്. പല സന്ദർഭങ്ങളും chaos എന്ന് വിളിക്കാവുന്ന രീതിയിൽ മാറുന്നു.കുറെയേറെ കഥാപാത്രങ്ങൾ, ഓരോ സംഭവങ്ങളിലും ഉള്ളവരുടെ ഓരോരുത്തരുടെയും പങ്ക് എന്നിവയെല്ലാം കൂടി ആകുമ്പോൾ പല കഥാപാത്രങ്ങളെയും നമ്മൾ ഈ സിനിമയിൽ പല മരണങ്ങളിലും സംശയിക്കും.

എനിക്ക് നന്നായി സിനിമ ഇഷ്ടപ്പെട്ടൂ. അവസാന സീൻ വരെ തന്ന സസ്പെൻസ് element എന്റെ കാര്യത്തിൽ വർക്ക്‌ ഔട്ട്‌ ചെയ്തു. അത് കൊണ്ടാണ് സിനിമ ഇഷ്ടപ്പെട്ടതും. പ്രശസ്തമായ പാട്ടിന്റെ വരികൾ സിനിമയുടെ പേരായി വന്നപ്പോൾ പല പാട്ടുകൾക്കും പഴയ സിനിമകളുടെ ഛായ ഉണ്ടായിരുന്നു. സിനിമ ഇഷ്ടപ്പെടാതെ ഇരിക്കാൻ ഉള്ള കാരണം ഒന്നും കാണുന്നില്ല. കണ്ടു നോക്കൂ താൽപ്പര്യമുള്ളവർ.

1590. Varaal (Malayalam, 2022)

 1590. Varaal (Malayalam, 2022)

          Streaming Sun NXT

          

പാവങ്ങളുടെ സ്റ്റീഫൻ നെടുമ്പള്ളി, വീണ വന്മരം (ഇതിൽ വീണില്ല ), അപ്പുറത്തെ സൈഡിൽ പോയ ഇപ്പുറത്തെ സൈഡിൽ ഉള്ള ആൾ, എന്തിനു ഏറെ പറയുന്നു  പാവങ്ങളുടെ സായിദ് മസൂദ് വരെ ആയി മൊത്തത്തിൽ പാവങ്ങളുടെ 'ലൂസിഫർ' അല്ലെങ്കിൽ പാരാലൽ ലോകത്തിലെ രാഷ്ട്രീയവും പിന്നെ വലിയ ട്വിസ്റ്റ് പോലെ അവതരിപ്പിച്ച എന്തോ കുറെ സംഭവങ്ങളും ഉള്ള സിനിമയാണ് വരാൽ.

  സ്റ്റാർ കാസ്റ്റിങ് കണ്ടാൽ തന്നെ മനസ്സിലാകും വലിയനൊരു കാൻവാസിൽ അവതരിപ്പിച്ച സിനിമ ആണെന്ന്. അതിനു ചേർന്ന രീതിയിൽ തന്നെ അവതരിപ്പിച്ച തള്ളുകളുടെ ഘോഷയാത്ര ഓട്ടോ പിടിച്ചു തുടക്കം മുതൽ വരുന്നുണ്ട്. പ്രാചീന കാലത്തുള്ള മലയാള സിനിമയിലെ നായകനെ കുറിച്ചുള്ള ബിൽഡപ്പൊക്കെ കഴിഞ്ഞ് നായകനെ കാണിക്കുന്നു. അനൂപ് മേനോൻ.അത് പോലെ പല കഥാപാത്രങ്ങളും സ്‌ക്രീനിൽ വന്നു പോകുന്നു. അത്യാവസ്ധ്യം പരിചിതമായ മുഖങ്ങൾ ആണ്‌ ഭൂരിഭാഗവും.

 എലീറ്റ് ക്ലാസിന്റെ വലിയ വലിയ സംഭവങ്ങൾ, സിദ്ധാന്തങ്ങൾ തുടങ്ങി, പെണ്ണ് പിടി വരെയുള്ള വലിയ കാര്യങ്ങൾ അങ്ങ് കാവ്യാത്മക ബുജി ലെവലിൽ പറഞ്ഞ് പോകുന്നുണ്ട്. കിംഗ്ഫിഷിലെ രഞ്ജിത്ത് - അനൂപ് മേനോൻ കൂട്ടുക്കെട്ടു ഇതിൽ കൂടി ഉണ്ടായിരുന്നെങ്കിൽ കിടിലം ആയേനെ എന്ന് തോന്നി . പക്ഷെ വിഷമിക്കണ്ട അത് മാറ്റി തരാൻ ശങ്കർ രാമകൃഷ്ണൻ മുതൽ രഞ്ജി പണിക്കർ വരെ ഉള്ള ബുജി ബെൽറ്റ് ഉണ്ട്. അതാണ്‌ സിനിമയുടെ ഏറ്റവും വലിയ ഐഡന്റിറ്റി.

 സിനിമയിൽ ഏറ്റവും ഇഷ്ടപ്പെട്ടത് എം എ ബേബിയുടെ എന്ന് തോന്നിപ്പിക്കുന്ന ആൾ അടിച്ച ഡയലോഗ് ആണ്‌. അതല്ലാതെ ഇപ്പൊ എന്തെങ്കിലും സംഭവിക്കും എന്ന് കരുതി ഇരുന്ന എന്റെ മുന്നിലേക്ക്‌ മാലപ്പടക്കം പോലെ എറിഞ്ഞു വിട്ട ട്വിസ്റ്റുകൾ  കണ്ടു ഇത്രയേ ഉള്ളോ എന്ന ഭാവത്തിൽ ഇരിക്കാൻ ആയിരുന്നു കൂടുതൽ സമയവും യോഗം.

എനിക്ക് തോന്നുന്നത് നല്ല വായനയും ലോക വീക്ഷണവും ഒക്കെയുണ്ടെന്നു നമ്മൾ കരുതുന്ന  അനൂപ് മേനോൻ, രഞ്ജിത്ത്, രഞ്ജി, ശങ്കർ രാമകൃഷ്ണൻ ബെൽറ്റ്, അവർ കോളേജിൽ പഠിച്ചിരുന്ന കാലത്തുള്ള വായന, സിനിമ കാഴ്ച, ലോക വിവരം ഒക്കെയേ ഉളളൂ എന്നാണ്. ഇവരിൽ രഞ്ജിത്തിന്റെയും രഞ്ജി പണിക്കരുടെയും സിനിമകൾ കണ്ടു നമ്മൾ വളർന്നെങ്കിലും ഇപ്പോഴും അവരുടെ ചിന്തകൾ പഴയ കാലത്ത് തന്നെ ആണ്‌. അത് ഈ സിനിമയെ കുറിച്ച് മാത്രമുള്ള അഭിപ്രായം അല്ല.അവരെ പോലെ ആകണം എന്ന് കരുതി സംഭാഷണങ്ങൾ പറയുന്ന അനൂപ് മേനോൻ കൂടി ചേരുമ്പോൾ ഇക്കാലത്തു മലങ്കൾട്ട് ആകാൻ ഉള്ള ധാരാളം സംഭവങ്ങൾ അവരിൽ നിന്നും ഇനിയും പ്രതീക്ഷിക്കുന്നുണ്ട്.

  എന്തായാലും പത്തു വർഷത്തെ ഇടതു പക്ഷ ഭരണം കഴിഞ്ഞുള്ള ഇലക്ഷൻ ആണ്‌ സിനിമയുടെ കഥ. പിണറായി മുതൽ പലരും പല രൂപത്തിലും ഭാവത്തിലും കഥാപാത്രങ്ങളായി സിനിമയിലുണ്ട്. നേരത്തെ പറഞ്ഞ പഴയ രാഷ്ട്രീയ സിനിമകൾ പോലെ. അതിനു ഇപ്പോഴും നമ്മുടെ ഇടയിൽ സ്കോപ് ഉണ്ട്. പക്ഷെ അത് എങ്ങനെ ആകണം എന്നത് പ്രേക്ഷകന്റെ അഭിരുചിക്ക് അനുസരിച്ചുള്ള മാറ്റങ്ങളിലൂടെ ആകണം എന്ന് മാത്രം. അല്ലാതെ വരാൽ പോലെ തൊണ്ണൂറുകളിൽ നിന്നും ബസ് കിട്ടാത്ത പോലെ ആകരുത്.

 പണ്ടും പലപ്പോഴും തോന്നിയിട്ടുള്ള ഒരു കാര്യമുണ്ട്.പഴയ കണ്ണൻ താമരക്കുളം ഇപ്പോൾ വെറും കണ്ണൻ ആയി വന്നെങ്കിലും ഒരു സംവിധായകൻ എന്ന നിലയിൽ ഓരോ സിനിമ കഴിയുമ്പോഴും നന്നായി വരുന്നുണ്ട്. നല്ല കഥയും അഭിനേതാക്കളും കിട്ടിയാൽ അദ്ദേഹം വലിയ ഒരു സിനിമ നൽകും എന്നു ഇപ്പോഴും മനസ്സിൽ തോന്നുന്നുണ്ട്.

ഇത്രയും പറഞ്ഞതിൽ പരാമർശിച്ച ആളുകൾ ഒക്കെ ഇതു എഴുതിയ എന്നെക്കാളും എത്രയോ ഉയരങ്ങളിൽ ഉള്ളവരാണ് എന്ന് നല്ല ബോധ്യമുണ്ട്. അവരിൽ പലരുടെയും ഇപ്പോഴത്തെ സിനിമകളെ കുറിച്ച് പറയാൻ ആണ്‌ വരാലിന്റെ ലേബലിൽ വന്നത്. വരാൽ സിനിമ എന്ന നിലയിൽ ഒരു ആവറേജ് അനുഭവം പോലും അല്ലായിരുന്നു എനിക്ക് എന്നതാണ് സത്യം.

1589. Keanu (English, 2016)

 

1589. Keanu (English, 2016)
          Action, Comedy.

ജോൺ വിക്കിന്റെ പട്ടി കാരണം  അങ്ങേര് കാണിച്ചു കൂട്ടിയത് കാണ്ഡം കാണ്ഡമായി കണ്ടിട്ടുണ്ടാകുമല്ലോ? അത് പോലെ തന്റെ പൂച്ചയെ കണ്ടെത്താൻ വേണ്ടി റെൽ എന്ന സാധാരണക്കാരൻ ഇറങ്ങിത്തിരിക്കുന്നു. ഒപ്പം കസിൻ ആയ മൈക്കിളും ഉണ്ട്. ജോൺ വിക്കിന് നേരിടേണ്ടി വന്നത് പോലെ മൊത്തം ഭീകരമാരായ വില്ലന്മാർ ആണ് മറു വശത്ത് ഉള്ളത്. പക്ഷേ ജോൺ വിക്കിന് അതൊന്നും ഒരു പ്രശ്നവും അല്ലായിരുന്നല്ലോ?എന്നാലിവിടെ സംഭവം അല്പ്പം വ്യത്യസ്തം ആണ്. റെലും , മൈക്കിളും സാധാരണക്കാർ ആണ്. എന്നാലും അവരും ഒരു ശ്രമം നടത്തി നോക്കുകയാണ്.

Allentown Brothers എന്ന പേരിൽ അറിയപ്പെടുന്ന കണ്ണിൽ ചോരയില്ലാത്ത രണ്ടു കൊടും ക്രിമിനലുകൾക്ക് ഒപ്പം ലോക്കൽ ഗുണ്ടകളും മാഫിയയും എല്ലാം ഇവരുടെ മുന്നിൽ വരുന്നുണ്ട്. എന്നാൽ , അവരുടേതായ രീതിയിൽ അവർ ശ്രമിക്കുകയാണ് ഈ ആക്ഷൻ - കോമഡി ചിത്രത്തിൽ . അവർക്ക് അവരുടെ പൂച്ചയെ കണ്ടെത്താൻ കഴിയുമോ എന്നറിയാൻ ബാക്കി സിനിമ കാണുക.

തമാശയും കുറച്ചു ആക്ഷനും ഒക്കെയുള്ള ഒരു സാധാരണ ചിത്രമാണ് Keanu. ഇപ്പോഴത്തെ പ്രശസ്തനായ സംവിധായകൻ ജോർദാൻ പീൽ ആണ് റെൽ എന്ന കഥാപാത്രത്തെ അവതരിപ്പിക്കുന്നത്. ചില സമയത്ത് ഒക്കെ no - sense കോമഡി എന്നു പറയാവുന്ന, പോപ് കൾച്ചറിനോട് ചേര്ന്ന് നിൽക്കുന്ന സംഭവങ്ങൾ ആണ് അത്തരത്തിൽ സിനിമയിൽ ഉള്ളത്. കോമഡി ഒക്കെ ആവശ്യത്തിന് വർക്ക് ഔട്ട് ആയിട്ടും ഉണ്ട്.

വെറുതെ ഇരുന്നു കാണാൻ വേണ്ടി തരക്കേടില്ലാത്ത ഒരു ചിത്രം എന്നു പറയാം  Keanu വിനെ. എനിക്കു ഇഷ്ടപ്പെട്ടൂ എന്തായാലും. സിനിമ കാണണം എന്നുള്ളവർക്ക്  www.movieholicviews.blogspot.com ൽ ലിങ്ക് ലഭിക്കും.

Rating : 3/5

സിനിമ കണ്ടവർ ഉണ്ടെങ്കിൽ എന്താണ് അഭിപ്രായം?

1588.Rorschach (Malayalam, 2022)

 1588.Rorschach (Malayalam, 2022)

         Streaming on Hotstar.

ഒരു പക്ഷെ A-Z എന്ന നിലയിൽ നേരെ പോകുന്ന രീതിയിൽ ആണ്‌ ഈ സിനിമ അവതരിപ്പിച്ചിരുന്നത് എങ്കിൽ ക്ളീഷേ, പഴയ വീഞ്ഞ്, പുതിയ കുപ്പി എന്നൊക്കെ ആകും കൂടുതലും അഭിപ്രായങ്ങൾ വരുക. Rorschach ന്റെ തീം സിനിമ കണ്ടു കഴിഞ്ഞ് നോക്കുമ്പോൾ മനസ്സിലാകും എന്ത് സിംപിൾ ആയിരുന്നു എന്ന്. എന്നാൽ അത് അവതരിപ്പിച്ച രീതി കുറെയേറെ സങ്കീർണം ആയാണ്. പല ലെയറുകൾ ആയി, ഇടയ്ക്ക് സൂപ്പർ നാച്ചുറൽ ഹൊറർ  ആണോ, അതോ ഒരു സൈക്കോളജിക്കൽ ത്രില്ലർ ആണോ എന്ന് പല സിനിമ വിഭാഗത്തിലും ഉൾപ്പെടുത്താവുന്ന അല്ലെങ്കിൽ ഇത്തരത്തിൽ പല ലെയറുകൾ ഉണ്ടെന്ന രീതിയിൽ പ്രേക്ഷകൻ ചിന്തിച്ചാൽ പോലും കുറ്റം പറയാൻ കഴിയാത്ത രീതിയിൽ  സങ്കീർണം ആകുന്നുണ്ട്  Rorschach.

ഒരു പക്ഷെ ആ സങ്കീർണത ആകും Rorschach എന്ന പേരും സിനിമയും ആയി കൂടുതൽ ബന്ധം ഉണ്ടാക്കുന്നത്. കഥാപാത്രങ്ങൾ നോക്കിയാലും കുറച്ചു പേർക്ക് മാത്രമേ സ്‌ക്രീനിൽ സ്ഥാനം ഉണ്ടായിരുന്നുവെങ്കിലും അവർക്കെല്ലാം തന്നെ ഇത്തരത്തിൽ ഉള്ള സങ്കീർണതകൾ ധാരാളം ഉണ്ടായിരുന്നു. നഷ്ടങ്ങളുടെയും, നിഗൂഢതയുടെയും, വേർപാടുകളുടെയും, ചതിയുടെയും ശകലങ്ങൾ എല്ലാവരിലും പല സമയത്തായി കാണാമായിരുന്നു. അതിനോടുള്ള പ്രതികരണം ആണ്‌ കഥാപാത്രങ്ങളെ സങ്കീർണം ആക്കുന്നത്.

ഇവിടെയാണ്‌ നിസാം ബഷീറിന്റെ സംവിധാനം, സമീറിന്റെ എഴുത്ത്, മിഥുന്റെ സംഗീതം തുടങ്ങിയവയെല്ലാം മികവ് പുലർത്തുന്നത്. അവർ മനസ്സിൽ കണ്ടതിലും മേലെയായിരുന്നിരിക്കണം കഥാപാത്രങ്ങൾ സ്‌ക്രീനിൽ പ്രകടനം നടത്തിയത്. അത് ജഗദീഷ് ആയാലും ബിന്ദു പണിക്കർ ആയാലും ഷറഫുദീൻ ആയാലും കോട്ടയം നസീർ ആയാലും എല്ലാവരും അത്തരത്തിൽ മികച്ചു നിന്നു.

ഏജ്‌ - ഇൻ - റിവേഴ്സ് ഗിയർ മമ്മുക്ക തന്നെ കൈ വിട്ടൂ എന്നാണ് തോന്നുന്നത്. പ്രായം കുറയ്ക്കാൻ വേണ്ടിയുള്ള അധികം സ്ക്രീൻ ഗിമ്മിക്കുകൾ ഒന്നും അധികം ഇല്ലായിരുന്നു. സ്ക്രീപ്റ്റ് സെലക്ഷനിൽ ഈ അടുത്തായി കാണിക്കുന്ന ശ്രദ്ധ തന്നെ നല്ല കാര്യമാണ് അദ്ദേഹത്തിന്റെ കാര്യത്തിൽ. അതൊന്നും ഇവരെ നമ്മളൊക്കെ പറഞ്ഞ് പഠിപ്പിക്കേണ്ട കാര്യമില്ലല്ലോ. എന്നാലും നല്ല സെലക്ഷനുകൾ നടത്തുന്നു എന്നതും അതൊക്കെ നല്ല സിനിമകൾ ആയി മാറുന്നു എന്നത് തന്നെയാണ് മികച്ച കാര്യം.

കൊട്ടി ഘോഷിച്ച white -room - torture ഒന്നും സിനിമയിൽ വലുതായി ഇല്ലായിരുന്നു എന്നത് ചെറിയ നിരാശ ആയി. മൂല കഥയുമായി ബന്ധം ഉള്ള, ഏതാനും നിമിഷങ്ങൾ മാത്രമാണ് അത് സ്‌ക്രീനിൽ ഉണ്ടായിരുന്നത് . ഒരു അതിവേഗം എക്സ്പ്രെസ്സ് പോലെ പോകുന്ന ചിത്രമല്ല Rorschach. കഥയും കഥാപാത്രങ്ങളും എല്ലാം തന്നെ പെട്ടെന്ന് തന്നെ പ്രേക്ഷകന്റെ മനസ്സിൽ രെജിസ്റ്റർ ചെയ്തു അങ്ങ് പോവുകയാണ് സിനിമയിൽ. ചിലപ്പോഴൊക്കെ അതിൽ പലതും കിട്ടാതെ പോകുമ്പോൾ സിനിമയുടെ കഥ ഒന്നും മനസ്സിലായില്ല എന്നൊക്കെ ഉള്ള അഭിപ്രായങ്ങൾ ഉണ്ടാകും.

 സിനിമ നന്നായി തന്നെ ഇഷ്ടപ്പെട്ടു. നല്ല അഭിപ്രായങ്ങൾ ആണ്‌ തിയറ്റർ റിലീസ് സമയത്തു കേട്ടതും. അതിൽ നിന്നും വലിയ മാറ്റങ്ങൾ ഇല്ലായിരുന്നു സിനിമ OTT റിലീസ് കഴിഞ്ഞപ്പോൾ എന്നെ സംബന്ധിച്ചും. നേരത്തെ പറഞ്ഞത് പോലെ ക്ളീഷേ കഥ ആണല്ലോ എന്ന് അവസാനം തോന്നുമെങ്കിലും സിനിമയുടെ അവതരണം ഹൈ ക്ലാസ് ആണ്‌ ചിത്രത്തിൽ. അത് കൊണ്ട് തന്നെ നന്നായി ഇഷ്ടപ്പെട്ടൂ.

സിനിമ കണ്ടവരുടെ അഭിപ്രായങ്ങൾ പങ്കു വയ്ക്കുമല്ലോ?

1587. I Don't Feel at Home in This World Anymore (English,2017)

 1587. I Don't Feel at Home in This World Anymore (English,2017)

         Crime, Thriller: Streaming on Netflix.

         

സാധാരണമായി പോകുന്ന കഥ, അവസാനം വരുമ്പോൾ നമ്മൾ പ്രതീക്ഷിക്കാത്ത അത്ര കിടിലൻ ആയി മാറുന്നത് കാണണമെങ്കിൽ Don't Feel at Home in This World Anymore കണ്ടോളൂ.

  വിരസമായ ജീവിതവും ഒറ്റയ്ക്കുള്ള താമസവും ആയി ജീവിക്കുന്ന റൂത്ത്. ഒരു ദിവസം ജോലി കഴിഞ്ഞ് വരുമ്പോൾ റൂത്ത് കാണുന്നത് തന്റെ വീട്ടിൽ കയറി ആരോ മോഷണം നടത്തി എന്നതാണ്. റൂത്തിന്റെ ലാപ്റ്റൊപ്പും അവളുടെ മുത്തശ്ശി കൊടുത്ത സിൽവർ സ്പൂൺ സെറ്റും ആണ്‌ നഷ്ടപ്പെട്ടത്. ചെറിയ വസ്തുക്കൾ മോഷണം പോയത് കൊണ്ട് പോലീസും അധികം അനങ്ങിയില്ല. റൂത്ത് എന്നാൽ അത് വെറുതെ വിടാൻ തയ്യാറല്ലായിരുന്നു.

  അവൾ രണ്ടും കൽപ്പിച്ചു ഇറങ്ങി. ഒപ്പം ഒരു സുഹൃത്തിനെയും കിട്ടി. പിന്നീട് നടക്കുന്ന സംഭവങ്ങൾ അങ്ങ് കയറ്റം കയറി സ്പീഡിൽ പോകുന്ന വണ്ടിയിൽ നിന്നും മാറി റോക്കറ്റ് വേഗതയിലേക്ക് ആണ്‌ പോകുന്നത്. മൊത്തം ചോരക്കളി, അതും അപ്രതീക്ഷിതമായി പല സ്ഥലങ്ങളിലും ചെറിയ ട്വിസ്റ്റുകളിലൂടെ.

 John Wick സീരീസിൽ ഒക്കെ ഉള്ളത് പോലെ നമുക്ക് കാര്യമായി ഒന്നും ഇല്ല എന്ന് തോന്നുന്ന ഒരു വസ്തുവിന്റെ നഷ്ടത്തിൽ നിന്നും സിനിമയിലെ മുഖ്യ കഥാപാത്രം അതിനു വേണ്ടി നടത്തുന്ന പ്രയത്നങ്ങളുടെ ഒരു extreme വേർഷൻ ആണ്‌ ഈ സിനിമയിലും ഉള്ളത്. തുടക്കത്തിൽ ഉള്ള വേഗം കുറവ് ശരിക്കും ടോപ് ഗിയറിൽ പടം പിന്നീട് മാറ്റാൻ ഉള്ള ഗിമിക്ക് ആയി തന്നെ കാണാം. സീരിയസ് ആയ പടം ഒന്നും അല്ല. ചിരിക്കാനും ഉണ്ട്. അത് പോലെ തന്നെ ചോരക്കളിയും.

 എനിക്ക് വെറുതെ കണ്ടു തുടങ്ങി അവസാനം വളരെയേറെ ഇഷ്ടമായ ഒരു സിനിമയാണ് I Don't Feel at Home in This World Anymore. കണ്ടു നോക്കൂ എങ്ങാനും ഇഷ്ടപ്പെട്ടാലോ?

ചിത്രത്തിന്റെ ഡൌൺലോഡ് ലിങ്ക് t.me/mhviews1 ൽ ലഭ്യമാണ്.

കണ്ടവർ ഉണ്ടെങ്കിൽ അവരുടെ അഭിപ്രായം എന്താണ്?

1586. Goodnight Mommy (German, 2014)

 1586. Goodnight Mommy (German, 2014)

           Psychological Horror.

           

ഒരു സിനിമ കാണുമ്പോൾ മുന്നിൽ ഉള്ള കാഴ്ചകളെ വിശ്വസിക്കുക എന്നതാണ് സിനിമ ആസ്വദിക്കാൻ ഉള്ള ഒരു മാർഗം എന്ന് വിശ്വസിക്കുന്ന ആൾ എന്ന നിലയിൽ അതിനും അപ്പുറം നടക്കുന്ന സംഭവങ്ങൾ ഒരു സിനിമ നല്കുക ആണെങ്കിൽ അത് മികച്ച സിനിമ എന്നു പറയുകയും ചെയ്യും. അത്തരം ഒരു അനുഭവം നല്കിയ  സിനിമ ആണ് Goodnight Mommy എന്ന ഓസ്ട്രിയൻ ചിത്രം. 

ഇരട്ടകളായ എലിയാസിന്റെയും ലൂക്കോസിന്റെയും അമ്മ അപകടത്തിൽ സംഭവിച്ച പരിക്കുകൾ കാരണം മുഖത്ത് നടത്തിയ സർജറി കഴിഞ്ഞു വീട്ടില് എത്തിയിരിക്കുകയാണ് . അപ്പോഴാണ് ഇരട്ട കുട്ടികൾക്ക് ഒരു സംശയം. ഇത് തങ്ങളുടെ അമ്മ തന്നെയാണോ?അതോ മറ്റാരെങ്കിലും അവരുടെ അമ്മ ആണെന്ന് അവകാശപ്പെട്ടു അവിടെ വന്നതാണോ?അമ്മയുടെ സ്വഭാവത്തിലെ വ്യത്യാസങ്ങൾ അവരെ അങ്ങനെ സംശയിപ്പിച്ചു എന്നതാണ് ശരി. ഇതിന് പിന്നിൽ ഉള്ള രഹസ്യം കണ്ടെത്താൻ അവര് ശ്രമം തുടങ്ങി. ആ ശ്രമങ്ങൾ അവരെ എവിടെ വരെ കൊണ്ടെത്തിക്കുന്നു എന്നതാണ് സിനിമയുടെ ബാക്കി കഥ. 

തുടക്കത്തിൽ പ്രതിപാദിച്ചത് പോലെ Suspension of Disbelief ന്റെ സാധ്യതകൾ കഥയിലും , അത് വഴി പ്രേക്ഷകനിലും എത്തിക്കാൻ ഈ ചിത്രത്തിന് സാധിച്ചിട്ടുമുണ്ട്. ഒരു പരിധി വരെ നമ്മൾ മനസ്സിലാക്കിയ കഥയിൽ നിന്നും ചുരുക്കം ചില സൂചനകളിലൂടെ മാത്രമാണ് നമ്മൾ യാഥാർഥ്യം എന്താണെന്നു മനസ്സിലാക്കുന്നത് പോലും . അത് വലുതായി നമ്മുടെ മുന്നിൽ ഇട്ടു തരുന്നും ഇല്ല. എന്നാൽ ഊഹിക്കുന്ന കഥ പോലും ശരിയാകുന്ന തരത്തിൽ ആണ് സിനിമയുടെ അവസാനം നമ്മുടെ മുന്നിൽ എത്തുന്നത്. അതും സൈക്കോളജിക്കൽ ഹൊറർ + കുറച്ചു സ്ലാഷർ രീതിയിലും.

  എനിക്കു നന്നായി ഇഷ്ടപ്പെട്ടൂ സിനിമ. സിനിമ അഭിരുചികൾ ആപേക്ഷികം ആയത് കൊണ്ട് തന്നെ എല്ലാവർക്കും ഇഷ്ടപ്പെടണം എന്നുമില്ല. പ്രത്യേകിച്ചും സിനിമയുടെ അവസാന രംഗങ്ങൾ എല്ലാം തന്നെ അത്തരത്തിൽ ഒരു ഫീൽ നല്കുന്നതുമാണ്. താൽപ്പര്യം ഉള്ളവർ കണ്ടു നോക്കുക. 

ലിങ്ക് t.me/mhviews1 ൽ ലഭ്യമാണ്. 

Goodnight Mommy നേരത്തെ കണ്ട ആളുകളുടെ  അഭിപ്രായം എന്താണ്? ഈ സിനിമയുടെ ഇംഗ്ലീഷ് റീമേക് Prime Video യിൽ ലഭ്യമാണ്. കൂടുതൽ വിശദീകരണങ്ങൾ നൽകിയതിലൂടെ അധികം പ്രേക്ഷക പ്രശംസ നേടിയില്ല ചിത്രം എന്നാണ് അറിയാൻ കഴിഞ്ഞത് . 

1584. Watcher (English, 2022)

 1584. Watcher (English, 2022)

          Psychological Horror: Streaming on Shudder

അമേരിക്കയിൽ നിന്നും ഭർത്താവിന്റെ ജോലിയുടെ ആവശ്യത്തിനായി റൊമാനിയായിലേക്ക് താമസം മാറിയ ജൂലിയ , റൊമാനിയയിലെ ജീവിതത്തിന്റെ ആദ്യ ദിവസങ്ങളിൽ തന്നെ ഒരു രഹസ്യം കണ്ടെത്തി. എതിർവശത്ത് ഉള്ള അപ്പാർട്ട്മെന്റിലെ ജനാലയിലൂടെ  തന്നെ ആരോ നിരീക്ഷിക്കുന്നുണ്ട്. പിന്നീട് അവളുടെ ഭയം കൂടി വരുകയാണ് ഉണ്ടായത്. താൻ ഒറ്റയ്ക്ക് പുറത്തു പോകുമ്പോൾ ഒരാൾ അവളെ പിന്തുടരുന്നതായും അവൾക്ക് തോന്നുന്നു. ആ ദിവസങ്ങളിൽ ജൂലിയ താമസിക്കുന്ന സ്ഥലത്തിന്റെ അടുക്കൽ സ്ത്രീകളെ കൊലപ്പെടുത്തുന്ന ഒരു സീരിയൽ കില്ലരുടെ സാന്നിദ്ധ്യവും അവളെ കൂടുതൽ ഭീതിപ്പെടുത്തി. 

 അവളുടെ വാക്കുകൾ എന്നാൽ വിശ്വസിക്കാൻ ആരും തയ്യാർ അല്ലായിരുന്നു. അത് പോലീസ് ആകട്ടെ, അവളുടെ ഭർത്താവ്  ഫ്രാൻസിസ് ആകട്ടെ, അവളുടെ സംശയങ്ങളെ ,ഭയത്തെ അവർ ആരും കണക്കിലെടുക്കുന്നില്ല. ജൂലിയയുടെ ചിന്തകൾ യഥാർഥത്തിൽ അവളുടെ തോന്നലുകൾ ആയിരുന്നോ?ഭർത്താവ് ജോലിക്ക് പോകുമ്പോൾ ഒറ്റയ്ക്ക് ഇരുന്നു അവൾ ആലോചിച്ചു കൂട്ടുന്നത് ആയിരുന്നോ?അതോ അവളെ ആരെങ്കിലും യഥാർഥത്തിൽ പിന്തുടരുന്നുണ്ടോ? ജൂലിയയെ പോലെ പ്രേക്ഷകനിലും ഈ സംശയങ്ങൾ ചിത്രത്തിൽ നിന്നും ഉണ്ടാകുന്നുണ്ട്. 

എന്നെ സംബന്ധിച്ച്, ഇങ്ങനെ വന്നാലെ സിനിമ തീരൂ എന്ന ചിന്തയിൽ ഇതിൽ ഒരു ഓപ്ഷൻ ആയിരുന്നു മനസ്സിൽ. അത് പോലെ തന്നെ വരുകയും ചെയ്തു. എന്നാലും സിനിമയിലേക്ക് പ്രേക്ഷകനെ എത്തിക്കാൻ കഴിയുന്നുണ്ട് Watcher നു. ഹിച്ച്കോക്കിന്റെ Rear Window തെളിച്ച പാതയിൽ ആണ് ഈ ചിത്രവും. ഇത്തരത്തിൽ ദൂരെ ഇരുന്നു കൊണ്ട്, എന്നാൽ കാഴ്ചയുടെ പരിധിയിൽ വരുന്ന സംശയങ്ങൾ നൽകുന്ന ത്രിൽ ചില ചിത്രങ്ങളിൽ അനുഭവിച്ചതാണ്. അടുത്തിറങ്ങിയ The Girl on the Train, The Woman in the Window തുടങ്ങിയ സിനിമകൾ എല്ലാം തന്നെ ഇത്തരം ഒരു ആകാംക്ഷ കാരണം തന്നെ കണ്ടതാണ്. ഇത്തരം സിനിമകളെ കുറിച്ച് പല അഭിപ്രായം ആയിരിക്കും പലർക്കും. എന്നാൽ ഇത്തരം ഒരു വിഷയം നൽകുന്ന curiosity ഇഷ്ടപ്പെടുന്ന ആൾ ആണെങ്കിൽ ഒന്ന് കണ്ടു നോക്കാം. 

ലിങ്ക്  t.me/mhviews1 ൽ ലഭ്യമാണ്.

സിനിമ കണ്ടവരുടെ അഭിപ്രായം എന്താണ്?

1583. Detective vs Sleuths (Cantonese, 2022)

1583. Detective vs Sleuths (Cantonese, 2022)

           Mystery, Thriller.

വർഷങ്ങൾക്ക് മുന്നേ ഹോങ്കോംഗിൽ  നടന്ന കുറെയേറെ കൊലപാതകൾ . അതിൽ പലതിലും പ്രതികളെ പിടിക്കൂടാൻ സാധിച്ചിരുന്നില്ല. പല കൊലപാതക പരമ്പരകളിലും സൈക്കോപ്പാത്ത് ആയ സീരിയൽ കില്ലറുകൾ ആയിരുന്നു പ്രതികൾ . ഏറെ വർഷങ്ങൾക്ക് ശേഷം ഇന്ന്, അന്ന്  കൊലപാതകം നടത്തിയ  ഓരോരോ ആളുകളെയും  ഒരു കൂട്ടം ആളുകൾ കൊല്ലുകയാണ് . The Chosen Sleuths എന്ന് വിളിക്കുന്ന ഒരു കൂട്ടം ആളുകൾ ആണ് ഇതിന് പിന്നിൽ. ഇവർക്കെല്ലാം നേരത്തെ നടന്ന കൊലകളിൽ കൊല്ലപ്പെട്ടവരും ആയി ഒരു ബന്ധം ഉണ്ട്. അന്ന് മരിച്ചവരുടെ ബന്ധുക്കൾ ആണ് ഈ vigilante ഗ്രൂപ്പിൽ ഉള്ളത്. 

ഓരോ കൊലയ്ക്ക്  ശേഷവും അടുത്ത കൊലപാതകം ഏതാണ് എന്ന് പറയാൻ വേണ്ടി പഴയ കേസ് ഫയലുകളുടെ നമ്പർ രേഖപ്പെടുത്തി പൊലീസിനെ വെല്ലുവിളിച്ചു കൊണ്ടാണ് ആണ് അവരുടെ പ്രവർത്തനം. അവരെയും കുറ്റം  പറയാൻ സാധിക്കില്ല. നീതി സ്വയം വാങ്ങി എടുക്കാൻ അവർക്ക് മുന്നിൽ ഉള്ള വഴികൾ എല്ലാം നേരത്തെ തന്നെ അടച്ചിരുന്നു.അവരുടെ വഴി അവർ തിരഞ്ഞെടുത്തു. ഇവരുടെ പ്രവർത്തികളുടെ പിന്നിൽ ഇവരെ നയിക്കുന്ന ആരോ ഉണ്ട്.അത്  പഴയ കുറ്റാന്വേഷകൻ ആയ ജുൻ -ലീ ആണെന്ന് പോലീസ് വിശ്വസിക്കുന്നു. എന്നാൽ ജുൻ ലീയക്ക് പറയാൻ വേറെ കാര്യങ്ങൾ ആണ് ഉണ്ടായിരുന്നത്. ആരാണ് ഇവരുടെ നേതാവ്?ആര് കണ്ടെത്തൽ ആണ് സത്യം?ഇതെല്ലാം ആണ് സിനിമ പറയുന്ന ബാക്കി കഥ. 

  കഥ കേൾക്കുമ്പോൾ ഒരു മിസ്റ്ററി ചിത്രം എന്ന നിലയിൽ  കൌതുകം ഉണ്ടെങ്കിലും   ഇത്തരം ഒരു പ്രമേയം അവതരിപ്പിക്കുമ്പോൾ കുറേ കൂടി നന്നായി സിനിമ അവതരിപ്പിച്ചിരുന്നെങ്കിൽ എന്ന് തോന്നി പോയി. കൂടുതൽ ആയി പോയി എന്ന് തോന്നിക്കാവുന്ന ആക്ഷൻ സംഘട്ടന രംഗങ്ങൾ കുറയ്ക്കാമയിരുന്നു എന്ന് ഉള്ളത് മറ്റൊരു അഭിപ്രായം . കൊറിയൻ -ജാപ്പനീസ് സിനിമകളിലെ പോലെ കൂടുതൽ വൈകാരികമായും കൂടുതൽ നിഗൂഡത നിറഞ്ഞ രീതിയിൽ അവതരിപ്പിക്കാവുന്ന കഥ ഉണ്ടായിരുന്നെങ്കിലും ഒരു ആക്ഷൻ ത്രില്ലർ എന്ന രീതിയിൽ മാത്രമാണ് സിനിമയെ അണിയറക്കാർ അവതരിപ്പിക്കാൻ ശ്രമിച്ചിരിക്കുന്നത്. അത്തരം ഒരു ഉദ്യമം അൽപ്പം പാളി പോയതായും തോന്നി. 

നല്ല താൽപ്പര്യത്തോടെ കണ്ടിരിക്കാവുന്ന, സസ്പൻസ് ഘടകങ്ങൾ ധാരാളം ഉള്ള കഥ സ്ക്രീനിൽ വരുമ്പോൾ സിനിമ എന്ന നിലയിൽ അത്തരം ഒരു അനുഭവം ഉണ്ടാകുന്നില്ല പ്രേക്ഷകന്. എന്നാലും മോശം ചിത്രം ആണെന്നുള്ള അഭിപ്രായമില്ല. കഥയുടെ synopsis വായിച്ചപ്പോൾ കൂടുതൽ പ്രതീക്ഷിച്ചിരുന്നു എന്ന് മാത്രം. അത് കൊണ്ട് തന്നെ തരക്കേടില്ലാത്ത ഒരു സിനിമ അനുഭവം ആണ്  Detective vs Sleuths.

ചിത്രം കാണണം എന്നുള്ളവർക്ക് ലിങ്ക്  t.me/mhviews എന്ന ടെലിഗ്രാം ചാനലിൽ  ൽ ലഭ്യമാണ്. 

സിനിമ കണ്ടവരുടെ അഭിപ്രായം എന്താണ്? 

1582. The Good Nurse(English, 2022)

 1582. The Good Nurse(English, 2022)

          Crime, Drama: Streaming on Netflix

 ആരും എന്നെ തടഞ്ഞില്ല എന്ന ഒരു ഉത്തരം. അതും കുറെയേറെ, ഏറെ എന്ന് പറഞ്ഞാൽ,ഏകദേശം നാന്നൂറോളം കൊലപാതകങ്ങൾ നടത്തിയ ഒരാൾ പറയുന്നതിന്റെ പുറകിൽ ഉള്ള അയാളുടെ മാനസികാവസ്ഥ എന്തായിരിക്കും? അയാളുടെ ജീവിതത്തിൽ നടന്ന സംഭവങ്ങൾക്ക് അതിൽ പങ്കു ഉണ്ടായിരുന്നിരിക്കാം. എന്നാലും അത്തരം ഒരു ഉത്തരം അയാളുടെ ചെയ്തികളുടെ പുറകിൽ ഉള്ള കാരണം ആയി മാറുന്നത് എങ്ങനെ ആയിരിക്കാം?

ചാൾസ് ഗ്രേബരുടെ The Good Nurse: A True Story of Medicine, Madness, and Murder എന്ന ബയോഗ്രാഫി അമേരിക്കയിൽ നടന്ന ഏറ്റവും വലിയ കൊലപാതക പരമ്പരയുടെ കഥയാണ്. ഭാവനയിൽ വിരിഞ്ഞ ഒരു സീരിയൽ കില്ലർ അല്ല ഇവിടെ ഉള്ളത്. പകരം  മനുഷ്യ കോലത്തിൽ ഈ ഭൂമിയിൽ ജീവിച്ച ഒരാളുടെ കഥ. ആ കഥയുടെ സിനിമ ആവിഷ്ക്കാരം ആണ്‌ The Good Nurse എന്ന ചിത്രം.

 ആമി നേഴ്‌സ് ആയി ജോലി ചെയ്യുന്ന സ്ഥലത്താണ് പതിവില്ലാത്ത വിധം മരണങ്ങൾ പെട്ടെന്ന് കൂടുന്നത്. ആ മരണങ്ങളുടെ പിന്നിൽ എന്തോ ദുരൂഹത അവൾക്കു തോന്നിയത് പോലീസ് അവളുമായി സംസാരിച്ചപ്പോൾ ആണ്‌. പലരും ഒരു പക്ഷെ അറിഞ്ഞിട്ടു പോലും കണ്ണടച്ച് ഒരാളെ രക്ഷിക്കുക ആണെന്ന് പോലും അവൾക്കു തോന്നുന്ന വിധത്തിൽ ആയി സംഭവങ്ങൾ മുന്നോട്ട് പോയപ്പോൾ.ഈ കൊലയ്ക്ക് ആരാണ് യഥാർത്ഥത്തിൽ ഉത്തരവാദികൾ? കൊലയാളിക്കു ഇത്രയും കൊലപാതകങ്ങൾ നടത്താൻ എങ്ങനെ കഴിഞ്ഞ്? എന്താണ് അയാളെ അതിനു പ്രേരിപ്പിച്ചത്? സഹായിച്ചത്?

മനുഷ്യ ജീവനുകൾക്ക് ആ കൊലയാളി എന്ത് വില ആണ്‌ അയാൾ കൊടുത്തിട്ടുണ്ടാവുക? അയാളുടെ കൊലപാതകങ്ങൾക്ക് പിന്നിൽ ഉള്ള യഥാർത്ഥ കാരണങ്ങൾ പോലും കണ്ടു പിടിക്കാൻ സാധിച്ചില്ല എന്നത് അയാളുടെ ജീവിത കഥ ലോകത്തിൽ യഥാർത്ഥത്തിൽ ജീവിച്ചിരുന്ന ഏതൊരു കൊലയാളിയേക്കാളും മറ്റുള്ളവരെ ഭയപ്പെടുത്തുന്നു. വളരെ eerie ആയ ഒരു അന്തരീക്ഷം ആണ്‌ സിനിമയിൽ ആ സംഭവങ്ങൾ അവതരിപ്പിക്കുമ്പോൾ ഉള്ളത്. ഒരു തരം മരവിപ്പ് തോന്നും അതിലെ പല സംഭവങ്ങളും.

എഡ്ഢി റെഡ്മയന്റെ അഭിനയത്തെ കുറിച്ച് കൂടുതൽ ഒന്നും പറയേണ്ട ആവശ്യമില്ലല്ലോ. അയാൾ ആ കഥാപാത്രമായി ജീവിക്കുക ആയിരുന്നു. പ്രത്യേകിച്ചും ക്ലൈമാക്സിലേക്ക് പോകുന്ന രംഗങ്ങളിൽ. അസാധ്യ അഭിനയം. നമ്മൾ കാണുന്നത് സിനിമ അല്ല. പകരം യഥാർത്ഥത്തിൽ നമ്മുടെ എല്ലാം കണ്മുന്നിൽ നമ്മൾ അറിയാതെ നടന്ന കൊലപാതകങ്ങൾ ആണെന്ന് ഓർക്കുമ്പോൾ ഉള്ള വികാരം ഉണ്ടല്ലോ? അതെന്തു മാത്രം ഭയാനകം ആണ്‌?

  ഇത്തരം ഒരു വിഷയം ആയതു കൊണ്ട് തന്നെ പതിഞ്ഞ രീതിയിൽ ആണ്‌ ചിത്രം പോകുന്നത്. കഥ എല്ലാവർക്കും അറിയാവുന്നത് കൊണ്ട് തന്നെ സമയം എടുത്തു കഥാപാത്രങ്ങളെ അനുഭവിച്ചു അറിയാൻ ഉള്ള സമയം ആണ്‌ സ്‌ക്രീനിൽ നിന്നും ലഭിക്കുന്നത്. ചിത്രം പറയാൻ ഉദ്ദേശിച്ച സംഭവം നല്ല രീതിയിൽ അവതരിപ്പിച്ചിട്ടുണ്ട്.

Long term care ൽ ജോലി ചെയ്യുന്ന ഭാര്യയും ആയിട്ടാണ് സിനിമ കണ്ടത്. അവിടെ നടക്കുന്ന പല സംഭവങ്ങളും സിനിമയും ആയി റിലേറ്റ് ചെയ്താണ് കണ്ടത്. അത് കൊണ്ട് തന്നെ നല്ലൊരു അനുഭവം ആയിരുന്നു സിനിമ.

കണ്ടു നോക്കൂ. കണ്ടിട്ട് ഉള്ളവരുടെ അഭിപ്രായം എന്താണ്??

Telegram download link: t.me/mhviews1

1580. Sabash Chandra Bose (Malayalam, 2022)

 1580. Sabash Chandra ബോസ് (Malayalam, 2022)

           Streaming on Amazon Prime.

ദൂരദർശൻ, ആദ്യക്കാല ബ്ളാക് ആൻഡ് വൈറ്റ് ടി വി, കളർ ടി വി, നിർമ്മയുടെ പരസ്യം തുടങ്ങിയ നൊസ്റ്റാൾജിയകൾ . ഇതിന്റെ കൂടെ സ്വന്തം വീട്ടിൽ ടി വി ഇല്ലാത്തവർ അയൽ വീടുകളിൽ പോയി ടി വി കാണുന്ന വലിയ നൊസ്റ്റാൾജിയ. ഇത്രയും കാര്യങ്ങൾ ഉൾപ്പെടുത്തി, അതിൽ നിന്നും ഉരുതിരിഞ്ഞ ഒരു സംഭവം  പ്രമേയം ആക്കിയ ഒരു സിനിമ ആണ്‌ സബാഷ് ചന്ദ്ര ബോസ് .എന്നാൽ ഇതെല്ലാം കൂടി കൂട്ടി ഒരു സിനിമ ആക്കാൻ ഉള്ള എന്തെങ്കിലും ഉണ്ടോ എന്ന് ആലോചിച്ചു പോയി സിനിമ തുടങ്ങി കുറച്ചു കഴിഞ്ഞപ്പോൾ.

 നൊസ്റ്റാൾജിയ മാത്രം വേവിച്ചാൽ ഒരു സിനിമ ആകില്ലല്ലോ? അതിനു കുറച്ചു പാകം വന്ന ഒരു കഥ കൂടി ഉണ്ടെങ്കിൽ അല്ലെ കാണാൻ പാകത്തിൽ ഉണ്ടെങ്കിൽ അല്ലെ സിനിമ ആകൂ? അതാണ്‌ സബാഷ് ചന്ദ്ര ബോസ് സിനിമ . ഒരു ഷോർട്ട് ഫിലിമിന് ഉള്ള കഥ നീട്ടി വലിച്ചു സിനിമ ആക്കി. ഇടയ്ക്ക് ചില തമാശകൾ കൊള്ളാം എന്ന് തോന്നി. എഡിറ്റിങ് ഒന്നും സിനിമയിൽ പ്രശ്നമുണ്ടോ എന്ന് കാര്യമായി ശ്രദ്ധിക്കാത്ത എനിക്ക് പോലും ഇടയ്ക്ക് എഡിറ്റിങ്  പോരാ എന്ന് തോന്നി. എഡിറ്റിങ് ചെയ്യാൻ അറിയാത്തതു കൊണ്ട് മാത്രം കൂടുതൽ ഒന്നും പറയുന്നില്ല.

വെറുതെ ഫാമിലി ഒക്കെ ആയി ചുമ്മാ ഇരുന്നു കാണാവുന്ന ടി വി സിനിമ പോലെ ഒന്നാണ് സബാഷ് ചന്ദ്ര ബോസ്. അതിനപ്പുറം തിയറ്ററിൽ റിലീസ് ആകേണ്ട സിനിമ എന്ന നിലയിൽ ഒന്നും ഇല്ല സിനിമ എന്ന നിലയിൽ മേന്മ പറയാൻ. കുറച്ചു നൊസ്റ്റാൾജിയ തോന്നുന്ന സംഭവങ്ങൾ ഒന്ന്  കാണണം എങ്കിൽ സബാഷ് ചന്ദ്ര ബോസ് കണ്ടോളൂ എന്നതിൽ കൂടുതൽ ഒന്നും പറയാനില്ല.

 എനിക്ക് അത്ര മികച്ച സിനിമ ആയി തോന്നിയില്ല. എന്താണ്  സിനിമ കണ്ടവരുടെ അഭിപ്രായം?

1581. Appan (Malayalam, 2022)

 1581. Appan (Malayalam, 2022)

        Streaming on SonyLiv.

 ഇട്ടിച്ചൻ; ഇത്രയേറെ വെറുപ്പ്‌ തോന്നിയ ഒരു കഥാപാത്രം ഈ അടുത്ത് മലയാളം സിനിമയിൽ ഉണ്ടായിട്ടില്ല അല്ലെങ്കിൽ ഞാൻ കണ്ടിട്ടില്ല .ആരോടും അനുകമ്പ ഇല്ലാത്ത, സ്വന്തം കാര്യം മാത്രം നോക്കി ജീവിക്കുകയും സ്വയം കുടുംബ ബന്ധങ്ങൾക്ക് ഒരു വിലയും കൊടുക്കാത്ത ദുഷ്ടൻ എന്ന് പറയാവുന്ന ഒരു കഥാപാത്രം. അതിന്റെ നേരെ വിപരീത സ്വഭാവം ഉള്ള ഞ്ഞൂഞ്ഞു എന്ന മകൻ. മലയോര പ്രദേശം ആണ്‌ കഥയുടെ പശ്ചാത്തലം . സിനിമയുടെ മൊത്തത്തിൽ ഉള്ള ആമ്പിയൻസ് ജോജി എന്ന സിനിമയുടെ പോലെയും. ഒരു പക്ഷെ അതിലും മനസാക്ഷി ഇല്ലാത്ത കഥാപാത്രവും. അതാണ്‌ അപ്പൻ എന്ന സിനിമ.

സ്‌ക്രീനിൽ അഭിനേതാക്കൾ ജീവിക്കുക ആണെന്ന് പറയാറില്ലേ? അതിനോട് അക്ഷരം പ്രതി യോജിക്കുന്ന സിനിനയും കഥാപാത്രങ്ങളായി മാറിയ അഭിനേതാക്കളും ആണ്‌ അപ്പൻ എന്ന സിനിമയിൽ ഉള്ളത്.പോളി വിത്സൻ, അനന്യ, രാധിക തുടങ്ങി സ്ത്രീ കഥാപത്രങ്ങൾ നന്നായി തന്നെ അവരുടെ റോളുകൾ ചെയ്തിട്ടുണ്ട്.സണ്ണി വെയ്നിന്റെയും ആലൻസിയരുടെയും ഏറ്റവും മികച്ച പ്രകടനം ആണ്‌ ഈ സിനിമയിൽ ഉള്ളത്. അവസാനം പ്രേക്ഷകന്റെ അനുകമ്പ ഞ്ഞൂഞ്ഞു നേടുന്നുമുണ്ട്.

ഭയങ്കര നെഗറ്റീവ് വൈബ് ആണ്‌ സിനിമ ഉണ്ടാക്കുന്നത്. ഇട്ടിയുടെ കഥാപാത്രം അത്ര raw ആണ്‌. അയാൾ തളർന്നു കിടക്കുക ആണെങ്കിലും അയാളുടെ സ്വഭാവവും വർത്തമാനവും കാണുകയും കേൾക്കുകയും ചെയ്യുമ്പോൾ അയാളുടെ വീട്ടുകാരെ പോലെ നമുക്കും അയാൾ ഒന്ന് മരിച്ചാൽ മതിയെന്ന് തോന്നിക്കും. അത്രയും ക്രൂരൻ. പ്രത്യേകിച്ചും ക്ലൈമാക്സിൽ അയാളുടെ പേടിസ്വപ്നമായ കുരിയായോട് പറയുന്നത്, സിനിമ ആയി പോയി ഇങ്ങനെയും മനുഷ്യരുണ്ടോ എന്ന് തോന്നി പോകും.

 ഒരു സിനിമ എന്ന നിലയിൽ എല്ലാവർക്കും ഇഷ്ടപ്പെടുമോ എന്ന് അറിയില്ല. നാട്ടുരാജവിലെ അച്ഛൻ കഥാപാത്രം എത്ര മാത്രം വെറുപ്പിച്ചോ അതിനും മുകളിൽ പറയാം ഇതിലെ ഇട്ടിയെ. വ്യത്യസ്തമായ, പ്രതീക്ഷിക്കാത്ത രീതിയിൽ ഇത്തരം ഒരു തീം അവതരിപ്പിച്ചത് കൊണ്ട് തന്നെ ചിത്രം ഇഷ്ടമായി എനിക്ക്.

 റെജിനയിൽ ഇന്റർനാഷണൽ ഫിലിം ഫെസ്റ്റിവൽ (RIFFA) വന്നപ്പോൾ ഇന്ത്യൻ വിഭാഗത്തിൽ പ്രീമിയറിങ്ങിനു ഈ ചിത്രം ആയിരുന്നു വച്ചിരുന്നത്. ചില സാങ്കേതിക കാരണങ്ങളാൽ അത് നടന്നില്ല. നടക്കാത്തത് നന്നായി എന്ന് സിനിമ കണ്ടപ്പോൾ തോന്നി. നമ്മുടെ ആസ്വാദന ശേഷി അനുസരിച്ചു ഇരിക്കും ഈ സിനിമ ഇഷ്ടപ്പെടുക എന്നത്. എല്ലാ തരം സിനിമകളും കാണുന്ന ആളാണെങ്കിൽ മാത്രം കാണുക.

സിനിമ കണ്ടെങ്കിൽ എന്താണ് അഭിപ്രായം?