1762. Animal (Hindi, 2023)

 

1762. Animal (Hindi, 2023)

        Streaming on Netflix

⭐⭐⭐⭐/5

യുവതയെ വഴിതെറ്റിക്കുന്ന, പുരുഷ മേധാവിത്വത്തിന്റെ, കലിപ്പനും കാന്താരിയുടെയും, അത് പോലെ ആൽഫ മെയിലിന്റെ പുണ്യ പുരാണ സിനിമ എന്ന നിലയിൽ കുപ്രസിദ്ധിയാർജിച്ച Animal എനിക്ക് നല്ല പോലെ ഇഷ്ടമായി. ചിലപ്പോൾ ഈ സമൂഹത്തിന്റെ പോക്ക് എങ്ങോട്ട് ആണെന്ന് വരെ ചിന്തിച്ചു പോകേണ്ടി വരും ഈ സിനിമ കണ്ടു കഴിഞ്ഞ് എന്ന് പറയുന്ന ധാരാളം ആളുകളെ കണ്ടത് കൊണ്ടാണ് ഇങ്ങനെ ഒരു മുഖവുര.

ഇന്ന് ഒരു വീഡിയോയിൽ സിനിമയിലെ Pappa Count 196 പ്രാവശ്യം ആണെന്ന് കണ്ടിരുന്നു. സിനിമയുടെ മുഖ്യ പ്രമേയവും അതാണ്‌. സ്വന്തം പിതാവിനെ ലോകത്തിൽ എന്തിനേക്കാളും ഇഷ്ടപ്പെടുന്ന, അയാൾ അൽപ്പ നേരം  അവനെ മനസ്സിലാക്കി അവന്റെ കൂടെ ഉണ്ടാകണം എന്ന് ആഗ്രഹിച്ചിരുന്നു രൺവിജയ് സിംഗിന്റെ കഥയാണ് Animal. ശരിക്കും അവനൊക്കെ മൃഗത്തെ സമൂഹത്തിലേക്കു കൊണ്ട് വരുന്നത് അവന്റെ അന്ധമായ ഈ സ്നേഹം ആണ്. എന്നാൽ അവന്റെ പിതാവായ ബൽബീർ അത് മനസിലാക്കാതെ പോകുന്നു.

സിനിമാറ്റിക് രീതിയിൽ അത് ഒരു chaos ആയി മാറുകയാണ്. ധാരാളം ചോരക്കളികൾ, രൺവീർ സിംഗിന്റെ ഫ്രസ്‌ട്രേഷൻ, അത് അനുഭവിക്കുന്ന അവന്റെ ചുറ്റും ഉള്ളവർ, ആ കഥാപാത്രം ഗംഭീരം ആയി അവതരിപ്പിച്ചപ്പോൾ അത് ഇഷ്ടം ഇല്ലാത്ത പ്രേക്ഷകരും അത് ഇഷ്ടപ്പെടുന്ന ആളുകളും. ഈ സിനിമക്ക് അങ്ങനെ ഒരു പ്രത്യേകത കൂടി കാണും. ഒരു പക്ഷെ ഈ സിനിമയെ മൊത്തമായി വെറുക്കുന്ന ആളുകളും അല്ലെങ്കിൽ അത് പോലെ ഇഷ്ടപ്പെടുന്നവരും.അതിനു കാരണം രൺബീർ കപൂറിന്റെ കഥാപത്രമായി ആയി മാറാൻ ഉള്ള ഗംഭീര കഴിവ് ആയിരുന്നു.

രൺവിജയ് സിംഗ് നല്ലവൻ ഒന്നും അല്ലായിരുന്നു. അയാളുടെ എന്തെങ്കിലും നല്ല വശം അയാൾക്ക്‌ പിതാവിനോട് ഉള്ള സ്നേഹം ആയിരുന്നു. എന്നാൽ ടോക്സിക് പേരന്റിങ്ങിനു ഒപ്പം തന്നെ അതെ പോലെ അസഹനീയം ആയ ഒരു ബന്ധം ആയിരുന്നു അവനു അയാളോട് ഉണ്ടായിരുന്നതും.അയാൾ ചെയ്തു കൂട്ടുന്നത് പുറത്തിറങ്ങി ആരെങ്കിലും ചെയ്താൽ മാനസിക പ്രശ്നം ഉള്ള ആളാണെന്നു പറഞ്ഞ് ഒരു പക്ഷെ ചികിത്സ കൊടുത്തേനെ.

പക്ഷെ ഇത് ഒരു സിനിമയാണ്. ആ സിനിമയിലെ ഇങ്ങനത്തെ ഒരു കഥാപാത്രത്തിനെ നെഗറ്റീവ് ആയി എങ്കിലും ലാർജർ താൻ ലൈഫ് എന്ന് പറഞ്ഞ് വയ്ക്കുന്നത്ര നന്നായി രൺബീർ ചെയ്തു.ചിലർക്കൊക്കെ ചെറുതായി തങ്ങളുടെ ജീവിതവും ആയി കണക്റ്റ് ചെയ്യാൻ പറ്റുമായിരിക്കും ഇതിലെ അച്ഛൻ - മകൻ ബന്ധം. മൂന്നു മണിക്കൂറിൽ ഏറെയുള്ള സിനിമ കാണുന്ന ആളുടെ ചായക്കപ്പ് ആണെങ്കിൽ ഒറ്റ ഇരുപ്പിന് കണ്ടു തീർക്കും. സ്വന്തം അനുഭവം ആണ്.

 വലിയ ക്യാൻവാസിൽ ഉള്ള ഫൈറ്റ് സീനുകൾ എല്ലാം ഗംഭീരം ആയിരുന്നു. ബോബി ഡിയോളിന്റെ സ്ക്രീൻ സ്‌പേസ് കുറവാണെങ്കിലും ഉള്ള സമയം കിടിലം ആക്കിയിട്ടുണ്ട്. അടുത്ത ഭാഗത്തിന് വേണ്ടിയുള്ള കഥയ്ക്ക് വഴി തുറന്ന് ഇട്ടു കൊണ്ടാണ് സിനിമ അവസാനിക്കുന്നത്. അത് കണ്ടത് വച്ച് അടുത്ത ഭാഗം ഇതിലും മാരകം ആകാൻ സാധ്യത ഉണ്ട്.

പിന്നെ ക്‌ളാസിക് കലിപ്പന്റെ കാ‍ന്താരി സെറ്റപ്പ് ആയിരുന്നു സിനിമയിലെ സോ കോൾഡ് പ്രണയ രംഗങ്ങൾ മൊത്തം. ഇങ്ങനെ ആഗ്രസിവ് ആയ കഥാപാത്രത്തിൽ നിന്നും വേറെ എന്ത് പ്രതീക്ഷിക്കാൻ ആണ്? സിനിമ റിയാലിറ്റി ആണോ എന്ന് ചോദിച്ചാൽ അല്ല എന്ന് തന്നെ പറയേണ്ടി വരും. കാരണം ഇതിൽ ഉള്ളത് ഒന്നും റിയൽ ലൈഫിൽ നടക്കാൻ സാധ്യത ഇല്ലാത്ത കാര്യങ്ങളും ആണ്. ഒരു പക്ഷെ രൺവിജയ് സിംഗ് കുട്ടിക്കാലത്തു താഴെ തെന്നി വീണ് കോമയിൽ വല്ലോം ആയി പിന്നീട് എപ്പോഴെങ്കിലും ഇമാജിൻ ചെയ്യുന്ന കാര്യവും ആയിരിക്കാം ഇതിന്റെ മൊത്തം കഥയും.

പക്ഷെ മികച്ച അവതരണം, അത് പോലെ സിനിമയിലെ ലാർജർ താൻ ലൈഫ് കഥാപാത്രങ്ങൾ എല്ലാം കൂടി ചേരുമ്പോൾ ഇഷ്ടപ്പെടേണ്ടവർക്ക് ഇഷ്ടപ്പെടാം. അല്ലാത്തവർക്ക് 10 മിനിറ്റിൽ ടി വി നിർത്തി പോകാം എന്ന് പറയുന്ന സിനിമ ആണ് Animal.

Waiting for Animal Park!!