1627. Gold ( Malayalam, 2022)

 1627. Gold ( Malayalam, 2022)

        Streaming on Amazon Prime.

        

ഫോണിൽ ഒരു ഫോട്ടോയോ വീഡിയോ എടുത്താൽ ഫിൽറ്റർ ഇട്ടു അടിപൊളി ആക്കാൻ നമ്മൾ ശ്രമിക്കാറില്ലേ? അത് പോലെ അൽഫോൻസ് പുത്രൻ പുതിയ ഏതോ ഫോൺ വാങ്ങി ഫിൽറ്റർ ഒക്കെ മാറ്റി മറിച്ചു ഇട്ടു അവതരിപ്പിച്ച സിനിമ ആണ്‌ ഗോൾഡ് എന്നാണ് തോന്നിയത് .കല്യാണത്തിന് വീഡിയോ എടുക്കുന്നവരുടെ മുന്നിൽ ഒരു എൻസൈക്ലോപീഡിയ ആയിരിക്കും ഇനി മുതൽ ഗോൾഡ് എന്ന് കരുതുന്നു.അത്രയ്ക്കും ഉണ്ടായിരുന്നു കളം കളം എഫെക്റ്റ് ഒക്കെ.അതിന്റെ അപ്പുറം സിനിമ എന്ന നിലയിൽ നല്ല ബോർ തന്നെയായിരുന്നു ഗോൾഡ്.

  ഓരോ സീനിലും വന്നു പോകുന്ന ധാരാളം കഥാപത്രങ്ങൾ, എന്തിനു നയൻതാര പോലും കാമിയോ ആയിട്ട് ആണ്‌ സിനിമയിൽ അഭിനയിച്ചത് എന്ന് തോന്നി. കൂടുതൽ സ്ക്രീൻ പ്രസൻസ് പ്രിത്വിരാജ് കഴിഞ്ഞാൽ ഉള്ളത് ഉറുമ്പിനും, പുഴുവിനും, പൂവിനും, പഴുതാരയ്ക്കും ഒക്കെ ആയിരുന്നു. സിനിമയിൽ പൃഥ്വിയും നയൻ‌താരയും കണ്ടു മുട്ടാത്ത തരത്തിൽ അൽഫോൻസ് പുത്രന്റെ ബ്രില്യൻസ് ഉണ്ടായിരുന്നു.

 

സിനിമയുടെ തുടക്കം കൊള്ളാമായിരുന്നു. സ്വപ്നം കാണാൻ പറ്റിയ സംഭവം. ഒരു വണ്ടി നിറയെ സ്വർണം സ്വന്തം വീടിന്റെ മുന്നിൽ ആരെങ്കിലും വച്ചിട്ട് പോയാൽ? എന്റമ്മോ!!വഴിയിൽ കിടന്നു ഒരു പെട്ടി നിറയെ കാശ് കിട്ടിയാൽ എന്തൊക്കെ ചെയ്യാം എന്ന് കരുതി ഇരിക്കുന്ന ആളാണെങ്കിൽ അത് ഇഷ്ടപ്പെടും. അത് കൊണ്ട് എനിക്കും അത് ഇഷ്ടപ്പെട്ടൂ.

 അൽഫോൻസിന്റെ തന്നെ നേരം എന്ന സിനിമ പോലെ എടുക്കാൻ ശ്രമിച്ചെങ്കിലും നല്ലത് പോലെ പാളി പോയ സിനിമ ആയിട്ടാണ് ഗോൾഡ് തോന്നിയത്. നല്ല ബോർ പാട്ടുകൾ.അതിന്റെ കൂടെ ഒരു ഐഡിന്റിറ്റിയും ഇല്ലാത്ത കഥാപാത്രങ്ങൾ കൂടി വരുമ്പോൾ എല്ലാം പൂർണമായി.

 എനിക്ക് സിനിമ തീരെ ഇഷ്ടപ്പെട്ടില്ല. അൽഫോൻസ് പ്രേമം സിനിമ എടുത്തതിനു ശേഷം ആകെ പഠിച്ചത് വീഡിയോയിൽ ഫിൽറ്റർ കയറ്റാൻ മാത്രം ആണെന്ന് തോന്നുന്നു.അത് കൊണ്ട് ഒരു സിനിമ ആയി പോലും കണക്കിലെടുക്കാൻ പറ്റാത്ത ഒരു മിനി മലയാളം സീരിയൽ എന്ന് വിളിക്കാം സിനിമ ആണെന്ന് പറഞ്ഞ് വന്ന ഗോൾഡിനെ. ഇതിലും നന്നായി വടക്കൻ കേരളത്തിൽ നിന്നും വരുന്ന ഹോം വീഡിയോകൾക്ക് നിലവാരമുണ്ട്.

പിന്നെ ഇമ്മാതിരി ഫിൽറ്റർ ഇട്ട എഡിറ്റിങ് ആണ്‌ സിനിമ കണ്ടു അഭിപ്രായം പറയാൻ വേണ്ട യോഗ്യത എങ്കിൽ അത് എനിക്കും ചെയ്യാൻ പറ്റും എന്ന് ഉറപ്പായി ഗോൾഡ് കണ്ടപ്പോൾ . എന്റെ കയ്യിൽ ഉള്ള ഫോണിലും ഇതു ഒക്കെ നടക്കും എന്ന് തോന്നുന്നു.

സിനിമയുടെ റേറ്റിങ് ഒന്നും കൊടുക്കാൻ പോലും തോന്നുന്നില്ല. 0/5 എന്നൊക്കെ ഇട്ടാൽ മോശമാകില്ലേ?

സിനിമ കണ്ടവരുടെ അഭിപ്രായം രേഖപ്പെടുത്തുമല്ലോ?