1559. Peace (Malayalam, 2022)

 1559. Peace (Malayalam, 2022)

           

 ഒരു പ്രത്യേക തരം ആളുകളുടെ കഥയാണ് Peace എന്ന സിനിമ പറയുന്നത്. ഒരുമിച്ചിരുന്ന് കുടുംബമായി കഞ്ചാവ് അടിച്ച് കിറുങ്ങി നടക്കുന്ന കുറച്ചു മനുഷ്യരുടെ കഥ. കുടുംബം ആയി മദ്യപിച്ചിരുന്ന സിനിമകളുടെ  കാലം ഒക്കെ കഴിഞ്ഞ് അടുത്ത ലെവലിലേക്ക് പോയ സിനിമ ആണ് Peace . കഞ്ചാവ് അടിക്കുന്ന സാധാരണക്കാർ ആയ ഈ കുടുംബവും, അവരുടെ സുഹൃത്തുക്കളും ഒരു അബദ്ധത്തിൽപ്പെടുകയാണ് . കൃത്യ സമയത്ത് അവർക്ക് പണി കൊടുക്കാൻ ഒരു പോലീസും. അവർക്ക് രക്ഷപ്പെടണം . അതിനുള്ള വഴി കണ്ടെത്തണം. അവർ കണ്ടെത്തിയ വഴി നല്ല വെറൈറ്റി ആയിരുന്നു. അതാണ് ചുരുക്കത്തിൽ Peace ന്റെ കഥ.

  ഈ കഥ ഒരു മലയാള സിനിമ ആയി വന്നപ്പോൾ ഇതൊക്കെ നാട്ടിൽ നടക്കുമോ എന്ന് ചിന്തിച്ചൂ എന്ന് കരുതാം. പക്ഷേ വിദേശ സിനിമകളിൽ ഇങ്ങനത്തെ കഥാപാത്രങ്ങളെ ധാരാളം കാണാൻ സാധിക്കും. പൂർണമായും അല്ലെങ്കിലും ചെറിയ രീതിയിൽ ഒരു stoner മലയാളം സിനിമ എന്നൊക്കെ പറയാം Peace നെ കുറിച്ച്. ചെറിയ തമാശകൾ സിനിമയിൽ പലപ്പോഴും ഉണ്ടായിരുന്നു. അത് പോലെ കഥയിലെയും കഥാപാത്രങ്ങളിലെയും അപ്രതീക്ഷിതമായ കുറച്ചു കാര്യങ്ങൾ ഒക്കെ രസകരമായിരുന്നു. സിദ്ധിക്ക് ഇത്തരം സിനിമകളിൽ നല്ല രസകരമായ കഥാപാത്രങ്ങളെ അവതരിപ്പിക്കാൻ കൊള്ളാം എന്ന് തോന്നിയിട്ടുണ്ട് . 

  വെറുതെ ഒരു ടൈം പാസ് സിനിമ ആണ് Peace . സിനിമ മോശം ആണെന്ന് ഉള്ള അഭിപ്രായം ഇല്ല. വെറുതെ കണ്ടു മറക്കാവുന്ന ഒരു സിനിമ ആണ്. ക്ലൈമാക്സ് ആയപ്പോൾ സിനിമ തീരും എന്ന് കരുതിയപ്പോൾ ആണ് ഇതിന് ഒരു രണ്ടാം ഭാഗം ഉണ്ടാകും എന്ന് പറഞ്ഞു അവസാനിക്കുന്നത്. അനിൽ നെടുമങ്ങാടിന്റെ കഥാപാത്രം അത്ര പ്രാധാന്യം ഉള്ളത് കൊണ്ട് തന്നെ രണ്ടാം ഭാഗം എങ്ങനെ ആകും ഉണ്ടാവുക എന്നുള്ള ഒരു ചിന്തയും ഉണ്ടായി. കഥാപാത്രങ്ങൾ പണം ഉണ്ടാക്കാൻ ചെയ്യുന്ന വഴികൾ ഒക്കെ ഭ്രാന്തമായ ആശയം ആണെന്ന് തോന്നുമെങ്കിലും അതിൽ ചെറിയ തമാശകൾ കൊണ്ട് വന്നത് കൊണ്ട് കുഴപ്പമില്ല എന്ന തോന്നല് ഉണ്ടാക്കും . എന്തായാലും യഥാർഥ ജീവിതം ഒന്നും അല്ലല്ലോ സിനിമയിൽ കാണിക്കുന്നതും. 

കുഴപ്പമില്ലാത്ത ഒരു സിനിമയായി ആണ് തോന്നിയത്. കഞ്ചാവ് ഒരുമിച്ചിരുന്ന് വലിക്കുന്ന കുടുംബത്തെ കാണുമ്പോൾ അതിനോടു പൊരുത്തപ്പെടാൻ സാധിക്കാത്തവർക്ക് സിനിമ അസഹനീയം ആയിരിക്കും എന്ന് തോന്നുന്നു. 

എന്താണ് സിനിമ കണ്ടവരുടെ അഭിപ്രായം ?