1520. Paappan (Malayalam, 2022)

 1520. Paappan (Malayalam, 2022)

   സുരേഷ് ഗോപിയുടെ മാസ്  വേഷങ്ങൾ ഇനി മലയാളത്തിൽ ഉണ്ടാകുമോ എന്നത് സംശയമാണ്. സുരേഷ് ഗോപിയുടെ കാര്യം മാത്രം അല്ല. അത്തരത്തിൽ ഉള്ള സിനിമകളിലൂടെ താര പദവികൾ നേടിയ നടന്മാർക്ക് പോലും ഇനി അതൊക്കെ സ്‌ക്രീനിൽ അവതരിപ്പിക്കാൻ ഉള്ള അവസരം ഉണ്ടാകുമോ എന്നതും അത്തരം സിനിമകൾ ഇഷ്ടപ്പെടുന്ന ഒരാൾ എന്ന നിലയിലും സംശയമാണ്.

  കാരണങ്ങൾ പലതാണ്. പ്രധാനമായും മാറിയ സിനിമ സങ്കൽപ്പങ്ങൾ.മാസ് നായകന്മാർക്ക് അവരുടെ ശരീര ഭാഷ, ഡയലോഗ്  എന്നിവയിൽ ഒക്കെ കണ്ടെത്തുന്ന 'toxic masculinity' പോലുള്ളവ, അല്ലെങ്കിൽ അത്തരം ഒരു കാര്യം ശ്രദ്ധിച്ചു മാത്രം സിനിമ എടുക്കേണ്ട അവസ്ഥ ഒരു കാരണമാകാം. ഇതിലൊക്കെ ഉപരി അത്തരം സിനിമകൾക്ക് സംഭാഷണങ്ങൾ എഴുതി വലിയ ഒരു കൂട്ടം പ്രേക്ഷകർക്ക് ആഘോഷിക്കാൻ തക്ക വലിയ സിനിമകൾ എഴുതാൻ കഴിവുള്ള ആളുകളുടെ അഭാവം ഒരു കാരണം ആകാം. പണ്ട് ഇത്തരം ചിത്രങ്ങൾ എഴുതിയ ആളുകൾ പലരും അതിൽ പശ്ചാത്തപിക്കുകയും, പല അവസരങ്ങളിലും സോഷ്യൽ മീഡിയ ഓഡിറ്റിനു വിധേയർ ആവുകയും ചെയ്തിട്ടുണ്ട്. എന്തായാലും വംശ നാശം സംഭവിച്ചു കൊണ്ടിരിക്കുന്ന ഒരു സിനിമ വിഭാഗം ആയി മാറുകയാണ് മലയാളത്തിലെ മാസ് മസാല സിനിമകൾ.

  പറഞ്ഞു വന്നത് മറ്റൊന്നുമല്ല. ജോഷി - സുരേഷ് ഗോപി ചിത്രമായ പാപ്പൻ ആ വിഭാഗത്തിൽ ഉള്ളതല്ല. ഫയർ ബ്രാൻഡ് ആയ ജോഷി - സുരേഷ് ഗോപി കൂട്ടുകെട്ടിൽ ഇത്തവണ വന്നത്  കുറച്ചു ദുരൂഹത നിറഞ്ഞ, ഡ്രാമ / മിസ്റ്ററി വിഭാഗത്തിൽ ഉള്ള ഒരു ചിത്രമാണ്. RJ ഷാൻ കഥയെഴുതിയ ചിത്രത്തിൽ ജീവിതത്തിൽ നടന്ന പല സംഭവങ്ങൾ കാരണം അൽപ്പം ക്ഷീണിതനായി കാണപ്പെട്ട പാപ്പൻ എന്ന വിളിപ്പേരുള്ള മുൻ പോലീസ് ഉദ്യോഗസ്ഥനായി ആണ്‌ എസ്. ജി സ്‌ക്രീനിൽ വന്നത്. നേരത്തെ പറഞ്ഞ ഫയർ ബ്രാൻഡ് എന്ന വിശേഷണം കുറച്ചെങ്കിലും ക്ലൈമാക്സ്‌ ആകുമ്പോൾ മാത്രമാണ് എസ്. ജിയിൽ കാണാൻ ആവുക. അത് വരെ കഥാപാത്രം ആവശ്യപ്പെട്ട അവശതയോടെ ആണ്‌ എസ് ജി സ്‌ക്രീനിൽ ഉണ്ടായിരുന്നത്.

  ഇതേ സമയം നിതയുടെ വേഷത്തിന് ആയിരുന്നു സ്ക്രീൻ പ്രസൻസ് കൂടുതൽ.നിത നന്നായി തന്നെ ആ കഥാപാത്രം അവതരിപ്പിച്ചു എന്നാണ് അഭിപ്രായം.ഗോകുൽ സുരേഷിന്റെ മൈക്കിൽ എന്ന കഥാപാത്രവും നന്നായിരുന്നു. പാപ്പൻ പോലുള്ള ചിത്രങ്ങൾ ധാരാളമായി  ത്രില്ലർ ലേബലിൽ ധാരാളം മലയാളം സിനിമയിൽ വന്നിട്ടുള്ളതും അതിന്റെ pattern ആയിരുന്നു സിനിമയിൽ സ്വീകരിച്ചത് എന്നും തോന്നുന്നു. ബൈബിൾ വചനങ്ങൾ ഉപയോഗിക്കുന്ന സീരിയൽ കില്ലറുകളെ അതിനൊപ്പം ട്രോളിയതും നന്നായിരുന്നു. ശരിയല്ലേ? എന്ത് കൊണ്ട് മറ്റു മത ഗ്രന്ഥങ്ങൾ അവർക്കു ഉപയോഗിച്ചൂടാ?

 ചിത്രത്തിന്റെ കഥയെ സംബന്ധിച്ച്, ക്ലൈമാക്സ്‌ ആകുന്നതിനു മുന്നേ ഉള്ള ഒരു ത്രില്ല് ക്ലൈമാക്സിനു നൽകാൻ സാധിച്ചില്ല എന്നു തോന്നി. കുറേക്കൂടി convincing ആയ ഒരു ക്ലൈമാക്സ്‌ ചിത്രത്തിന് മുതൽക്കൂട്ടായേനെ. എന്നാൽ ഒരു പ്രേക്ഷകൻ എന്ന നിലയിൽ ചിത്രം തൃപ്തിപ്പെടുത്തി.തരക്കേടില്ലാതാണൊരു മിസ്റ്ററി / ഡ്രാമ ആണ്‌ ചിത്രം.

എന്തായാലും out and out ഒരു മാസ് മലയാള ചിത്രം ഇനിയും ഏറെ അകലെ ആണെന്ന് തോന്നുന്നു. ഒരു ചിത്രമെങ്കിലും അത്തരത്തിൽ വന്നിരുന്നെങ്കിൽ നന്നായേനെ.

More movie suggestions @www.movieholicviews.blogspot.com